Wukumbucize wo Wulajilize 21 - Luganuzi Luswanu Kuli Wanhu Wose 2002

Za kuli munhu mono siyakumanyika na mono yamuwulaje

¹ “Na hono yejele munhu yafwiye mu mawimbi genyu, mu yisi yono Muwaha Mulungu, u Mulungu wenyu, yakumupelenyi, na yijele vyono u munhu mono yamuwulaje si yakumanyika.

² Ale, i Walongola wenyu, hamonga ne wanyamhala wenyu, wabite wakapime wutali wo wulawa hanhu baho hono yuyo munhu yafwiliye, sunga ku cikaya ne vikaya vyono vipilime behi ne hanhu baho.

³ Hanyuma i walongola we cikaya cono cokwijela co cili behi ne hanhu baho, hono munhu yuyo yafwiliye, ale, wasole nzeku mwitewa lilyo lya ha cikaya cico, nzeku yono yikali netumamilwa hamba mulimo wo wose.

⁴ Wayisole nzeku yiyo, wayitegule sunga ha cikolongo cono si cinyalaga malenga yaye, cono cili mwi'lolo lyono si likuwa kulimwa, hamba kuhadikwa yaye. Nawo kolo wayifisa baho nzeku yiyo, wayibene singo.

⁵ Nawo wakohani Walawi wanojeye weze wali baho. Hambi nha wowanojeye walamule zinghani zo wuwulaji. Hambi Muwaha Mulungu, u Mulungu wenyu nha yawahagula wamwitumamile no kulavizya wulugute mwi'tagwa lyakwe.

⁶ Nawo walongola wono wakulawa mu cikaya cono cili behi ne hanhu hono yafwiliye munhu yuyo, wowa wanojeye wayizuguzize miwoko yawo mucanyha ye nzeku yiyo,

⁷ akuno wakulonga wakutya, ‘Ase si cimuwulaje munhu yuyu, kanyhi hamba si cimumanyile na mono yamuwulaje.

⁸ Holeka go Muwaha Mulungu, wuwanenele wanhu wako Waisilayeli, wono wawakomboza ku wulawa ku Misili. Wucinenele, kanyhi wulece kuciwalila wubi wo wuwulaji wo munhu yuyu mono yasina wusutye.’

⁹ Na mu wituma zizo zono Muwaha Mulungu yakuhila, nanye ho si mowalilizwa mwisutya lili lyo wuwulaji.”

Kuli ze wacekulu wono wakutekwa ku wulugu

¹⁰ “Nanye kolo Muwaha Mulungu, u Mulungu wenyu, yamupelajenyi wusume mu wulugu, nanye kolo mwatuga mateka wenji,

¹¹ na mu mhuga yiyo ye mateka wenyu, muwe mowali ne wacekulu waswanu, wono mowasulumila no kusaka kuwatola.

¹² Mudahile kuwasola muwategule ku zikaya zenyu. Nayo mucekulu yuyo yanojeye yacete zimvwili zakwe, kanyhi yadumule ne makombazala gakwe,

¹³ yakawanize ne myenda yakwe. Kanyhi yimunojeye yekale mu nyumba yako, yawalilile walezi wakwe mu mwezi monga. Hanyuma ho wuwe kumutola yawe mugolece wako.

¹⁴ Na hanyuma hono wuwe wamukatala, hamba si wukumusaka kanyhi yaye. Hodu wumulece yabite. Na vyono wali wamutendela kwe vilungo no kugona nayo, holeka si kosuma kanyhi kumwitumamila nha muwanda, hamba si kosuma kumuguza kuli munhu yunji yaye.”

Kuli zo wuhazi wono wuwanojeye i wana we cilume i walongozi kulelwa

¹⁵ “Na hono munhu yawe yena wacekulu wejete, na wose walele wana we cilume. Ninga u mwana mulongozi kulelwa yawe si yaleligwe no mucekulu mono yuyo munhu yamwendile.

¹⁶ Lizuwa kolo lyeza kufika lyo kuwagawila wuhazi, wawo i wanagwe vyono wejete, si kosuma kumulongoza u mwana mudodo mono yaleligwe no mucekulu mono yamwendile, yamupele ligawo yiwaha, lyono lyali limunojeye u mwana mulongozi kulelwa yo yapegwe.

¹⁷ Langa yowa yimunojeye yamupele ligawo liwaha yuyulya du u mwana mulongozi kulelwa, hamba yawe siyaleligwe no mucekulu u mwendece wakwe. U munhu yuyo yanojeye yamanye vyono, u mwanagwe mulongozi kulelwa, yo yanojeye du yapegwe ligawo liwaha, lyono limunojeye mu ling'ani yakwe yo mulelwa mulongozi.”

Za kuli mwana we cilume mono yali cibede

¹⁸ “Na lunji munhu kowa yena mwana mono yali cibede, yasina cihuliko hamba hadodo kuli walezi wakwe, hamba watowe muno, ninga vyo bwete du.

¹⁹ Ale, u mwana we cilume we liwala lilyo, walezi wakwe wamusole, wamutegule kuli walongola we cikaya cono wekaye, wakamuling'anize.

²⁰ Wabite wawalonjele walongola wawo watye, ‘Ayu mwana wetu yali cibede kanyhi yasina cihuliko hamba hadodo, hamba si yakucihulika yaye. Mulimo wakwe kugala wujimbi du no kwajiliza mapesa mu zinzila zono zinojeye.’

²¹ Nawo i wanhu we cilume wa mwi'kaya, wasole mabwe wamutowanje sunga yafwe. Nanye holeka mosuma kuwuwusa wubi wuwu. Ne wanhu wose i Waisilayeli, wozihulika zizi zono zijeye, holeka nawo wotuga woga.”

Imalajilizo ganji ganji

²² “Na hono munhu yawulagwe so yisutya, no muwili wakwe wutumbikwe mwibici,

²³ muwili wuwo wulece kwikala cilo cose mumo mucanyha mwibici, langa wunojeye wuzikwe mwi'zuwa lilyo du. Hambi mono yakutumbikwa, nhe lijito lyo Mulungu. Holeka yinojeye muwuzice muwili wuwo ho wulece kuyavufya yisi yono Muwaha Mulungu, u Mulungu wenyu, yakumupelenyi.”