Wukumbucize wo Wulajilize 2 - Luganuzi Luswanu Kuli Wanhu Wose 2002

¹ “Hanyuma nhondo ho cikawa kupituka, cikawa kubita ku nyika, cikakolela balabala yono yibitile sunga ko kwi'lenga lya Shamu, nha vyono Muwaha Mulungu yali yalajilize. Ninga hamba nhavivyo, ciketumamila vilo vinji muno muno cikupilima pilima mu yisi ye matunda ya Edomu.

² “Hanyuma Muwaha Mulungu yakanonjela vyono,

³ cipango lu camalika co wupilime pilime wa mu matunda gago, na vyono aluno, yicinojeye cijendelele no muhinzo wetu, ciwe cidomile ku lubavu lwe sumuka.

⁴ Nayo yakandajiliza nimulonjelenyi nha vyono, mokolela mu yisi ye matunda ya Edomu, yisi ye wandugu zenyu, i wana wa Esawu, nawo womogopenyi muno.

⁵ Ninga anye mwilanjililaje, mulecele lukulu kwihoma nawo. Hambi ane, nha si nomupelenyi yaye, hamba hanji ho hose mu yisi yawo, hambi yisi ya Edomu nha niwapeye we ndelo ya Esawu.

⁶ Ninga anye mosuma kugula ndigwa hamba malenga kuli wene.

⁷ “Ninga mukumbucile vyono Muwaha Mulungu u Mulungu wenyu yamulugutizenyi mu milimo yenyu yose, yono mwakondya kwituma. Kanyhi na vyono yamukamisenyi lono mwapilimagapilimaga mu nyika yiyi. Na vyono yali yali hamonga nanye mu myaka yiyi makumi mane, kanyhi yakamupelenyi na vyose vyono mwasakaga.

⁸ “Nase cikajendelela no muhinzo wetu, cikayileka balabala yono yibitile mu makaya ga Elati na Eziyoni-gebeli sunga ko kwi'lenga lyo mwino. Cikawa kubita ku lubavu lwe sumuka ye cilima, cilanjile ku Mowabu.

⁹ Nayo Muwaha Mulungu yakanonjela yakutya, ‘Mulece kuwagaza i wanhu wa Mowabu, i wana wa Loti, hamba mulece kwihoma nawo. Hambi wene nha nakondya kuwapela likaya lya Ali liwe lyawo. Nanye hamba si nomupelenyi wuhazi wo wose mu yisi yawo yiyo.’ ”

¹⁰ (Katali i Wemimu, wanhu watali we cangamo, wenha Waanaki, wawo wekalaga mumo mu Ali.

¹¹ Wawo hanji kanyhi, watezagwa Walefayi, wenha Waanaki. Nawo Wamowabi wawacemaga Wemimu.

¹² Katali, i Waholi nawo, wekalaga mu yisi ye Waedomu, ninga i wana wa Esawu wakawasuma, wakawawinga mu yisi yiyo, wakalyongomezeza lukulu ne likungugo lyawo, wene wakawa kwikala mumo, yikawa nha vyono, Waisilayeli wawasuma no kuwawinga walugu wawo, mu yisi yono Muwaha Mulungu yawapela.)

¹³ “Hanyuma, cikawa kulilowoka likolongo lya Zeledi, nha vyono Muwaha Mulungu yacilajiliza.

¹⁴ Na mwi'pango lili, yali yakondya kuficila myaka makumi madatu na munana, ku wulawa lono cawucila ku Kadeshi-balineya. Ne vitung'ati wo wulugu wo lulelo lulo, wose wali wakondya kufwa, nha vyono Muwaha Mulungu yalonga, vyono wose wolowa wafwa.

¹⁵ Nayo Muwaha Mulungu, yakajendelela kwisumaniza nawo du, sunga yakawongomezeza lukulu wose.

¹⁶ “Nawo wali weza kuwa wakondya kufwa wose,

¹⁷ baho Muwaha Mulungu yakacilonjela ase yakatya,

¹⁸ ‘Izuwali, lyo lizuwa lyono linojeye mukolele mu yisi ya Mowabu, ninga mukole mu nzila yono yibitile ku Ali.

¹⁹ Holeka si mowa muli kutali ne yisi ye Waamoni, i wana wa Loti. Ninga anye mwilanjililaje, mulecele lukulu kwihoma nawo. Hambi ane nha si nomupelenyi yaye hamba hanji hadodo mu yisi yawo, yisi yono nakondya kuwapela wene.’ ”

²⁰ (Ne yisi yiyo yikawa yimanyice kanyhi, nha vyono yo yisi ye Walefayi, i litagwa lye wanhu wono wekalaga mumo katali. Ninga Waamoni wawacemaga Wazamuzumimu.

²¹ Nawo wali watali wehwanile Waanaki. Wali wenji muno, kanyhi watali, wali cangamo, kanyhi lyali yikungugo lyono lina vilungo muno. Ninga hamba nhavivyo, Muwaha Mulungu yakawongomeza wose, i Waamoni ho wayisole yisi yawo no kwikala mumo.

²² Nayo Muwaha Mulungu, yakawanozeza nhavivyo sunga ne Waedomu i wana wa Esawu, wono wekaye mu yisi ye matunda ya Edomu. Muwaha Mulungu yakawongomeza Waholi, i Waedomu ho wayisole yisi yawo no kwikala mumo, nawo wakali wekaye mumo sunga nalu.

²³ Nayo yisi yono yali yalambaye lilenga lya Meditelaneya, i wanhu wono walawa ku cizingwa ca Kupulo wo wakekala mumo. Wawo wo wawongomeza i Wavi, i wekazi wa mumo ku wulawa na katali, wakayisola yisi yawo ku wulawilila kutakama, sunga ko kwi' kaya lya Gaza.)

²⁴ “Nase cali ceza kukondya kupuluta mu yisi ya Mowabu Muwaha Mulungu yakacilonjela yakutya, ‘Mwinukaje, mulowoce likolongo lya Alinoni. Nane nghumupelenyi Sihoni, u mutemi we Waamoli, mu miwoko yenyu, ne yisi yakwe yose. Holeka mumubitilaje mumuhome muyisole ne yisi yakwe.

²⁵ Nane ku wulawilila izuwali, nowanoza wanhu, hanhu hose, wamogopenyi nyenye. Kanyhi wose wocicima ko woga wuwaha muno, kolo wakulihulika litagwa lyenyu likutambulwa.’ ”

Waisilayeli wakumusumiza u mutemi Sihoni

²⁶ “Nane ku wulawilila ku nyika ya Kedemoti, nghatuma wanhu kuli mutemi Sihoni, wakamulonjele watye,

²⁷ ‘Cikukulomba wucikombole cikolele mu yisi yako. Nase cowa cityatizye balabala du, hamba si cotemanuka ciyilece balabala yaye.

²⁸ Nase cozilipila zindigwa zono colya, ne malenga gono cong'wa. Ase cikukulomba nghani monga hodu, nha cinji cikusaka cikolele mu yisi yako du,

²⁹ sunga cilowoce likolongo lya Yoludani, cinjile mu yisi yono Muwaha Mulungu yakucipela. I wana wa Esawu wono wekaye mu yisi ya Edomu, ne Wamowabi wono wekaye mu yisi ya Ali, wene wacikombola cikolele mu zi'si zawo.’

³⁰ “Ninga, u mutemi Sihoni hamba si yavumila yaye yacikombole cikolele mu yisi yakwe. Hambi Muwaha Mulungu, u Mulungu wenyu, nha yali yamunoza yawe yasina cihuliko, kanyhi yawe mufyuzi, ase ho cimusume, ciyisole ne yisi yakwe yono cikali ciyikaye sunga nalu.

³¹ “Hanyuma, Muwaha Mulungu kanyhi yakanyitya, ‘Alu wulanje! Nakondya kumunoza mutemi Sihoni ne yisi yakwe, yawe yasina vilungo hali'gwe. Holeka winjile wuyisole yisi yakwe, yiwe yisi yako.’

³² Nayo mutemi Sihoni ne wanhu wakwe, wakekonghola ho wehome nase behi ne likaya lya Yahazi.

³³ Ninga Muwaha Mulungu, u Mulungu wetu, yakacikombolela Sihoni mu miwoko yetu, nase cikamuwulaga, ne wanagwe we cilume wose, hamonga ne wanhu wakwe wose.

³⁴ Na mwi'pango lilyo du, cikagateka no kugongomeza makaya gose, kanyhi cikawawulaga wanhu wose i walume ne wacekulu, ne wana wawo wose. Nase si camusigaza munhu hamba monga mono yekala mumi.

³⁵ Cikazisola mitugo zose, kanyhi cikagateka ne makaya gose.

³⁶ Nayo Muwaha Mulungu, u Mulungu wetu, yakacipela wusume, cikagateka makaya gose ku wulawilila ku Aloweli, mu mwejelele we lilolo lya Alinoni, sunga ko kwi 'kaya lyono lyali lili haciligati ye lilolo, sunga ko ku Gileyadi. Kanyhi hakawa hasina yikaya lyo lyose, lyono likawa na majinji gono gakamile muno, gono gali gacizize vilungo vyetu, lyono lyacifutila.

³⁷ Ninga hamba nhavivyo, si casuma kubita behi ne yisi ye Waamoni, hamba ku nyenje ye likolongo lya Yaboki, hamba mu makaya ga mu matunda, hamba hanhu hanji ho hose, hono Muwaha Mulungu, u Mulungu wetu, yacilajiliza cilece kubita.”