Danyeli 3 - Luganuzi Luswanu Kuli Wanhu Wose 2002

Nebukadineza yakulajiliza wanhu wose wacihembe cihwani ce Zahabu

¹ Mutemi Nebukadineza yakanoza cihwani ca zahabu, cono cali cina wutali wa mita makumi mejete na mupunghati, no wugazi wa mita yidatu. Yakacisimya mwi'lolo lya Dula, mwi'tumbi lya Babiloni.

² Baho mutemi yakalajiliza i wetumami wakwe wose, wekongholele hamonga, i watemi, ne walongola, ne watazi wawo, na wose wono wena wulajilize, ne wawaha we mahala, ne walamuzi, ne wakamisa viwutwa, hamonga ne wahakimu, ne walongola wose wa mu matumbi, waze ha wusiwanulwe we cihwani cico, cono Nebukadineza yacisimya.

³ Na lono walongola wose wali wamema, so wusiwanulwe, wemile ha mwande ye cihwani,

⁴ hobaho munya kulalika yakawalonjela wanhu kwe yizi 'waha yakatya, “Anye nyo wanhu we zinghungugo zose, na we zi ndelo zose, na we milonjele yose.

⁵ Mohulika lizi lye ndulele ne filimbi, ne masumbi, ne mazeze, ne ndonondo, ne vidananda ne mihilimo yose ye masumbi, yono yowa yityatizye. Vyono mulilo wuwo wukwanza du, yinojeye anye wose mwiname ho hasi, mucihembe cihwani cono mutemi Nebukadineza yacisimizye.

⁶ No munhu wo wose mono sikokwinama no kucihemba cihwani cico, munhu yuyo kogumilwa mwi'lambi lyo moto wono wukwaka muno muno.”

⁷ Ale, lo lulo lulo wakahulika masumbi galila, wanhu wose wakenama no kucihemba cihwani ce zahabu, cono mutemi Nebukadineza yacisimizye.

Wanduguze wadatu wa Danyeli wakusitakwa

⁸ Hobaho wanji wa muli Wababiloni, wakawa kwanza kuwasonjeza Wayahudi.

⁹ Wakamulonjela mutemi Nebukadineza wakamutya, “Gwe mutemi wikale cibitilila na cibitilila.

¹⁰ Gwegwe go mutemi walavya lilajilizo, vyono, hono munhu wo wose yahulice lizi lye ndulele, ne zifilimbi, ne masumbi, ne sinjila ne ndonondo ne vidananda ne mihilimo yose ye masumbi vyeza kutowa, yimunojeye yafugame hasi, no kucihemba cihwani ce zahabu.

¹¹ Na muli wose mono sikofugama no kucihemba cihwani cici, yimunojeye yagumilwe mwi'lambi lyo moto.

¹² Alu ko wali wanji wa muli Wayahudi, wono wuwawicile nha walongola mu yisi ya Babiloni, Shedilaki, Meshaki na Abedinego wono sunga nalu wakuwubedegala wulajilize wako gwe go mutemi. Siwakusaka kumuhemba mulungu wako, hamba kufugama ha cihwani cono wacisimya.”

¹³ Lo lulo lulo Mutemi Nebukadineza yakakolwa ne likuwo muno muno, yakawa kulajiliza wa walya wanhu wadatu, waletwe ha mwande yakwe.

¹⁴ Yakawawuza yakawatya, “Shedilaki, Meshaki na Abedinego, ati zizi za mbeka, vyono anye mukulema kumuhemba mulungu wangu, no kucifugamila cihwani ce zahabu cono nacisimya?

¹⁵ Ale, 'lu, hono muhulice mililo ye zindulele, ne zifilimbi, ne masumbi, ne mazeze, ne zindonondo, ne vidananda, hamonga ne mihilimo yose ye masumbi, hobaho mufugame no kucihemba cihwani. Hono mulece kunoza nhavivyo, mowopwa no kugumilwa mwi'lambi lyo moto. Mukwihwesa 'lo ko yuli mulungu yunji mono komuponyenyi?”

¹⁶ Shedilaki, Meshaki na Abedinego wakamupitula wakamutya, “Gwe mutemi, ase sicokwilewela co weneco.

¹⁷ Langa u Mulungu wetu mono cikumuhemba, yo kosuma kucitaza mwi'lambi lyo moto, hamonga na mu vilungo vyako.

¹⁸ Na hono yalece kucitaza, ninga wutemi wako wumanye, vyono mbeka, ase sicosumila lukulu kumuhemba mulungu wako hamba si cocifugamila ne cihwani cako ce zahabu cono wacisimya.”

Wanduguze wadatu wa Danyeli wakuling'anizwa kufwa

¹⁹ Baho Nebukadineza yakakolwa ne likuwo muno, no wusu wakwe wukakununghala, yakawakolelwa likuwo yiwaha Shedilaki, Meshaki na Abedinego. Hobaho yakawalajiliza wanhu wakwe wonjeleze zingwagu, moto wuwe mukali muno kali mupunghati, kuciza vyono wakaga vilo vyose.

²⁰ Baho yakawalajiliza wanhu wakwe, iwasilikale wo wulugu, wono wali wali vilungo muno muno, wawawope wanhu wa walya i wadatu no kuwagumila mwi'lambi lyo moto wono wakaga.

²¹ Hobaho wakawawopa, nawo wali wavwalile viswanu zishati, ne zikanzo ne zikofiya, wakawa kuwagumila mwi'lambi lyo moto wono wukwaka hamonga na vyose vyono wali wavwalile.

²² Kanyhi na vyono mutemi yali yalavya lilajilizo, nha vyono moto wonjelezwe muno muno, malambi-lambi gayo, gakawanyanya no kuwawulaga awalya wasilikale, wono wawagumila Shedilaki, na Meshaki, na Abedinego, mwi'lambi lyo moto.

²³ Lulo Shedilaki, Meshaki na Abedinego, wali vyo wawopwe du, wakagumilwa haciligati ye lilambi lyo moto.

²⁴ Mu cipango cico, Nebukadineza yakenuka mwi'goda ko wizine wuwaha. Yakawawuza wetumami wakwe yakawatya, “Mwene mbeka ciwawopa wanhu wadatu, ciwa kuwagumila mwi'lambi lyo moto?” Wakamupitula wakamutya, “Heya, vyo citendile gwe mutemi.”

²⁵ Kanyhi yakawatya, “Alu nhawule nghuwona wanhu wane, wono wakujendajenda mu moto? Kanyhi hamba siwawopwe yaye, hamba siwakulajila vyono watamiswe. No muyawo we kane, yakwijela kotya nha malayika.”

Shedilaki, Meshaki na Abedinego, wakulavyanizwa mu moto no kupegwa wuwaha

²⁶ Hobaho Nebukadineza yakenuka yakasejelela behi no moto, yakacemeleza kwe vilungo yakatya, “Shedilaki! Meshaki! Na Abedinego! Wetumami wo Mulungu mumi! Mulawile muze kuno!” Nawo wakalawaniza lwa kamonga.

²⁷ Lulo, wose wa mwi'kulu, ne walongola wa mu matumbi, na wose wono wena wulajilize, hamonga ne wetumami wanji wose wo mutemi, wakekongholela hamonga, ho wawalanje wanhu wawa i wadatu wono hamba si watamiswe no moto yaye. Zimvwili zawo hamba sizatakamila, ne myenda nayo siyatakamila, hamba kutuga munungho du bwete we lyosi mu miwili yawo.

²⁸ Mutemi yakatya, “Yalumbwe Mulungu wa Shedilaki, Meshaki na Abedinego! Hambi nha kamutuma Malayika wakwe, kawaponya wawa wanhu wakwe, wono wakumwitumamila no kumwihuwila. Walema malajilizo gangu, wawa kwisuza wumi wawo. Wawona ciba wafwe, si nho kumuhemba mulungu yunji, langa Mulungu wawo du.

²⁹ Alu nane nghulajiliza vyono, munhu wo wose wa mu nghungugo yo yose, hamba wa mu lulelo lo lose, hamba wa mu milonjele yo yose, mono kolonga nghani yo yose yimbi kuli Mulungu wa Shedilaki na Meshaki na Abedinego, munhu yuyo kodumulwa vipiligwa piligwa, ne kaya yakwe yonozwa yiwe 'tongo. Ku soko nha kusina Mulungu yunji mono kosuma kuponya nhavivi.”

³⁰ Lulo Mutemi yakawonjeleza lilumbo lyawo wa Shedilaki, Meshaki na Abedinego, wawe wawaha mu matumbi ga Babiloni.