Danyeli 8 - Luganuzi Luswanu Kuli Wanhu Wose 2002

Wugubulilwe wa Danyeli we Nduwilu, ne Mhene

¹ Na mu mwaka we kadatu wo wutemi wa Belishaza, nghawona wugubulilwe wunji kanyhi.

² Na mumo mu wugubulilwe wuwo, nghewona nili mwi'kaya lya Susa, lya mu yisi ya Elamu lyono lipilimwe ne majinji. Nane nali nimile he 'kolongo lya Ulayi.

³ Na lono nali nili baho he kolongo lya Ulayi, nghawona nduwilu yono yina mahembe matali muno mejete. Na muli mahembe gago, limonga lyali yitali si nhe liyagwe, kanyhi lyali yipya, lyono lyacindika lono liyagwe lyali lyakondya kucindika.

⁴ Nane nghawa niyilanjiliye nduwilu yiyo, yikucinya ne mahembe gayo ku lubavu lwa kumwezi, na kusumuka, na kutakama. Ninga hamba nhavivyo, hali hasina nimu hamba monga, yono yasuma kuyimila, hamba kwiponya mu vilungo vye nduwilu yiyo. Langa yetuma nha vyono yali yendile yeneco, yikekumya mu nhumbula yayo yeneco.

⁵ Na lono nali nghali kwihwesa nghani yiyi nhunizo yayo nyhici lo. Hodu hobaho mvulati nghali yikawa kuza yifunyhile, yikulawilila ku lubavu lwa kumwezi, yali yimanyhile muno muno, sunga ne migulu yayo hamba si yapamizaga hasi yaye. Nayo mvulati yiyo, yali yina yihembe lyono lilawiye haciligati ye meso gayo.

⁶ Ale, du, mvulati yiyo yikawa kuza yihutile, yikawa kubita kono ko yili nduwilu yono nayiwona yimile behi ne likolongo, yikayitowanga nduwilu yiyo kwe vilungo muno muno.

⁷ Nane nghawa vyo niyilanjiliye mvulati yiyo du, vyono yikuyitowanga nduwilu. Mvulati yiyo yali yina yikuwo yiwaha, yikagabenanga sunga ne mahembe gagalya mejete ge nduwilu. Nayo nduwilu yali yisina vilungo, si yasuma hamba kwitaza bwete ng'o. Holeka yikagumilwa ho hasi no kukanyanjizwa, hakawa hasina hamba munhu mono kosuma kuyiponya yaye.

⁸ Nayo mvulati, yikedunhumula muno muno, na ku soko yo widunhumuzi wayo, lihembe lyayo likawa kubeneka.

⁹ Ninga hamba nhavivyo, likacindika kanyhi yihembe linji lidodo, mwi'hembe limonga lya muli gagalya mahembe mane. Ne vilungo vyayo vikatandala sunga ko ku lubavu lwa kutakama, no lubavu lwa kucilima, sunga ko ku yisi swanu muno.

¹⁰ Naco cihembe cico, cikawiluka muno, cikawa ne vilungo vyo kwihoma ne lipuga lya ku wulanga, nha cinji, zinyelezi, sunga likazigumila zinji ho hasi, likazikanyaga.

¹¹ Hamba nhavivyo, likamwavufya u Muwaha we lipuga lya ku wulanga, likemila sunga ne vilavywa vye makumbiko ge nhondo zose, vyono wamulavizyaga, likayihodanga ne Nyumba yo Mulungu.

¹² Na baho ha Nyumba yo Mulungu, i wanhu wakahanoza hakawa hanhu ho kwitumila wubi. Hakawa si hanhu kanyhi ho kulavizya vilavywa vye makumbiko vye nhondo zose. Wanhu wakawuleka sunga no wuhembi we mbeka. Lihembe lilyo likasuma kwituma nghani yo yose yono lyeneco lyasakaga kwituma.

¹³ Hanyuma yayo, nghahulika malayika yakumuwuza malayika muyagwe, yakutya, “Alo zizi zono zijeye mu wugubulilwe, ho zojendelela sunga nili lo? Hamba wuwu wubi wono wukuwimila u wulavye we makumbiko, nawo wojendelela sunga nili? Ma, lipuga lya ku wulanga nalyo, hamonga ne Nyumba yo Mulungu, navyo ho vyojendelela kukanyanjilwa sunga nili?”

¹⁴ Nghahulika malayika muyagwe nayo yakupitula yakutya, “Nghani zizi, zojendelela du, sunga vipulute vilo elufu monga na yigana limonga na makumi mahano. Na mu vilo vivi vyose, howa hasina wulavye we vilavywa vye makumbiko ge hakali mitondo ne cinyamihe. Ale, Nyumba yo Mulungu nhondo, ho yokwezwa.”

Malayika Gabuliyeli yakulolosa zo Wugubulilwe

¹⁵ Nane nghasaka ho manye nhunizo yo wugubulilwe wuwo, na kumbe munhu yunji yakema nhinicizo ha mwande yangu.

¹⁶ Hanyuma kanyhi nghahulika lizi likucema ku nhumbi ye likolongo lya Ulayi, likutya, “Agwe Gabuliyeli, wumulolosezaje yuyo nhunizo ya zono yaziwene.”

¹⁷ Nayo Gabuliyeli yakawa kuza kwima behi nane. Ninga 'ne nghenjilwa no woga wuwaha muno, nghagwa ho hasi. Nayo Gabuliyeli yakanonjela yakatya, “Gwe go munhu, ale wuhulicizaje wuyimanye nhunizo yayo. Wugubulilwe wuwu, wukulajila ze ndumilizo ye yinze.”

¹⁸ Ninga lono yali yakali kulonga, ane nghagwa hasi nghawa kuzilika. Ninga mwene yakanyibata, yakanyinula, yakasimya nghema ne magulu gangu.

¹⁹ Hanyuma yakajendelela kutya, “Ane nghukulajila ze likuwo lyo Mulungu, vyono lyolowa linha mu vilo vya ku ndumo. Hambi wugubulilwe wuwo, nha wukulajila zono zolowa ku vilo vya ku ndumo.

²⁰ “Alu, yiyilya nduwilu ye mahembe mejete yono wuyiwene, yiyo, wo wutemi wo Wumedi na Pelisiya.

²¹ Nayo mvulati yiyo, wo wutemi wo Wugiliki. Nalyo lihembe lyono lili haciligati ye meso, yo mutemi mulongozi.

²² Nago i mahembe mane gono gacindice lono lihembe lilongozi libeneceye, wo watemi wane wono wololawa mwi'kungugo limonga lyono lyologawanuka, kanyhi lyolowa lisina vilungo nha vyono wutemi wulongozi wono wali wina vilungo.

²³ “Na lono mudumo we watemi wawa wuwe wasejelela, na kolo wakondya kusocela ho walipicizwe, ale baho ho holowa no mutemi mono kolowa yasina cihuliko, kanyhi mulambi, kanyhi mono kolowa yena mikalile ye cakacaka.

²⁴ Nayo kolowa ne vilungo, kanyhi kololeta wongomele wuwaha, kolomoteswa muli zose zono kolowa kwituma. Kolowongomeza i wanhu we vilungo, hamonga ne wanhu wo Mulungu.

²⁵ Kanyhi mwene vyono musugu, holeka kolomoteswa na mu zinzila zakwe zose zo wulambi. Kolowa mwidunhumuzi, kanyhi kolowongomeza wanhu wenji wono wali wazoweye kwikala wapolile. Kanyhi kolokwihoma no Mutemi we watemi. Ninga hamba nhavivyo, kolobenanjizwa, na holowa hasina munhu wo kumutaziza.

²⁶ Nawo wugubulilwe wono wawona we vilavywa vye makumbiko ge cinyamihe, na ge hakali mitondo, azo za mbeka, nazo zolowa nha vyono wali wakondya kulolosezwa. Ninga agwe wuzikamisaje du mu nhumbula yako, hambi nha zosola vilo vinji muno muno sunga ho zize zificilicile.”

²⁷ Nane Danyeli, nghakalala muno so zizo, nghatamwa no kutamwa vilo vinji muno. Nali neza kutuga ciba, nhondo ho nghawa kubita kuwituma mulimo wangu wono mutemi yali yamhelile niwe kuwituma. Ninga hamba nhavivyo, nghawizina muno wugubulilwe wuwo, nane si nasuma hamba kuwizuka yaye.