Amosi 8 - Luganuzi Luswanu Kuli Wanhu Wose 2002

Wulajilwe we kane: Nhoto ye mikalo

¹ Kanyhi nghalajilwa ku wulawa kuli Muwaha Mulungu we mihanga. Muli wuwo nghawona nhoto yono yina mikalo.

² Muwaha Mulungu yakambuza yakatya, “Amosi, wukuwona cici?” Nane nghamupitula nghatya, “Nghuwona nhoto ye mikalo.” Muwaha Mulungu yakanyitya, “U mudumo we wanhu wangu Isilayeli, wakondya kuza. Nane sinokawaniza yaye wuhile wangu wo kuwongomeza wene.

³ Na mwi'zuwa lilyo zinyimbo za mu kaya yo wutemi, zolowa vililo vyo wusungu wuwaha. Ne miwili ye wanhu wono wafwiye, yolowa yiyagaye caka hanhu hose. Hamba lizozo si lilahulikwa yaye.”

Mulungu koyongomeza Isilayeli

⁴ Muhulicize zizi anye mono mukuwewonela i waciwa, no kujela kuwongomeza i waciwa wa mu'si.

⁵ Mukutya nyo weneco, “Colindila sunga kolo vyapuluta i vilo vye ndawo yo mwezi, ho cosuma kuguza vilimwa vyetu. Alu sabato yomalika nili nase ho cisume kwanza kuguza kanyhi? Hambi baho nha colosuma kuguza na kumhelo, mu nzila yo kwitumila vipimo vyo wulambi, no kuvipitula vipimilo, ho ciwahizize wanyo kugula.

⁶ Na baho ho colosuma kuguza ngano yono si swanu ko wuguzi wuwaha. Nase comutuga munhu muciwa, mono sikosuma kulipa mugawa wakwe, hamba kulipa wuguzi we vilatu bwete, nase baho comugula yawe muwanda.”

⁷ Muwaha Mulungu we Waisilayeli yelahiza yakutya, “Hamba sinosemwa i metumo gawo mabi.

⁸ Na ku soko yiyo, holeka yisi yocicima, ne wanhu wose wa mu'si yose, wowa mu wugaye. Ne yisi yose yolosinjisika; yolokwibuka no kung'welela, nhe likolongo lye Nile ku Misili.

⁹ I cipango cikuza lono nilanoza lizuwa ligwile, lono yikali misi. Ne yisi yolotukuwala mwi'zuwa lilyo. Nene, no Muwaha Mulungu vyo nghutya.

¹⁰ Nolopitula zi sikukuu zenyu ziwe wukalale, ne zinyimbo zenyu ze nyemo ziwe cililo no wusungu. Nolomunozenyi munyonyole mitwe yenyu, no kuvwala magunila. Nanye molowa nha walezi wono wakulila so mwana wawo monga we cilume. Ne lizuwa lilyo, lyolowa lya wusungu sunga ko ku mudumo wayo.

¹¹ “Ne cipango cikuza lono nilaleta nzala mu'si, wanhu wolowa na nzala, ninga si nzala ya ndigwa, kanyhi wolowa na nyhilu, ninga si nyhilu ya malenga. Langa wolowa na nzala ne nyhilu so nghani yono yikulawa kuli Muwaha Mulungu. Nane yo nene no Muwaha Mulungu mono nghutya.

¹² Ne wanhu wolopilima-pilima, ku wulawa kwi'lenga alino sunga ko kwilenga alino, na kanyhi, ku wulawa lubavu lwa kusumuka, sunga ko ku lubavu lwa kucilima, wolomangha no kubita ako na ako wakuyilondola nghani yo Muwaha Mulungu, ninga hamba siwalayituga ng'o.

¹³ Mwi'zuwa lilyo wazelelo ne wahinza waswanu, wolozilika so nyhilu.

¹⁴ Na wono welahilaga vihwani vye milungu vye Samaliya, wono watezaga, ‘Ko mulungu wako Dani,’ hamba, ‘Ko mulungu wa Belisheba!’ Wanhu wawo wologwa, na hamba si wolokwinuka kanyhi yaye.”