Wukumbucize wo Wulajilize 22 - Luganuzi Luswanu Kuli Wanhu Wose 2002

¹ “Na hono muyiwone ng'ombe hamba ngholo yo Mwiisilayeli muyenyu yajiliye, mulece kuyileceleza, langa wuyisole mu mugomolele munya mutugo.

² Na hono yiwe munya mutugo yekaye kutali, hamba lunji kowa si wumumanyile munya mutugo, ale wuwutegulaje mutugo wuwo ku kaya yako. Na hono munya mutugo yaze yawe kuwulondola, ale, wumupelaje.

³ Mweze kunoza nhavivyo kuli vinhu vyose vyono mowa kuviwona, hono yiwe ndogowe, hamba citema co mwenda, hamba ciwe cinhu cocose du cono Mwiisilayeli muyago kowa yajilize.

⁴ “Na hono muyiwone ndogowe hamba ng'ombe yo Mwiisilayeli muyenyu yigwiye hasi, mulece kuyileceleza, langa mumutazaje, muyinule, muyimye viswanu.

⁵ “Iwacekulu, walece kuvwala myenda ye cilumelume, hamba nawo i walume, walece kuvwala myenda ye cicekulu. Hambi Muwaha Mulungu, u Mulungu wenyu, nha si yakwendezwa ne wanhu wono wakwituma zono zinha zizi.

⁶ “Na hono wuwe wukujenda mu nzila, wuwone linhuli lya ndeje mu mubici, hamba hasi, lina ne ndeje nyina yayo, yina magangha, hamba yina mana gayo, wulece kuyisola nyina yayo hamonga ne mana.

⁷ Langa kosuma kusola mana, ninga nyina yayo wuyilece yibite. Nagwe i vilo vyako vyo wikale wako ho viwe vinji, hamonga no wumoteswe.

⁸ “Na lono wukuzenga kaya yako mhya, wuyipilimyaje litembe lyayo ne cicitizo. Ho wulece kwiletela wuhoswe go mweneco, hono munhu yagwe ku wulawa mwi'tembe, yafwe.

⁹ “Mulece kuhadika mbeyu ye liwala linji muyihanzahanze hamonga mu migunda yenyu ya zabibu. Na hono munoze nhavivyo, hamba si motuga cambuzi co cose, mbeyu yono muhadice hamba si yolela, ne zabibu zeneco nazo hamba si zolela.

¹⁰ “Mulece kuzilimya ndogowe ne ng'ombe hamonga.

¹¹ “Mulece kuwa mukuvwala myenda yono yitowece sufu ne bafuta.

¹² “Mu myenda yenyu yo kwifunika, mweze kuyihonela masune mu mamhembo gose vyono mane.

Malajilizo ku so wahinza wono wakali namanya walume

¹³ “Na hono munhu yatole muhinza, nayo yalaza kuwa yagona nayo, u mulume kanyhi, ho yawe kumulema muhinza no kumulonga makani mabi no kulihodanga litagwa lyo muhinza yakutya,

¹⁴ ‘Ane namutola muhinza ayuno, ninga lono neza kugona nayo, hamba si mbwene citanjilo cono cikulajila vyono yali yakali namanya walume.’

¹⁵ Holeka hono ze liwala lili zijele, walezi wo muhinza yuyo, wasole mwenda we halusi, wono wali wawutandice mu citanda mu cilo cico, wono wina ne citanjilo ce sakami, yono yikulajila vyono si yali yamanyile walume, wawulajile kuli wanyamhala, ha mahakama. Wuwe wuhomelezi vyono muhinza yuyo yali yakali namanya walume.

¹⁶ Nayo sogwe yo muhinza yawalonjele wanyamhala yatye, ‘Ane namukombolela munhu ayu u mwanangu ho wetole, ninga aluno yeza si yakumusaka kanyhi yaye.

¹⁷ Na kanyhi kanoza nghani 'mbi muno muno kuli mwanangu, vyono mwene yakutya, mwanangu yali yakondya kumanya walume, lono wali kwitola nayo. Ninga alu, awuno wo wuhomelezi wayo, wono wukulajila vyono mwanangu yali yakali si namanya walume. Lanjenyi, ayi yo sakami mu mwenda we halusi, wono wali wawutandice mu citanda ne cilo!’

¹⁸ Hanyuma wanyamhala wamusole mulume yuyo, wamukunanje.

¹⁹ Kanyhi wamutoweze ne fayini ya fweza yigana limonga, fweza yiyo wamupele u sogwe yo muhinza. Hambi u munhu yuyo nha kamuletela cevu ciwaha muhinza we Ciisilayeli. Kanyhi hamba nhavivyo, mulume yuyo yajendelele kwitola du no muhinza yuyo. Hamba sikomulecela lukulu kanyhi sunga ko ku wufwe.

²⁰ “Ninga langa hono nghani yiyo yo muhinza yuyo yijele vyono mbeka yali yakondya kumanya walume,

²¹ ale, wamusole muhinza yuyo wamuwice ha mulango, hanze ye kaya yo sogwe. Ne walume wa mwi'kaya lilyo, wamutowanje ne mabwe sunga yafwe. Hambi nha kanoza nghani ya cevu ciwaha mu wanhu wetu, so wumanya walume lono yakali natolwa, kanyhi yakali yekaye mu nyumba ye walezi wakwe. Na mu nzila yiyi vyo kowuwusa u wubi muli nyenye.

²² “Na hono mulume yebatwe yagonile no mucekulu wo muyagwe, wose vyono wejete wawulagwe. Na mu nzila yiyi, vyo kowuwusa wubi muli Isilayeli.

²³ “Na hono mulume yebatwe mwi'kaya yagonile no muhinza mono yabanyigwe no muyagwe yunji,

²⁴ ale, muwasolaje wose vyono wejete, muwategule kunze ye likaya, muwatowanje ne mabwe sunga wafwe. Muhinza yanojeye yawulagwe, vyono si yacenjile yaye ho yatuje wutazi. Na kumbe yali yali mwi'kaya, i hanhu hono i wanhu wali wamuhulice vyono yakucenga. Nayo mulume yuyo yawulagwe, vyono kagona no muhinza mubanywe. Na mu nzila yiyi, vyo kowuwusa u wubi muli nyenye.

²⁵ “Na lunji yisolaga, mulume kamwagana mu mawimbi muhinza mono mubanywe na yunji, nayo ho yamunozeze vilungo no kugona nayo. U mulume yuyo mweneco du yo yanojeye yawulagwe.

²⁶ Ninga muhinza yalece kunozwa cinji yaye, vyono mwene si yetumile wubi wono wumunojeye yawulagwe. Hambi nghani yono yinha yiyi, nha yihwanile ne nghani yo munhu mono yakumuhungucila muyagwe no kumuwulaga.

²⁷ Vyono munhu yuyo nha kamwagana mu mawimbi u muhinza mubanywe, kawa kumuhungucila no kugona nayo kwe vilungo. Holeka hamba muhinza yawe kacenga, nha kutali, nani mono yali yamuhulice no kumutaza.

²⁸ “Na lunji yisolaga mulume kamwibata kwe vilungo u muhinza mono yakali nabanywa na yunji, no kugona nayo.

²⁹ Ale mulume yuyo yamupelaje sogwe yo muhinza yuyo, fweza makumi mahano. Kanyhi mulume yuyo yimunojeye yamutole muhinza yuyo. Hambi nha mweneco yamuhunguciye no kugona nayo kwe vilungo. Kanyhi hamba si komulecela lukulu sunga ko ku wufwe.

³⁰ Kanyhi yili mwiko kuli mwana we cilume yagone no mucekulu yunji wa muli wacekulu wo sogwe, hambi nha nghani ya cevu kuli sogwe.”