Danyeli 9 - Luganuzi Luswanu Kuli Wanhu Wose 2002

Danyeli yakuwalombela wanhu wakwe

¹ Na mu mwaka mulongozi wo wutemi wa Daliyo, u mutemi we Wababiloni, wo lulelo lwe Cimedi, u mwana wa Ahasuwelo.

² Nene Danyeli, nasomaga mu vitabu i visiwanulwe, akuno nghwihwesa ze myaka makumi mupunghati yono Yelusalemi yolowa yili mu wongomezwe, vyono Muwaha Mulungu yamulonjela muwizi Yelemiya.

³ Nane nghamulomba Muwaha Mulungu ko winenenyhezi, nghaleka kulya, nghavwala magunila, nghawa kwikala mu mavu.

⁴ Nghamulomba Muwaha Mulungu, u Mulungu wangu, nghawunena u wubi we wanhu wangu. Nghalomba nghatya, “Gwe go Muwaha Mulungu, yo gwegwe Muwaha, nase cikogopile gwegwe du. Nagwe wibate ne cilagane cako, kanyhi wuli lusungu kuli wono wakwendile, no kwituma zono kulajilizaga.

⁵ “Ase cetuma wubi, kanyhi cili wabi, cituma nghani 'mbi muno. Hambi nha cazilema zinzila zako, cakondya kuzileka ne ziswanu zono wacilajila.

⁶ Hamba si cawahuliciza sunga ne wetumami wako wawizi, wono wayilonjelaga nghani yako mwi'tagwa lyako kuli watemi wetu, na kuli walongola wetu, na kuli walezi wetu, sunga na kuli likungugo lyose.

⁷ Gwe go Muwaha Mulungu, agwe yo gwegwe mono kwitumaga nhondo zose ze ling'ani. Ninga ase yo ciyiletelaga cevu nhondo zose sese co weneco du. Na yiyi yo nghani ya mbeka kuli sese wose mono cikaye mu Yuda na mu Yelusalemi, sunga na kuli Waisilayeli wose, wono waweyagaziza mu ma'si ge behi na go kutali, vyono wali si wehuwilwa kuli'gwe.

⁸ Sunga ne watemi wetu, hamonga ne walongola wetu, sunga ne walezi wetu, wose wetuma nghani za cevu no kwituma wubi hali'gwe, go Muwaha Mulungu.

⁹ Ninga agwe, wuli lusungu, kanyhi wuli munenezi, hamba ciwe ase cakondya kukugaluka no kukuleka.

¹⁰ Nagwe go Muwaha Mulungu, go Mulungu wetu, lono wacilonjelela nha vyono, yicinojeye mikalile yetu, yityatye nha vyono winha wulajilize wako wono wacipelela muli wetumami wako i wawizi, ninga ase hamba si cakuhuliciza yaye.

¹¹ Ne Waisilayeli wose, wakondya 'lu kuwubena wulajilize wako, hamba si wakuzityatya kanyhi yaye zono wawalonjela. Holeka ase cili wasutyi du hali'gwe, na ku soko yiyo, holeka nagwe wukaciletela malijito gose gago gono mandice mu Wulajilize wa Musa, u mwitumami wako.

¹² Hambi 'gwe nha wakondya lu kwituma zono watya vyono kocitendela 'se, hamonga ne walongola wetu. Wukayilipiciza Yelusalemi kwe magazo mawaha gono gakali hamba si gananozwa mwi'kaya linji lyo lyose mono yinze yiyi.

¹³ Wukucilipiciza ko wulipicizwe wose, wono wukulongwa mu Wulajilize wa Musa. Ninga hamba nhavivyo, 'gwe go Muwaha Mulungu, go Mulungu wetu, nase cikali napituka, ciwulece wubi wetu hamba kuyityatya i mbeka yako, ho cikwendeze gwegwe.

¹⁴ Gwe go Muwaha Mulungu, go Mulungu wetu, wali wiwikanize wucilipicize, na vyo wanoza. Hambi 'gwe nha kwitumaga ze ling'ani nhondo zose. Ninga ase hamba kukuhulika yaye.

¹⁵ “Gwe go Muwaha Mulungu go Mulungu wetu, agwe walajila vilungo vyako, wukawawusa wanhu wako mu yisi ya Misili, ne vilungo vyako vikali vikumbuciywe. Ase mbeka cikusutizya, kanyhi cikuwuvumila wubi wetu.

¹⁶ Agwe wacidima mu vilo vyono vipulute, holeka cikukunena, wulece kuyikolelwa likuwo Yelusalemi. Hambi nha lye 'kaya lyako, litunda lyako lyono lyelile. Hambi i wanhu wose we ma'si gono gacipilime, nha wakuyihosa Yelusalemi, hamonga ne wanhu wako, ku soko yo wubi wetu, hamonga no wubi we walezi wetu wono wetuma.

¹⁷ Holeka 'gwe go Mulungu wetu, nghukunena wuhulice wulombe wangu, hamonga no wunene wangu. Nghukunena wuyinozeleze Nyumba yako, yono yali yakondya kuhodangwa. Wuyinozeleze, ne wanhu wose ho wamanye vyono agwe yo gwegwe go Mulungu.

¹⁸ Holeka nghukunena wucihulicize 'gwe go Mulungu, wucilanje, wuwuwone no wugaye wetu vyono cikugaya, ne magazo ge likaya lyono walicemela litagwa lyako. Nase cikukulomba, hambi nha cimanyile vyono agwe wuli lusungu, si cikukulomba vyono ase cituma ze ling'ani yaye.

¹⁹ Gwe go Muwaha Mulungu, cikukunena wucihulice. Gwe go Muwaha Mulungu, wucinenele wubi wetu. Gwe go Muwaha Mulungu, wucihulice, kanyhi wucipele zono cikukulomba. Na mu nzila yiyo, wanhu wose ho womanya vyono wuli Mulungu. Holeka wulece kutinya yaye! Hambi likaya lili nha lyako du gwegwe, hamonga ne wanhu wono wali mugati yalyo.”

Gabuliyeli yakulolosa Wuwizi

²⁰ Nane Danyeli, nghajendelela du kulomba, nghunena wubi wangu, hamonga no wubi we wanhu wangu Waisilayeli, no kumulomba u Muwaha Mulungu, u Mulungu wangu yayinozeleze Nyumba yakwe.

²¹ Na lono nali nghali njendeleye mu wulombe wangu, hodu yu yulya Gabuliyeli mono namuwona mu wugubulilwe wangu wulongozi, yakawa kuza yaguluce, yakatima hono nali nimile. Ne madaha gago, gali go madaha go kulavya vilavywa vye makumbiko ge cinyamihe.

²² Ale, Gabuliyeli, yakandoloseza yakatya, “Gwe Danyeli, ane nghuziza, ho nghutaze, wuwizuce wuwizi.

²³ Wukumbuciye vyono lono wanziza kumulomba Mulungu, nayo yakakupitula. Mwene yakwendile, holeka niza ho nghulonjele lipitulo lyakwe kuli'gwe. Holeka nghukunena wuhulicizaje muno, lono neza kukuloloseza wugubulilwe wuwo.

²⁴ “Mu myaka makumi mupunghati kali mupunghati, wo wutali we cipango cono Mulungu yaciwika, co kuwimila wubi, hamonga ne masutya, muli wanhu wako na mwi'kaya lyako lyono lyelile. U wubi wolonenelwa, ne ling'ani ye cibitilila yolotema. Na mwi'pango lilyo, u wugubulilwe hamonga no wuwizi, ho vilawa vya mbeka. Ne Nyumba yo Mulungu nayo, yilasiwanulwa.

²⁵ Holeka wuzimanyaje zizi, kanyhi wuzizuce, vyono ku wulawilila mu madaha lono u wulajilize wulalajilizwa, nha vyono Yelusalemi yizengwe kanyhi, sunga mu mapango gono kolokuziza u mulongola muwaha u muhagulwa wo Mulungu, yolowa yakondya kupuluta majuma mupunghati. Na Yelusalemi mu madaha gago, yolowa yakondya kuzengwa wupya, hamonga ne mabalabala gayo, yolowa yakondya kuzenjelwa sunga ne magomawakali gono gali vilungo. Nayo yolokondya kuzengwa mu majuma makumi mutandatu na nyejete. Ninga i vilo vivyo, vyolowa vilo vyo wugaye.

²⁶ Na ku ndumilizo ye vilo vivyo, u mulongola muhagulwa wo Mulungu, kolowulagwa mbula soko. Nalyo likaya hamonga ne Nyumba yo Mulungu, vyolokongomezwa ne wasilikale wo mutemi we vilungo. Nayo ndumilizo yolokuza nhe lihwazi. Kanyhi wolokuza wulugu hamonga ne magazo, vyono Mulungu yakondya kuviwikaniza.

²⁷ Nayo mutemi yuyo, kolokwilumbaniza ne wanhu, myaka mupunghati. Na kolo vikupuluta nusu ye vilo vivyo, kologawusiza lukulu makumbiko, hamonga ne vilavywa. Ne Nghani yo Wogofye muno, yolowikwa mu cizuli ce Nyumba yo Mulungu, nayo yolokwikala baho, sunga lono kolokuziza mono yayiwika baho, vitang'anile no wongomele wono Mulungu yakondya kumuwajila.”