Wukumbucize wo Wulajilize 11 - Luganuzi Luswanu Kuli Wanhu Wose 2002

U wuwaha wo Muwaha Mulungu

¹ “Mumwendaje Muwaha Mulungu, u Mulungu wenyu, kanyhi mweze mugebate ne malajilizo gakwe nhondo zose.

² Kanyhi izuwali mukumbucile zo Muwaha Mulungu zono mweyijiza mu mikalile yenyu. Kanyhi yo nyenye nyo weneco, hamba si wana wenyu yaye, wono waziwona zizo. Anye mwawuwona u wuwaha wo Muwaha Mulungu, hamonga ne vilungo vyakwe, no wusume wakwe,

³ ne mapoto gakwe. Kanyhi mwawona na vyono yanoza kuli Falawo mutemi we Misili, na kuli yisi yakwe yose.

⁴ Kanyhi mwawona na vyono Muwaha Mulungu yalyongomezeza lukulu lipuga lye wasilikale wa Misili, hamonga ne zifwalasi zawo ne matuka gawo go wulugu, lono yagagubiciziza mwi'lenga lya Shamu, lono wamutyatyajenyi mu nyuma yenyu.

⁵ Kanyhi mumanyile manyi manyi, zono Muwaha Mulungu yamutendelenyi, lono mwali mukali mu nyika, lono mukali nafika bahano.

⁶ Na zono yawatendela ha mwande ye wanhu wose, Datani na Abilamu, i wana we cilume wa Eliyabi wo mulango wa Lubeni. Wono yisi yahama, yikawamela, hamonga ne wagolece zawo ne wana wawo, ne mahema gawo, ne wetumami wawo, ne zimitugo zawo.

⁷ Heya, nanye yo nyenye mono mwaziwona zizi zose zi mbaha, zono Muwaha Mulungu yazituma.”

U wumoteswe wa mu yisi yono wehuwizwa

⁸ “Holeka mugebataje malajilizo gose gono nakondya kumulonjelenyi izuwali. Ho mosuma kulilowoka likolongo no kuyisola yisi yono muyilindiye kuyitema.

⁹ Kanyhi ho mosuma kwikala vilo vinji mu yisi yo moso, yisi yono Muwaha Mulungu yawehuwiza walezi wenyu hamonga ne wana wawo, vyono kowapela.

¹⁰ Ne yisi yiyo yono moyisola no kwikala mumo, si yinha yisi ya Misili yaye, yono mwekalaga katali, yisi yono mwahadikaga zimbeyu, hanyuma kanyhi muwa kutuga mulimo muwaha wo kuzimwajilila malenga mu migunda yenyu.

¹¹ Ninga yisi yono mokwinjila muyiteme, yo yisi ye vigongo ne malolo, yo yisi yono yitonyelwaga malenga ge mvula ya ku wulanga.

¹² Nayo Muwaha Mulungu u Mulungu wenyu, yo kayilanjililaga nhondo zose, ku wulawilila mwamulizo wo mwaka, sunga ko ku ndumo kanyhi yo mwaka.

¹³ “Holeka munojeye mugebate muno muno i malajilizo gono nakondya kumulonjelenyi izuwali. Mumwende Muwaha Mulungu, u Mulungu wenyu, mumwitumamile kwe zinhumbula zenyu zose.

¹⁴ Na hono mwitume nhavivyo, nayo komutonyezezenyi mvula mu yisi yenyu, mu cidaha cayo, mvula ye mhinga ne mvula ye mafuso, ho mududule wuhemba wenyu, ne divayi yenyu, hamonga ne mafuta ge mizeyituni yenyu,

¹⁵ ne mahanze gono mozilisa mitugo zenyu. Nanye mowa mwina ndigwa nyinji muno, mu nghango nha vyono mosaka nyenye.

¹⁶ Holeka mwiyilanjililaje muno muno ho mulece kumuleka Muwaha Mulungu, no kuhemba milungu yinji, no kuyitumamila.

¹⁷ Na hono mwijelele mumulece Muwaha Mulungu, ale mumanye, vyono Muwaha Mulungu nayo, komukolelwenyi likuwo muno muno. Koyiwusa mvula, ne yisi yenyu yonyala yiwe nghavu, yono si yosuma kanyhi kulela zindigwa. Hamba yiwe yisi yeneco swanu muno, yono Muwaha Mulungu yakumupelenyi. Nanye mofwila mumo.

¹⁸ “Holeka mugakamise malajilizo gaga mu zinhumbula zenyu na mu mitima yenyu. Mugawope mu zimhukumhuku ze miwoko yenyu, na ha ciligati ye meso mu vihanda vyo wusu wenyu, viwe nha citanjilo co kumukumbucizenyi nhondo zose.

¹⁹ Kanyhi muwejize ne wana wenyu. Mweze kuziduwila ze malajilizo gaga, lono muli mu zikaya zenyu, hamba lono muli hanhu ho hose, hamba lono mucehile, hamba lono muli mu milimo yenyu.

²⁰ Mugandice sunga na mu zi fulemu ze milango ye zikaya zenyu, sunga na mu malango genyu ge zi luwa zenyu.

²¹ Holeka anye, ne wana wenyu, mokwikala vilo vinji, mu yisi yono Muwaha Mulungu, u Mulungu wenyu, yawehuwiziza i walezi wenyu, nha vyono kowapela. Na mbeka, mokwikala mu yisi yiyo vilo vinji du muno, nha vyono vinha vilo vyo wulanga wono wuli mucanyha ye yinze.

²² “Holeka, mugebate ko wihuwilwa, i malajilizo gose gono nakondya kumulonjelenyi. Mumwende Muwaha Mulungu, u Mulungu wenyu, kanyhi mwitume zose zono yakumulajilizenyi mwitume. Kanyhi mweze wehuwilwa kuli mwene.

²³ Holeka nayo kogawinga makungugo gago gose hali'nye. Nanye moyitema yisi yiyo ye makungugo gago mawaha, kanyhi gali vilungo si nha nyenye.

²⁴ Ne hanhu ho hose hono luzayo lwenyu lohakanyaga, baho howa heza henyu nyenye. Ne mipaka ye yisi yenyu, yowa yilawiliye ku wulawa ku nyika, ku lubavu lwa kutakama, sunga mu matunda ga Lebanoni ku lubavu lwa kusumuka. Kanyhi ku wulawilila he kolongo lya Efulata, ku lubavu lwa kucilima, sunga ko kwi'lenga lya Meditelaneya ku lubavu lwa kumwezi.

²⁵ Ne hanhu ho hose hono mowa kukolela mu yisi yiyo, u Muwaha Mulungu, u Mulungu wenyu, kowanoza wanhu wose wamogopenyi, nha vyono yehuwiza. Kanyhi howa hasina hamba munhu mono kosuma kwijelela hali'nye, yamwimilenyi.

²⁶ “Alu nane izuwali, nghumulecenyi mwihagulile nyo weneco, hono mokwenda wulugute, hamba mokwenda wulijitwe.

²⁷ Hono mugebate malajilizo go Muwaha Mulungu, u Mulungu wenyu, gono nghumulonjelenyi izuwali, ale, molugutwa.

²⁸ Ninga hono mulece kugebata malajilizo gaga, kanyhi muwuye ne nyuma muwe kuyihemba milungu yo wulambi, yono si mwayihembaga katali, ale mumanye, vyono molijitwa.

²⁹ “Nayo Muwaha Mulungu, kolo yakondya kumwinjizenyi mu yisi yono moyisola yiwe yenyu, mowa munojeye muziganule zo wulugutwe, mu wulawa mwi'tunda lya Gelizimu. Nazo zo wulijitwe, muziganule mu wulawa mwi'tunda lya Ebali.

³⁰ (Ne matunda gagano mejete, gali ku lubavu lwa ku mwezi ye likolongo lya Yoludani, mu yisi ye Wakanani, wono wekaye mwi'lolo lye likolongo lya Yoludani. Matunda gago, gali ku lubavu lwa kumwezi, hamba si gali kutali yaye ne mibici ya Mole.)

³¹ Nanye molowoka likolongo lya Yoludani, no kuyisola yisi yono Muwaha Mulungu, u Mulungu wenyu, yakumupelenyi. Na kolo mwayisola, mwekala mumo,

³² mugebataje no kugakamisiza lukulu i malajilizo gono nghumulonjelenyi izuwali.”