Wukumbucize wo Wulajilize 24 - Luganuzi Luswanu Kuli Wanhu Wose 2002

Kuli ze Talaka, no wutola mucekulu yunji kanyhi

¹ “Na hono munhu we cilume yatole mucekulu, na hanyuma kanyhi ho yalece kwendezwa nayo, vyono lunji kawona nghani za cevu muli mucekulu yuyo. Na hanyuma yamupele talaka no kumuleka.

² No mucekulu yuyo ho yatolwe na mulume yunji kanyhi,

³ no mulume yuyo nayo we kejete yekale si yendezwe no mucekulu yuyo, nayo yamupele talaka.

⁴ Na lunji u mulume yuyu we kejete yafwe. Na hono yiwe nhavivyo, u mulume wakwe mulongozi, si kosuma kanyhi kumutola yaye, hambi mucekulu yuyo, nha yakondya kwiyavufya. Holeka hono yamutole kanyhi, lyowa yiwifyo hali Muwaha Mulungu. Holeka mulecele lukulu kwituma wubi wono winha wuwo, mu yisi yono Muwaha Mulungu, u Mulungu wenyu, yakumupelenyi.”

I malajilizo ge hayo hayo

⁵ “Nayo munhu we cilume, hono yawe ho yakutola mucekulu, yalece kwinjizwa baho baho mu mulimo wo wusilikale wo wulugu, hamba mu mulimo wunji wowose. Langa wamulekaje ha kaya yakwe mwi'daha lya mwaka monga, ho yekale hamonga no mugolece wakwe, yamusangalaze.

⁶ “Na hono wumukopeshe muyago cinhu cinji, wulece kusaka yapinjice kuli'gwe luzala hamba sago yayo. Ku soko hono wunoze nhavivyo, nha wukuwawusiza citumamilwa cono cikuwataza, ku wonozeleza ndigwa yawo yo kulya ho wawumipe.

⁷ “Munhu wo wose mono komuhiza nduguye Mwiisilayeli, no kumunoza yawe mwitumami wakwe, hamba kumuguza ku wuwanda, munhu yuyo yanojeye yawulagwe. Na mu nzila yiyo, vyo kowuwusa wubi we liwala lilino.

⁸ “Na lono watuga wutamwa wo wukoma, wulanjilile witume nha vyono Wakohani Walawi wowa kukulonjela. Weze kwituma zose nha vyono nawalonjela.

⁹ Akuno wukukumbucila zono Muwaha Mulungu, u Mulungu wako, yamunozeza Miliyamu mu nzila, lono mwalawila ku Misili.

¹⁰ Na hono wumukopeshe munhu cinhu cinji, wulece kubita no kwinjila mu kaya yakwe, no kuwusola mwenda wakwe wono yakukupela wuwe nha cipingo.

¹¹ Langa wulindile hadeha du, sunga mweneco yenjile mu kaya yakwe, yasole yakupele.

¹² Na hono yawe muciwa, wulece kwikala no mwenda wuwo mu mapango ge cilo.

¹³ Langa weze kumugomolela nhondo zose mu mapango ge cinyamihe, ho yefunice ne cilo. Nayo mbeka kokulumbiliza muno muno. No Muwaha Mulungu, u Mulungu wenyu, nayo kokwendezwa nagwe muno muno.

¹⁴ “Mulece kuwewonela i wetumami waciwa, hamba i waghwenzele, wa muli wandugu zenyu Waisilayeli, hamba wa muli wajenzi wono wekaye nanye mu makaya genyu ganji.

¹⁵ Langa munojeye mweze kuwalipa nhondo zose cinyamihe, u musahala wawo wa mwi'zuwa lilyo. Hambi nawo nha wewikanize wazituje. Holeka hono mulece kuwalipa, nawo womulilila Muwaha Mulungu ku soko yenyu, nanye mowa muli wasutyi so nghani yiyo.

¹⁶ Nawo walezi we wana, si wosuma kuwulagwa ku soko yo wubi wono wetumile wana wawo. Hamba wana nawo, si wosuma kuwulagwa ku soko yo wubi wono wetumile walezi wawo. Langa munhu wowose kosuma kuwulagwa so wubi wono yetumile mweneco.

¹⁷ Mulece kuhodanga ling'ani ye wajenzi, hamba ye wana wono wasina walezi, hamba mulece kusola myenda ye wacekulu wafwile, yiwe nha cipingo so wukope wono yakopile.

¹⁸ Mweze kukumbucila, vyono nanye mwali muli wawanda ku Misili, na vyono, Muwaha Mulungu, u Mulungu wenyu, yakamukombozenyi, holeka nane nghumukong'onhezenyi mwitume lilajilizo lilino.

¹⁹ “Na lono muwe mukududula wuhemba, na lono mukuwukunyhila ku zikaya, na kumbe mulece kusuma kuwukungha wose, na wunji wuwe wukali wusigaye ku mugunda, wono mwali mwawududula, hodu mulece kuwuyajila ku mugunda mukawukunyhe. Awo wowa wawasigalila i wajenzi, ne wana wono wasina walezi wawo, hamonga ne wacekulu wafwile. Nayo Muwaha Mulungu, u Mulungu wenyu, koyilugutiza i milimo yenyu yose yono mowa kwituma.

²⁰ Sunga na kolo wakondya kukong'onha kamonga mizeyituni yako mu mibici yako, hodu wulece kuwuyajila kanyhi wukakong'onhe zono zali zikali zisigaliye mu mibici. Azo zono zowa zisigaye, zowa zawasigalila i wajenzi, ne wana wono wasina walezi wawo, hamonga ne wacekulu wafwile.

²¹ Nagwe kolo wakondya kuhepa kamonga zabibu zako, wulece kuwuyajila kanyhi, ho wukahepe zono zisigaliye. Azo zono zowa zikali zisigaye, zowa zawasigalila i wajenzi, ne wana wono wasina walezi wawo, hamonga ne wacekulu wafwile.

²² Kanyhi mulece kusemwa vyono nanye mwali muli wawanda ku Misili. Holeka nane nghumukong'onhezenyi mwitume lilajilizo lilino.”