Wukumbucize wo Wulajilize 19 - Luganuzi Luswanu Kuli Wanhu Wose 2002

Makaya go wutizizo

¹ “Nayo Muwaha Mulungu, u Mulungu wenyu, kolo yakondya kuwongomeza, i wanhu wono wekaye mu yisi yono yakumupelenyi nyenye, nanye kolo mwakondya kugasola makaya gawo, hamonga ne zikaya zawo, no kwikala mumo,

² nhondo muyigawe yisi yilawe hadatu, na mumo mose, mwisiwanulile likaya limonga limonga, lyono lyowa kupelu kulificila mbela mbela.

³ Ho yiwe, hono munhu yawulaje muyagwe, yasume kutiziza mwi 'kaya limonga lya mu makaya gaga madatu, ho yeponye.

⁴ Na hono munhu yamuwulaje muyagwe mhalanyuka, mono si mulugu wakwe, kosuma kutiziza mwa linji lya muli makaya gaga madatu, ho yeponye.

⁵ Lunji citye, wanhu wejete wabitana mu mbago mu wutenya zingwagu, na muli wene, yunji kawa yakutema libici yaligwise, na mu wunoza nhavivyo, nhemo yakwe yiwa kukongoloka mu caka cayo, yiwa kumuwulaga muyagwe, ale u munhu yuyo, kosuma kutiziza mwa linji lya muli makaya gaga madatu ho yeponye.

⁶ Holeka yinojeye hawe na makaya madatu, hambi hono hawe ne 'kaya limonga du, lyowa lili kutali muno ku wufika mbela, u munhu mono yakusaka kwiponya. Vyono yuyulya munya nduguye mono yawulagwe, kosuma kumuwinga no kumwibatila mu nzila no kumuwulaga kwe 'kuwo, mbula soko, so wilipicize we lifwa lyo nduguye. Nayo kumbe ho kamuwulaga mhalanyuka du, hamba si yali mulugu wakwe yaye.

⁷ Na yiyi yo soko yono yikuleka nghumulajilizenyi mwisiwanulile makaya madatu.

⁸ “Nayo Muwaha Mulungu, u Mulungu wenyu, kolo yakondya kuyonjeleza mipaka ye yisi yenyu, nha vyono yawehuwiziza walezi wenyu, no kumupelenyi yisi yose,

⁹ baho mosiwanula makaya ganji kanyhi madatu. (Nayo komupelenyi yisi yiyi hono mwibate zose zono nghumulajilizenyi izuwali, na hono mumwende Muwaha Mulungu, u Mulungu wenyu, na hono mujendele mu zinzila zakwe.)

¹⁰ Holeka musiwanule makaya gago, ho mulece kuwambuza iwanhu wono wasina masutya wawulagwe mbula soko, nanye kanyhi nhavivyo, ho mulece kuwalilwa masutya bwete so wuleceleza i wanhu we liwala lilyo, wawulajilwe mu yisi yono Muwaha Mulungu yakumupelenyi.

¹¹ “Ninga munhu hono yawe yena simbili no muyagwe, ho yamusepe yamuwulaje, hanyuma yatizize mwa linji lya muli makaya gaga madatu ho yeponye.

¹² Mu nghani yono yinha yiyo, i walongola we likaya lyono yakulawilila munhu yuyo, wamutyatye kuko, wakamusole, wamuwice mu miwoko ye wanya ndugu wa mono yawulagwe. Nawo wanya ndugu, wamuwulaje yuyo muwulaji wo ndugu yawo, welipicize lifwa lyo ndugu yawo.

¹³ Mulecele lukulu hamba kumuwonela lusungu munhu we liwala lilyo. Nanye muwuwusizaje lukulu u wubi wuwu wo wuwulaji mu Isilayeli, nanye ho mutuje wumoteswe.”

Kuli ze mipaka yono yawikwa katali

¹⁴ “Mulece kuwusa vitanjilo vye mipaka ye wayenyu vyono wawika we katali, mu yisi yono Muwaha Mulungu, u Mulungu wenyu, yakumupelenyi yiwe yisi yenyu.”

Kuli zo Wuhomelezi

¹⁵ “Wuhomelezi wo munhu monga, si wokwila yaye kumuhomelela munhu vyono yena masutya, langa sunga hawe na wuhomelezi wa wanhu wejete hamba wadatu.

¹⁶ Na hono munhu yejelele yasace yamutamise muyagwe yunji, ko wuhomelezi wo wulambi.

¹⁷ Wanhu wawo, u musitakwa hamonga na mono yakumusitaka muyagwe, wose vyono wejete, wategulwe i hanhu ho wuhembelo, ho walamulwe ne wakohani, hamonga ne wanyamhala wono wowa wali baho mu vilo vivyo.

¹⁸ Nawo wanyamhala woziwuza wuza, na hono zijele vyono, u munhu yuyo kamuhomelela, no kumusitaka Mwiisilayeli muyagwe ko wulambi,

¹⁹ munhu yuyo yapegwe wulipicizwe wu wulya wono yali yalipicizwe yuyulya mono yali yasitakwa. Na mu nzila yiyo, yo kowuwusiza u wubi we liwala lilyo.

²⁰ Nawo wanhu wose wozihulika zizo, nawo wokogofywa. Na howa hasina hamba monga kanyhi, mono kokwituma zimbi zono zinha zizo.

²¹ Na mu vyalo vye liwala lilyo, mulece kuwana lusungu. Ne ndipiciza yayo, yowa yili nhavi: Wumi kwa wumi, liso kwa liso, lino kwa lino, muwoko kwa muwoko, mugulu kwa mugulu.”