Wukumbucize wo Wulajilize 18 - Luganuzi Luswanu Kuli Wanhu Wose 2002

I ligawo lye Wakohani

¹ “I wakohani wo mulango wa Lawi, wene wasina ligawo lyolyose lye yisi, hamba wutemi, mu Isilayeli, ligawo lyawo, wene, wowa kulya du vyono vikulawa mu vilavywa, hamonga ne makumbiko ganji ganji gono gowa kuletwa so kumulavizya Muwaha Mulungu.

² Wene wowa wasina wuhazi we yisi, nha vyono wenha i wandugu zawo we milango yinji. Langa ligawo lyawo, lyowa cico cilejeho cono wena naco co kuwa wakohani wo Muwaha Mulungu, nha vyono Muwaha Mulungu yehuwiza.

³ Na mu mapango gogose lono ng'ombe hamba ngholo yikulavywa yiwe yikumbiko, wakohani wapegwe ciwoko, ne mazagasa vyono mejete, hamonga ne lilomofu.

⁴ Kanyhi yiwanojeye wakohani wapegwe malimbuko go wuhemba, ne divayi, hamonga ne mafuta, no wukunzeje wulongozi we zingholo zenyu.

⁵ Hambi Muwaha Mulungu nha yawuhagula mulango wa Lawi mu wulawa mu milango yenyu yose, wo wumwitumamile mu mulimo wo wukohani cibitilila.

⁶ “No Mulawi wo wose, kosuma kubita hanhu hohose ha wuhembelo, mu yisi yose ya Isilayeli,

⁷ yalongoze wuhembi mu wuhembelo wuwo nha mukohani wo Muwaha Mulungu, u Mulungu wakwe, yetume mulimo nha vyono wanduguze wose Walawi wono wakwituma baho.

⁸ Ninga yowa yinojeye wamupele nayo ligawo lye zindigwa lyono viling'aniye ne magawo ge wakohani wayagwe. Ninga kanyhi ho yahanze ne ligawo lyono mhuga yakwe wowa wamuleteye.”

Wusugulwe so wutyatya metumo ga we makungugo ganji

⁹ “Nanye kolo mweza kwinjila mu yisi yono Muwaha Mulungu, u Mulungu wenyu, yakumupelenyi. Mwilanjilile ho mulece kuzityatya zinzila zawo ne metumo mabi ga we makungugo gono gali mumo.

¹⁰ Kanyhi mulecele lukulu kuwalavya i wana wenyu we cilume hamba we cicekulu wawe kuticimizwa mu moto mu makumbiko genyu, hamba kuwaleceleza wanhu wenyu weyinjize mu wutowa mawizi, hamba mu wutowa cisangu, hamba mu witumamila wuhawi, hamba mu wuvwala mhiji.

¹¹ Kanyhi mulece kuwaleceleza ho weyinjize mu wuhimbuzi, hamba mu wu wuza we macisi, hamba mu wunoza masoce, hamba mu wuwuza myahe ye wafu.

¹² Muwaha Mulungu, u Mulungu wenyu, yawasulile wanhu wono wakwituma zimbi ze liwala lilyo. Co cikuleka yakugawinga gago makungugo, gawuce mu yisi, so cambuzi cenyu.

¹³ Holeka mweze mukwilaniciye muno muno hali Muwaha Mulungu.”

Wihuwizo wo Kumutuma Muwizi

¹⁴ Hanyuma Musa yakawalonjela yakatya, “Mu yisi yono mweza kubita kwinjila no kuyisola, i wanyawusi wa mumo, wendile kuwahulika wono wakutowa mawizi, na wono wakutowa cisangu. Ninga anye mwilanjilile, hambi Muwaha Mulungu, u Mulungu wenyu, nha si yakumukombolenyi nanye mwitume zono zinha zizo.

¹⁵ Langa mwene komuletelenyi muwizi, mono kolawa muli nyenye nyo weneco, mono kowa yenha nene. Nanye mumuhulice yuyo.

¹⁶ Kanyhi mukumbucile mwizuwa lilyo, lono mwali mwihangulize he 'tunda lya Sinayi, mwatya vyono si mosaka mwidome no Muwaha Mulungu yalongane nanye kanyhi, hamba si mwasaka muwuwone no wusu wakwe, vyono mogopaga mulece kufwa.

¹⁷ Nayo Muwaha Mulungu yakanonjela yakatya, ‘Heya wanoza wulamule wuswanu we mahala.

¹⁸ Holeka alu nowaletela muwizi mono yehwanile gwegwe, mono kolawa muli weneco. Nane nomulonjela zono kolonga, nayo kowalonjela i wanhu zinghani zose zono nowa kulajiliza.

¹⁹ No muwizi yuyo kowa kulonjela mwitagwa lyangu. Nane nomulipiciza munhu wo wose, mono si komuhulika.

²⁰ Na hono yejele muwizi wo wose, mono kokwijelela yalitumamila litagwa lyangu, mu zinghani zono ane si nimutumile yazilonje, muwizi yuyo yimunojeye yafwe so nghani yiyo. Na yowa nhavivyo, sunga na kuli wawizi wanji wono wowa kulonjela mwi'tagwa lye milungu yinji.’

²¹ “Nagwe hono wulonjele mu nhumbula yako wuwe kutya, ‘Alu, ho coyimanya nhawule nghani yiyo, hono yiwe si yilawile kuli Muwaha Mulungu?’

²² Ninga moyimanya nhavi, ‘Hono muwizi yalonjele nghani mwi'tagwa lyangu, na zono yalonjile ho zilece kufisilizwa, baho ho momanyila vyono nghani yiyi si yilawile kuli Muwaha Mulungu. Muwizi yuyo kalonga zakwe mweneco du. Holeka nanye mulece kumogopa yaye.’ ”