Wukumbucize wo Wulajilize 23 - Luganuzi Luswanu Kuli Wanhu Wose 2002

Wusiwanulwe we wanhu wo Muwaha Mulungu

¹ “Munhu wo wose we cilume mono mupaswe, hamba mono yadumuywe mapinde gakwe, munhu yuyo yalece kuwalilizwa hamonga ne wanhu wo Muwaha Mulungu.

² “No mwana mutumulwa, nayo nhavivyo yalece kuwalilizwa hamonga ne wanhu wo Muwaha Mulungu. Sunga ko ku lulelo lwakwe lwe likumi, yalece kuwalilizwa hamonga ne wanhu wo Muwaha Mulungu.

³ “Hamba hasina Mwamoni, hamba lunji Mumowabu wo wose, hamba munhu wo wose wa muli lulelo lwawo, sunga ko ku lulelo lwe likumi, mono kosuma kuwalilizwa hamonga ne wanhu wo Muwaha Mulungu.

⁴ Hambi wene nha walema kumupelenyi ndigwa ne malenga lono mwali muli mu muhinzo, mukulawilila ku Misili. Kanyhi wo wawo wono wamusola Balamu u mwana wa Beyoli, ku wulawa mwi'kaya lya Petoli ya ku Mesopotamiya, wakamulipa, ho yaze yamulijitenyi.

⁵ Ninga Muwaha Mulungu, u Mulungu wenyu, hamba si yendezwa ne nghani yiyo, holeka hamba si yamuhuliciza Balamu. Muwaha Mulungu yakaliwaniza lilijito lilyo, wukawa wulugutwe kuli'nye, vyono mwene yamwendilenyi 'nye.

⁶ Holeka nanye mulecele lukulu kuwapela wutazi wowose, hamba kuwanozeza ziswanu mu vilo vyenyu vyose vyo wikale wenyu.

⁷ “Ninga langa mulece kuwasula i Waedomu, hambi awo nha wandugu zenyu. Ne Wamisili nawo mulece kuwasula, hambi nanye nha mwekala nha muli wajenzi mu yisi yawo.

⁸ Ne wana wawo wo lulelo lwe kadatu wono wolelwa, awo wosuma kuwalilizwa hamonga ne wanhu wo Muwaha Mulungu.”

Kuli zo wezwe we nghambi ku wulugu

⁹ “Nanye lono mwenjila mu nghambi ku wulugu, mu madaha go wihomi, ale, munojeye mwilanjilile, mulece kwituma nghani yinji yo yose yono yidahile kumwavufyenyi.

¹⁰ Na hono hawe ho yuli mono yeloteye ne cilo no kulavya mbeyu yo lulelo, ale munhu yuyo kowa yakondya kwiyavufya. Holeka munhu yuyo yimunojeye yawuce mu nghambi yakekale kunze.

¹¹ Sunga kolo gafika mapango ge misi, ale ho yehovuje malenga. Ne lizuwa kolo lyeza kugwila, ho yawuye mu nghambi kanyhi.

¹² “Kanyhi munojeye mweze na hanhu hanji kunze ye nghambi yenyu, i hanhu hono mohetumamila nha coloni.

¹³ Na lono weza kubita coo, wudinghulize ne lisili lidodo, nagwe kolo wasunzumala, wuhimbehimbe baho hasi cikombo, nagwe kolo wakondya, ale wufucilize ne lisili lyako vyono vikulawa muli'gwe.

¹⁴ Hambi Muwaha Mulungu, u Mulungu wenyu, nha kowa kupilimapilima baho mu nghambi yenyu, ho yamuponyenyi kanyhi yamupelenyi wusume kuli walugu wenyu. Ku soko yiyo, holeka nghambi yenyu, yinojeye yeze yelile, ho Muwaha Mulungu, u Mulungu wenyu, yalece kuwona muli'nye cinhu cinji cocose cavu, yamulecenyi.”

I malajilizo ge hayo hayo

¹⁵ “Na hono mwitumami wa munhu yunji yeheme ko munya mwitumami, yatizize kwako, hodu wulece nagwe kumugomola.

¹⁶ Hambi nha kosuma kwikala hanhu ho hose mu makaya genyu, nha vyono kokwenda kuhagula mweneco. Ninga nanye mulanjilile mulece kumwiwonela.

¹⁷ “Kanyhi halece kuwa ne wamalaya we cidini, muli wanhu Waisilayeli, muli we cilume, hamba muli we cicekulu.

¹⁸ Kanyhi ne zipesa zozose zono zikulawa mumo mu wumalaya, zilecele lukulu kulavywa mu Nyumba yo Muwaha Mulungu, u Mulungu wenyu, ziwe so wilahize wawo. Hambi Muwaha Mulungu, nha si kendezwaga no wumalaya.

¹⁹ “Na hono wumukopeshe nduguyo Mwiisilayeli ndigwa hamba mapesa, wulece kudaya ngomola.

²⁰ Langa mosuma kudaya ngomola kuli wajenzi, muli vinhu vyono mowakopesha, ninga si muli vyono muwakopeshe wandugu zenyu Waisilayeli. Nane nghumunenenyi mwibataje lilajilizo lili, holeka Muwaha Mulungu, u Mulungu wenyu, nayo koyilugutiza milimo yenyu yose mu yisi yono moyisola yiwe yenyu.

²¹ Na lono mukunoza wilahize wowose kuli Muwaha Mulungu, u Mulungu wenyu, mulece kwitendya, langa musimbilile sunga muwufisilize wihuwize wenyu, hambi Muwaha Mulungu wenyu nha kowa yalindiye du wufisilize wo wilahize wako kuli mwene. Na wowa wubi kuli'gwe, hono wulece kufisiliza wilahize wako.

²² Hamba si wubi yaye hono wulece kwilahiza kuli Muwaha Mulungu.

²³ Nazo zono walonga ko mulomo wako, zo kumwihuwiza Muwaha Mulungu wako, wunojeye wuzifisilize, hambi nha cilavywa ce lihewa, cono wehuwiza gwegwe go mweneco ko mulomo wako.

²⁴ “Na lono wuwe wukolile mu nzila yono yikoleye mu mugunda wa zabibu wo muyago, hono wende, kosuma kuhepa zabibu no kulya mu nghango nha vyono wukusaka go mweneco. Langa wulecele lukulu kusola zabibu zinji, no kuzitajila mu ciya no kubita nazo.

²⁵ Nhavivilya kanyhi, hono wuwe wukolile mu nzila, yono yikoleye mu mugunda wo wuhemba wa yunji. Kosuma kubena ne miwoko yako, i maso go wuhemba no kuwufijiha no kuwulya, mu nghango nha vyono wukusaka go mweneco. Langa wulecele lukulu kududula ne nzolo wuhemba wo muyago no kubita nawo.”