Wukumbucize wo Wulajilize 16 - Luganuzi Luswanu Kuli Wanhu Wose 2002

Pasaka

¹ “Mweze wukumbucila mwezi wa Abibu, muwe kumunozeza Pasaka Muwaha Mulungu, u Mulungu wenyu, mu mwezi wuwo. Hambi mu mwezi wuwo wa Abibu ne cilo, Muwaha Mulungu, u Mulungu wenyu, nha ho yamukombozezenyi ku wulawa ku Misili.

² Holeka mu mwezi wuwo, munojeye mumuwulajile Pasaka Muwaha Mulungu, u Mulungu wenyu. Mumuwulajile ngholo na ng'ombe mu hanhu ho wuhembelo, ho mumupele cogopo Muwaha Mulungu, u Mulungu wenyu.

³ Na lono mukulya ndigwa yiyo, mulece kulya no mukate wono wina cisase. Nanye mojendelela kulya mukate wono wusina cisase vilo mupunghati, nha vyono mwanoza mwizuwa lilya, lono mwawucila musunho ku Misili. Ale muwulya wuwo mukate, nawo wocemwa mukate wo wugaye. Ho mutuje wukumbucile mu vilo vyose vyo wikale wenyu, we lizuwa lilyo lyono mwawucila ku Misili, i hanhu ho wugaye.

⁴ Kanyhi wukumbucile vyono yunji wo wose wa muli nyenye, mu yisi yose, yalece kuwa na cisase co cose mu kaya yakwe, sunga vipulute vilo mupunghati. Ne nyama nayo yo mutugo, wono muwuwulaje mu cilo ce lizuwa lilongozi, nyama yiyo yiligwe mu cilo cico du, yilece kusigazwa.

⁵ Mitugo yose ye Pasaka, muyiwulajilaje ha wuhembelo du. Mulece kuyiwulajila caka du, hanhu ho hose mu yisi yono Muwaha Mulungu, u Mulungu wenyu, yakumupelenyi.

⁶ Kanyhi mweze kuziwulaga mwi'pango lono lizuwa likugwila, i cipango ce lizuwa lyono mwawucila ku Misili.

⁷ Nyama yiyo, muyitelece, muyilile i hanhu ho wuhembelo, wose hamonga. Ne mitondo yaco hakali mitondo, muwe kuwuya ku zikaya zenyu.

⁸ Na ku wulawa baho, mujendelele kulya mukate wono wusina cisase, sunga vipulute vilo mutandatu. Na mwi'zuwa lyo mupunghati, mwihangulize wose hamonga, mumuhembe Muwaha Mulungu, u Mulungu wenyu. Na mwizuwa lilyo, lyowa yizuwa lyo wucehe, mulece kwituma mulimo wunji wo wose.”

Sikukuu ye nhwanga

⁹ “Mweze kuwala sunga gapulute majuma mupunghati, ku wulawa mwi'zuwa lyono mweza kwanza kududula,

¹⁰ hanyuma ho muwe kunoza sikukuu ye nhwanga, mumupele cogopo Muwaha Mulungu, u Mulungu wenyu. Na mwi'zuwa lilyo mumulavizye Muwaha Mulungu, u Mulungu wenyu, vilavywa vye lihewa, vyono vyolawa mu vinhu vyono Muwaha Mulungu, u Mulungu wenyu, kowa yamumotyajenyi.

¹¹ Musangalalile hali Muwaha Mulungu, u Mulungu wenyu, mwi'zuwa lilyo, hamonga ne wana wenyu we cilume na we cicekulu, ne wetumami wenyu, ne Walawi, ne Wajenzi, hamonga ne wana wono wasina walezi, hamonga ne wacekulu wafwile, wono mwikalane nawo mu makaya genyu. Na zizi zose mweze kuzinozeza i hanhu ha wuhembelo du.

¹² Mweze kukumbucila vyono nanye mwali muli wawanda ku Misili, holeka munojeye mugebatile lukulu malajilizo gaga.”

Sikukuu ye Vibanda

¹³ “Nanye kolo mwakondya kuwutowa wuhemba wenyu, mwakongholeza vyose vya mu matuli, na vya mu vyuga vyenyu, no kuziminya zabibu zenyu, mukumbucile, munoze sikukuu ye vibanda mu vilo mupunghati.

¹⁴ Nanye musangalale ne wana wenyu we cilume na we cicekulu, ne wetumami wenyu, ne Walawi, ne Wajenzi, hamonga ne wana wono wasina walezi, hamonga ne wacekulu wafwile wono mwikalane nawo mu makaya genyu.

¹⁵ Mumupele Muwaha Mulungu, u Mulungu wenyu, cogopo, mumunozeze sikukuu yiyi mu vilo mupunghati. Muyinozeze i hanhu ho wuhembelo du. Munojeye musangalale, hambi Muwaha Mulungu, u Mulungu wenyu, nha kavilugutiza vilimwa vyenyu, hamonga ne milimo yenyu yose.

¹⁶ “Wanhu we cilume wa mwi'kungugo lyenyu, yiwanojeye wose, waze ha wuhembelo wamuhembe Muwaha Mulungu nghanghulo yidatu mu mwaka, mu mazuwa ge sikukuu ye Pasaka, sikukuu ye nhwanga ne sikukuu ye vibanda. No munhu wowose mono kokuza ku wuhembi, yimunojeye yaleteleze ne cipegwa,

¹⁷ mu nghango vyono yakusuma, mu nghango nha vyono Muwaha Mulungu yamupelile no kumumotya.”

Kuli zo mulimo we Walongola

¹⁸ “Kanyhi muwawikaje walongola hamonga ne watazi wawo, mu makaya gose gono Muwaha Mulungu u Mulungu wenyu yakumupelenyi. Nawo wanhu wawa, u mulimo wawo, wowa kuwalamula wanhu ko wuling'anizi we ling'ani.

¹⁹ Walece kuwa no wuwaguzi hamba kuwewonela wanhu. Kanyhi walecele lukulu kubocela mafupo. Hambi mafupo hamonga ne vipegwa, nha vibofuzaga meso ge wanhu we mahala, ne wanhu wenenenyhezi. Sunga viwa kuwanoza wawa kulavya wulamuzi wono si wuli ling'ani.

²⁰ Holeka munojeye muyityatye no kuyibata ling'ani, ho musume kwikala no kuyitema yisi yono Muwaha Mulungu, u Mulungu wenyu, yakumupelenyi, kanyhi ho musume kujendelela kwikala mu yisi yiyo.

²¹ “Na lono mweza kumuzenjela Muwaha Mulungu, u Mulungu wenyu, cikumbicilo, mulece kuwika kanyhi ne cihwani ce libici co mulungu we cicekulu Ashela ha mhelo ye cikumbicilo.

²² Kanyhi mulece hamba kwiyinulila lisumbili lye libwe, ho mulihembe. Hambi Muwaha Mulungu, u Mulungu wenyu, nha siyakwendezwa nazo.”