Wukumbucize wo Wulajilize 17 - Luganuzi Luswanu Kuli Wanhu Wose 2002

¹ “Kanyhi mulecele lukulu kumulavizya Muwaha Mulungu, u Mulungu wenyu, mutugo wowose, ng'ombe hamba ngholo, yono yina cilema, mwene si yakwendezwa nazo.

² Na lunji muhulika vyono, linji lya mu makaya genyu, koyuli munhu monga we cilume hamba we cicekulu, mono yetumile wubi hali Muwaha Mulungu,

³ kabena cilagane, yakuhemba milungu yinji no kuyitumamila, lunji lizuwa, hamba mwezi, hamba nyelezi, si nhe lilajilizo lyo Muwaha Mulungu.

⁴ Na hono muzihulice zono zinha zizo, muziwuzilizaje mu yisi yose. Na hono yijele vyono nghani yiyi mbeka vyo yinha mu Waisilayeli.

⁵ Hodu mumusolaje munhu yuyo, mumuwice kunze ye likaya, mumutowe ne mabwe sunga yafwe.

⁶ Ninga hamba nhavivyo, yalece kuwulagwa, sunga hawe howali wahomelezi wejete hamba kuciza, wono womuhomelela. Ninga yalece kuwulagwa hono hawe ho yuli muhomelezi monga du.

⁷ Ne wahomelezi weze wo walongozi wo kumugumilila mabwe, hanyuma wanji nawo ho watyatye, wamugumilile munhu yuyo mabwe. Na mu nzila yiyi, mo kowuwusiza wubi wuwu.

⁸ “Hanji, zidahile kwijela nghani zono nghamu muno, ku wulamulwe na wawo walongola. Holeka nghani ze liwala lilyo, nha vyono lunji wuhazi wa sawo, hamba witula mazeya, hamba lunji nghani zo wiwulaji. Muli zizi kolo zejela, munojeye mubite ha wuhembelo, i hanhu hono Muwaha Mulungu, u Mulungu wenyu yahahagula.

⁹ Muyilolose nghani yenyu kuli Wakohani Walawi na kuli mulongola mono kowa yali baho mu vilo vivyo, muwalece wene wayilamule nghani yiyo.

¹⁰ Nawo womulonjelenyi nha vyono wayilamuye, nanye mobita muketume nha vyono mulonjeywe.

¹¹ Nanye munojeye muwubocele wulamuzi wawo, mutyatye zose nha vyono womulolosezenyi.

¹² Na mono kokwijelela yabedegale zono yalonjeywe no mulongola, hamba no mukohani mono yali baho yakumwitumamila Muwaha Mulungu, munhu yuyo yawulagwe. Na mu nzila yiyi, yowa yo nzila yo kuyiwusiza nghani yiyo 'mbi, muli Isilayeli.

¹³ Nawo wose kolo weza kuzihulika zizi, holeka wokogopa. Na howa hasina kanyhi hamba monga, mono kokwijelela kwituma kanyhi zono zinha zizi.”

Kuli zono zimunojeye mutemi

¹⁴ “Nanye kolo mwakondya kuyisola yisi, yono Muwaha Mulungu, u Mulungu wenyu, yakumupelenyi, na kolo mwekala mu yisi yiyo, lunji mosaka muwe no mutemi wenyu nanye, nha vyono genha makungugo ganji gono gamupilimenyi.

¹⁵ Ninga hamba nhavivyo, munojeye mulanjilile muno, u munhu mono momuhagula yawe mutemi, yeze munhu mono Muwaha Mulungu mweneco yamuhaguye. Kanyhi yinojeye yalawe muli nyenye nyo weneco. Mulecele lukulu kumuhagula munhu mujenzi yawe mutemi wenyu.

¹⁶ Kanyhi mumanye vyono, munhu kuwa mutemi, si vyono ho yawe na fwalasi nyinji so wasilikale wakwe wo wulugu, hamba si vyono ho yawategule wanhu ku Misili wakagule zifwalasi. Hambi Muwaha Mulungu nha yalonga vyono, i wanhu wakwe si wolowuyila lukulu kanyhi ku Misili.

¹⁷ Kanyhi munhu kuwa mutemi, si vyono ho yawe ne wagolece wenji, hambi zizo nha zomunoza yamulece Muwaha Mulungu. Na kanyhi hamba si yinojeye mwene ho yawe mugoli wa fweza na zahabu.

¹⁸ Ninga munhu kolo yawa mutemi, munhu yuyo, yimunojeye yapegwe citabu cono candicigwe i malajilizo go Mulungu, hamonga ne mejizo, vyono visoleywe mu wulawa mu citabu cono cikalaga ne wakohani Walawi.

¹⁹ Nayo yimunojeye yaciwice citabu cico behi no mwene, yawe kucisoma nhondo zose, mu vilo vyakwe vyose vyo wikale wakwe, ho yasume kwiyijiza vyono yimunojeye yamogope Muwaha Mulungu, yazibate ko wihuwilwa, zose zono zandicigwe mu citabu cico yazitume.

²⁰ Na yiyi yo yomunoza yalece kwihwesa nha vyono, mwene yo munhu muswanu sinha wanji i Waisilayeli wayagwe. Kanyhi yomutaza ho yalece kubedegala hamba hadodo i malajilizo go Muwaha Mulungu. Nayo holeka kotema myaka minji, ne wanagwe nawo wolitema likungugo lye Waisilayeli mu ndelo nyinji.”