Amosi 9 - Luganuzi Luswanu Kuli Wanhu Wose 2002

Wuling'anizi wo Muwaha Mulungu

¹ Nane namuwona Muwaha Mulungu yemile ha cikumbicilo. Yakanyitya, “Wutowe mu midumo ye masumbili gono gawukamizye wuhembelo, ne likumbo lyose lyosinjisika. Nagwe wugabenanjize no kugaleka gawagwile wanhu mu mitwe ye wanhu. Ne wanhu wono wasigaye ku wulugu ane nolowawulaga no mumaje. Hasina hamba munhu monga mono yalatiga, hamba yumonga mono yalapona muli wene.

² Hamba wahimbe nzila zawo hasi, sunga zifice ko ku yinze ye wafu. Ane nowebata du. Hamba wabite ko ku wulanga, ane nowatimya hasi.

³ Hamba nha wehundice ku cizuli ce litunda lya Kalimeli, ane nowalondola sunga niwebate. Hono wehundice mu visolo vye lilenga, nolilajiliza lilimu liwaha lya mwilenga liwalume.

⁴ Na hono wasolwe wawopwe ne walugu wawo, nowalonjela wawo walugu wawo wawawulaje. Nane hamba si nowataza yaye, anga ndumuye nghani niwongomeze du.”

⁵ Muwaha Mulungu we mihanga kayipamizaga yisi, nayo yinze yiwa kucicima, na wose wono wekaye mumo wolila. Ne yinze yose yolokwibuka no kug'welela kotya nhe likolongo lye Nile ku Misili.

⁶ Muwaha Mulungu kazengaga wikalo wakwe ku wulanga, no kuwika misinji yo mwanya mono'si. Mwene kacemaga malenga ge lilenga no kugakupa mu'si, Muwaha Mulungu, lye 'tagwa lyakwe!

⁷ Muwaha Mulungu yakutya, “Nye nyo Waisilayeli, ane nghuwehwesa wanhu wa Etiyopiya, nha vyono nghumwihwesenyi nyenye. Ane nawatonga Wafilisiti, ku wulawa ku Kilete, nawo Waashuli, ku wulawa ku Kili, nha vyono namutonjenyi 'nye ku wulawa ku Misili.

⁸ Nane yo nene Muwaha Mulungu, mono nghuwulanga wutemi wa Isilayeli, wono wina wubi, nane nowongomezeza lukulu mono yinze. Ninga hamba nhavivyo si nolongomeza lulelo lose lwa Yakobo.

⁹ “Langa nolavya wulajilize no kuwapemenha wanhu wa Isilayeli, nha vyono wapemenhaga wuhemba mu luheneko. Nowapemenha wene, ku wulawa mu makungugo, no kuwawusa wose wono wasina cambuzi.

¹⁰ Na wanyo wubi wa muli wanhu wangu, wolowulagwa ku wulugu, na wose wono wakutya, ‘Mulungu sikoleka zimbi zicagane.’ ”

Mhonelo yono yowaziza Waisilayeli

¹¹ Muwaha Mulungu yakutya, “Lizuwa likuza lyono ane nolowusimya wutemi wa Dawudi, wono winha kaya yono yigwiye so wongomezwe. Nolonozeleza majinji gose gono gamwaguka, no kugasimya kanyhi. Noloyizenga no kuyinoza yiwe nha vyono yali katali.

¹² Holeka wanhu wa Isilayeli, wolowatema i wanhu wono wali wasigaye mu yisi ya Edomu, na wa muli makungugo gose wono ku wulawa ha mwamulizo wali wangu.” Vyo yakutya Muwaha mono kolozinoza zizi zijele.

¹³ Muwaha Mulungu yakutya, “Ivilo vikuza. Lono vilimwa vilawiluka musunho kuciza mu nghango yono vyowa vyisumice ku wududule ne zizabibu zolowiluka mbela mbela kuciza mu nghango yono divayi yikusuma kunozwa, ne matunda golosuluza divayi swanu, ne vigongo vyose vyolosipa divayi.

¹⁴ Nane nolowagomola wanhu wangu sunga ko ku yisi yawo. Wolozenga makaya gawo gono gahodangwa no kwikala mumo, wolopanha migunda ye mizabibu no kung'wa divayi wolopanha migunda no kulya vilimwa vyono walimile.

¹⁵ Nane nolowagomola no kuwawika wanhu wangu, mu'si yono nawapela, hamba si wolowuswa kanyhi yaye.” Muwaha Mulungu, u Mulungu wenyu, vyo yakutya.