Danyeli 6 - Luganuzi Luswanu Kuli Wanhu Wose 2002

Wuhile wubi wo kumuwulaga Danyeli

¹ Daliyo yakawona viswanu yawawice walongola, yigana limonga na makumi mejete, ho webate wulongola mu wutemi wakwe.

² Muli wawo kanyhi, yakawahagulila Danyeli na wanji wayagwe wejete, wawe walanjilizi we walongola wawo wanji, ho wawe kulavya liwalo kuli mwene Danyeli ne wayagwe, ho sawo yo mutemi yilece kwajilila.

³ Danyeli yakalajila witumami wuswanu kuciza wawaha wayagwe, hamonga ne walongola. Na vyono yalajila milimo miswanu kuciza wayagwe, ku soko yiyo, mutemi yakawona viswanu yamunoze yawe yo muwaha mu wutemi wakwe wose.

⁴ Hobaho i walongola, hamonga ne wawaha, wakalondola nzila yo kuluhodanga lukumyo lwa Danyeli mu mulimo wakwe. Ninga si wasuma, hambi Danyeli nha yali mwihuwilwa, kanyhi siyetumaga nghani 'mbi hamba yisutya lyo lyose.

⁵ Holeka wakalongana weneco wose wakatya, “Nye hamba si cosuma kutuga nghani yo yose 'mbi muli mwene ho cimusonjeze, langa hono cilondole nghani yono vidomile no wulajilize wo Mulungu wakwe.”

⁶ Hobaho wakekonghola, wakabita kuli mutemi, wakamutya, “Gwe go Mutemi Daliyo, wuwumipe cibitilila!

⁷ Ase wose mono cikulongoza mu wutemi wako, co walanjilizi, ne walongola ne walamuzi, ne wanyamhala wa mu matumbi, na wose wono wena wulajilize na wose wa mu wulongola wuwu, cilumbaniza vyono, Agwe go mutemi, yikunojeye wulavye wulajilize, kanyhi wuwutyatilile viswanu. Alu wulavye lilajilizo wutye, mu vilo makumi madatu, kusina munhu mono kosuma kulomba nghani yo yose kuli mulungu yunji, hamba kuli munhu yunji wo wose, langa hono si kwako du gwegwe go mutemi. No munhu wo wose mono kobena wulajilize wuwo, yimunojeye yagumilwe mu mhango yono yimemile zisimba.

⁸ Holeka 'lu, 'gwe mutemi, wulavye lilajilizo lili, wuliwicile ne citanjilo ho liwe ne vilungo, lilece kukawanika, nha vyono winha wulajilize we Wamedi ne Wapelisiya wono si wukawanikaga.”

⁹ Lulo Mutemi Daliyo yakawuwicila citanjilo wulajilize wuwo.

¹⁰ Nayo Danyeli yali yeza kumanya vyono lilajilizo lilyo lyawicilwa ne citanjilo, yakawa kubita ku kaya yakwe. Na mu cinyumba ca kucanyha ku golofa ya mu kaya yakwe, cali cina madilisha gono vyali vidomile na Yelusalemi. Baho, yakafugama ha madilisha ge nyumba yakwe, vyono gali gali mwazi, yakamulomba Mulungu nghanghulo yidatu kwe zuwa, nha vyono yali yazoweye.

¹¹ Nawo i walugu wa Danyeli, wali weza kumuwona yakumulomba Mulungu wakwe,

¹² hodu wakekongholela wose hamonga, wakatuluka kumusonjeza Danyeli kuli mutemi, wakatya, “Gwe mutemi, wawicila citanjilo mwi 'lajilizo, vyono, mu vilo makumi madatu kweze kusina munhu wo wose mono komulomba mulungu yunji, hamba munhu yunji, hono si kuli 'gwe du. Na hono yejele munhu mono si kokamisa lilajilizo lili, yuyo yagumilwe mu mhango yono yimemile zisimba.” Mutemi yakawapitula yakawatya, “Heya, ne lilajilizo vyo likutya, vyono wulajilize we Wamedi ne Wapelisiya si wukawanikaga.”

¹³ Hobaho wakamulonjela mutemi wakamutya, “Danyeli yumonga wa muli wahamywa ku wulawilila Yuda, hamba si yakuwukumya wuwaha wako, hamba kuwibata no wulajilize wono walavya. Mwene kamuhembaga du Mulungu wakwe, nghanghulo yidatu nhondo zose.”

¹⁴ Lo lulo lulo mutemi yali yeza kuzihulika zizi, yakakalala muno muno, yakalondola nzila yo kumuponya Danyeli. Yakajendelela kuyilondola nzila, sunga ne lizuwa likaswa.

¹⁵ Hanyuma wanhu wawa, wakamuziza kanyhi mutemi, wakawuza wakamutya, “Gwe mutemi, wumanyile manyimanyi nha vyono, u wulajilize no wutemye we Wamedi na we Wapelisiya, wono wakondya kuwikwa no mutemi, vyono si wukawanikaga yaye.”

¹⁶ Hobaho mutemi yakalajiliza vyono Danyeli yebatwe. Hobaho Danyeli yakawa kwibatwa, yakagumilwa mu mhango ye zisimba. Mutemi yakamulonjela Danyeli yakamutya, “Ale, u Mulungu wako mono kumwitumamilaga nhondo zose, yo yuyo mono kokuponya.”

¹⁷ Hobaho, u mulomo we mhango wukawa kudindwa ne libwe yiwaha muno. Nayo mutemi, yakawa kutajila citanjilo cakwe mweneco, hamonga na ce wawaha wakwe mucanyha ye libwe, ho munhu wo wose yalece kuza no kumuponya Danyeli.

¹⁸ Hobaho mutemi yakawa kuwuya ku kaya yakwe yo wutemi, ninga mu cilo cico, siyagona nhongo yaye, hamba kulya ndigwa, hamba cinji co cose co kumusindamika.

¹⁹ Mutemi yakelawa hakali mitondo muno muno, yakabita ku mhango.

²⁰ Yaza kufika ha mhango, yakacemeleza ko wukalale yakutya, “Danyeli, 'gwe go mwitumami wo Mulungu mumi! Wule, u Mulungu mono kumwitumamilaga kwe cogopo muno muno, kasuma kukuponya mu zisimba?”

²¹ Danyeli nayo yakamupitula yakamutya, “Gwe mutemi wuwumipe cibitilila!

²² Mulungu kandetela Malayika mono kazidinda milomo zisimba, ho zilece kuhawanga. Kanoza nhavivyo, vyono kawona ane sina yisutya lyo lyose kuli mwene, hamba kuli'gwe, go mutemi.”

²³ Mutemi yakasangalala muno muno, yakalajiliza wamulavyanize Danyeli mu mhango. Hobaho wakamulavyaniza Danyeli kunze. Nayo Danyeli vyono yali yamwihuwiye Mulungu, yakejela yasina hamba nghomele yo yose mu muwili wakwe.

²⁴ Lo lulolulo mutemi yakalajiliza webatwe, wawalya wose wono wamusonjeza Danyeli. Nawo wali weza kwibatwa, wakagumilwa wose mu mhango ye zisimba hamonga ne wagolece zawo, ne wana wawo. Nazo zisimba zikawahawanga no kuwabenanga mafupa gawo lono wali wakali hamba sinafika kusi ye mhango.

²⁵ Baho mutemi Daliyo, yakawandicila baluwa zinghungugo zose, ne zimbeyu zose, na we milonjele yose ya kono'nze, yakawatya, “Mulamu kuli 'nye!”

²⁶ Nene Daliyo, nghumulajilizenyi anye wose wa mu wutemi wangu, vyono wanhu wose, munojeye mumogope no kumupela cogopo Mulungu wa Danyeli. “Mwene yo Mulungu mumi, Mono kolotema cibitilila. No wutemi wakwe, siwulahodanjika yaye, ne vilungo vyakwe sivyoloduma yaye.

²⁷ Mwene kaponyaga no kudima, ketumaga mapoto no wizine ku wulanga na kono'nze. Kamuponya Danyeli, yalece kuwulagwa ne zisimba.”

²⁸ Nayo Danyeli yakamoteswa muno, mu vilo vyo mutemi Daliyo na Kulo u Mupelisiya.