Amosi 6 - Luganuzi Luswanu Kuli Wanhu Wose 2002

Wongomele we Waisilayeli

¹ Yolowa nghani ya kogofya muno, kuli 'nye mono mwina mikalile miswanu nhavi mu Siyoni, na kuli nye mono mukwihwesa nha mwikaye mupolile mu Samaliya, anye mo wanhu wawaha mu nghungugo mbaha ya Isilayeli, anye mono wanhu wa Isilayeli wakuwa kumuzizenyi wakulondola wutazi kuli'nye!

² Mubite mulanje ta mwikaya lya Kaline. Hamba mwi'kaya liwaha lya Hamati, sunga ko kwi'kaya lya Gati, mu yisi ye Wafilisiti. Wulenyi, wena cinji cono cicizize wutemi wa Yuda na Isilayeli? Hamba yisi yawo, wuwaha wayo wucicize yisi yenyu?

³ Anye mono si mukwenda kuvumila vyono lizuwa libi lyokuza, ninga zizo zono mukwituma, zo zikulisejeleza behi lizuwa lilyo.

⁴ Magu, 'mba yolowa wogofyeci kuli'nye, mono mukugona mu vitanda vyenyu vye cinyemo-nyemo vyono vihambigwe ne meno ga nhembo, akuno mukulya zisikukuu ze zinyama ze zing'ombe, hamonga na ze zingholo za mwi'tewa!

⁵ Anye mono mwendile kutula zinyimbo, nha vyono Dawudi yanoza, no kwimba hamonga ne mazi ge masumbi.

⁶ Anye mono mukung'wela divayi mu zibakuli, hamonga no kwibaka mafuta ge mhunjile swanu muno muno, hamba simukulila so wongomezwe we Waisilayeli.

⁷ Holeka mowa walongozi kubita ku wuhamywe. Ne zisikukuu zenyu, hamonga ne indigwa ze cinyemo-nyemo, vyose vyoloduma.

⁸ Muwaha Mulungu we mihanga yo yacipelile wulajilize wo wukagwe, yakutya, “Nane siniwendile widunhumuzi we wanhu wa Isilayeli. Kanyhi nizibedegaye muno ne zikaya zawo ze cinyemo-nyemo. Holeka nowapela walugu wawo likaya lyawo liwaha hamonga ne vinhu vyose vyono vili mumo.”

⁹ Nahono hawe ho wali wanhu yikumi wono wasigaye mu mhuga, nawo wolofwa.

¹⁰ Na munya ndugu wo munhu mono yafwiye, hamonga no mwimilizi we maziko, kolo wakuwulavya muwili wa malehemu kunze ye kaya ho wakawuzice, wolokwamula waceme, kuli mono yakali yasigaye mukaya wawe kutya, “Wule ko yuli munhu yunji mono yakali yasigaye hamonga nagwe mumo mu kaya?” Ne lizi lyopitula litye, “Aa! Ng'o.” Nayo munya ndugu kotya, “Hodu wanyamale twii! Hambi nha yicinojeye cilanjilile cilece kulitambula litagwa lyo Muwaha Mulungu.”

¹¹ Lono Muwaha Mulungu yakulavya lilajilizo, zinyumba zimbaha ne zindodo obenanjika tici tici.

¹² Wule! Zifwalasi zomangha mu canyha ye matalawe? Ma! Wanhu walimaga ne zing'ombe mwi'lenga? Ninga anye mwayipitula ling'ani, yawa sumu, ne mbeka nayo yawa yisutya.

¹³ Anye mono mukwilumba so wibata likaya lya Lodeba, mukwilumba mukutya, “Ase cali cili vilungo, lanje vyono cikasuma kulisola likaya lya Kalinayimu.”

¹⁴ Ninga Muwaha Mulungu we mihanga mweneco yakutya, “Anye nyo Waisilayeli, ane nowaleta wasilikale we likungugo lye cijenzi, wayisole yisi yenyu, nawo womugazenyi wulawa ku Hamati ku winjililo wa kusumuka, sunga ko ku cikolongo ca Alaba, mhelo ya kutakama.”