Amosi 5 - Luganuzi Luswanu Kuli Wanhu Wose 2002

Cililo ca Amosi

¹ Muhulicize anye nyo Waisilayeli, lwimbo lwe maziko, lono nghumwimbilenyi!

² U Mwana we cicekulu wa Isilayeli yakondya kugwa. Hamba sikokwinuka kanyhi! Yakondya kulekwa yagwiye hasi, Hasina hamba mono yakumwinusa.

³ Holeka Muwaha Mulungu yakutya, “Iikaya lya mu Isilayeli, lyotegula wasilikale elufu monga, ninga wowuya igana limonga du. Ne likaya linji nalyo, lyotegula wasililale yigana limonga, ninga wowuya yikumi limonga du.”

⁴ Muwaha Mulungu yakuwalonjela Waisilayeli, yakutya, “Muze kuli'ne, nanye mowumipa.

⁵ Mulece kubita kanyhi kuhemba ku Belisheba. Hamba mulece kujela kunondola ku Beteli. Hambi Beteli nha yolokwambuka bwete. Hamba mulece kubita ku Giligali, hambi wanhu wayo nha wolosolwa wategulwe ku wuwanda.”

⁶ Mumubitilaje Muwaha Mulungu, nanye mowumipa. Ninga hono mwikale simumubitiye, mwene komukongojezenyi ne likuwo lyakwe nha moto nyo Waisilayeli. Moto wolowanyanya ne wanhu wa Beteli, hasina hamba yunji mono kolosuma kuwuzimya.

⁷ Woyi he kuli'nye. Anye mono muyikawaniza ling'ani no kuwawusiza wanhu ling'ani yawo!

⁸ Muwaha Mulungu mono yanoza zinyelezi ne cilimila ne mwacinghunghu. Kapitusaga citi ciwa wuzelu, ne misi ciwa cilo. Kacemaga malenga ga mwi'lenga no kugamwaga kunze mu yisi litagwa lyakwe Muwaha Mulungu.

⁹ Kaletaga wuhodanjice muli wawaha, na muli wanhu wawo we vilungo.

¹⁰ Anye wanhu mumusulile mono kawatacilaga wono si wali ling'ani, mono kulongaga mbeka yose ha mahakama.

¹¹ Mukuwatema i waciwa no kuwahiziza wuhemba wawo. Na ku soko yiyo nanye simokwikala mu zikaya ziswanu zono muzenjile ne mabwe maswanu, hamba kung'wa divayi yono yikulawa mu zizabibu zenyu ziswanu zono mulimile.

¹² Hambi nane nha manyile vyono wubi wenyu wukogofya hamonga ne masutya genyu vyono menji, gono muwituma. No kuwewonela wanhu we ling'ani. Mukubocela mafupo, no kwimila i ling'ani ye waciwa, yono wakuyituga mu mahakama.

¹³ Holeka, u wukanganizi wa mu vidaha vye zimbali, yo nghani swanu muno ku witume.

¹⁴ Munoze wuhile wenyu, wuwe kwituma zono zili ling'ani, hamba si zimbi yaye, holeka mokwikala womi. No Muwaha Mulungu we mihanga, kowa hamonga nanye nha vyono mwihuwiye, vyono, mwene yali baho.

¹⁵ Musule zimbi, mwende ziswanu no kwituma ze ling'ani mu mahakama. Nha lunji Muwaha Mulungu we mihanga kowa no lusungu kuli wanhu we likungugo lili, wono wakali wasigaye womi.

¹⁶ Holeka Muwaha Mulungu we mihanga yakutya, “Kolowa kocili cililo co wusungu, mu zinzila za mwi'kaya. Na wono wakulima, wolocemwa waze wamulilile mono yafwiye, hamonga na wawo wono wakulipwa ho walile citalo.

¹⁷ Kolowa na cililo mu migunda yose ye mizabibu. Azi zose zolokwijela ku soko, ane nghuza nimuling'anizenyi.” Vyo yakutya Muwaha Mulungu.

¹⁸ Wolowa wogofye wuwaha kuli'nye mono mukusulumila lizuwa lyo Muwaha Mulungu! Kolowa kowuli wuswanuci kuli'nye mwi'zuwa lilyo? Hambi kuli'nye nha lyolowa lizuwa lye citi, hamba si lya wuzelu yaye.

¹⁹ Yolowa nha munhu mono yakumangha yakutiza simba, no kwitang'anila ne dubu! Hamba yolowa nha munhu mono yakwinjila mukaya, no kwegamika muwoko mwijinji, nzoka yiwa muluma!

²⁰ Lizuwa lyo Muwaha Mulungu, lyololeta citi hamba si wuzelu yaye. Lyolowa yizuwa lya wutitu wuwaha, lyono lisina hamba wuzelu bwete.

²¹ Muwaha Mulungu yakutya, “Ane singhwendezwa ne zi sikukuu zenyu zo wuhembi, hamba sinosuma kuzikangalila yaye!

²² Hamba mundavizye vilavywa vinyanye na vyo 'saje, ane sinovibocela yaye, sinozibocela hamba ne zimitugo zenyu zono zijinile zono mukundavizya.

²³ Mulece kunzozeza 'ne, ne zinyimbo zenyu, nane singhusaka kuwuhuliciza hamba no mulilo we masumbi genyu.

²⁴ Langa muwulece wiling'ano wuhulume kotya muvwilo, ne ling'ani kotya likolongo lyono silinyalaga.

²⁵ Anye nyo Waisilayeli, ane sinasaka makumbiko ne vilavywa vyenyu, lono nawalongoza mu nyika mu myaka makumi mane.

²⁶ Alu ninga vyono mwavihemba ivihwani vye milungu vya Sakuti, mulungu wo mutemi wenyu, no mulungu wa Kayiwani, mulungu we nyelezi, molosoleleza vihwani vivyo,

²⁷ kolo neza kumutegulenyi ku wuwanda, ku nhumbi ya Damesiki,” vyo yakutya Muwaha Mulungu, mono litagwa lyakwe, Mulungu we Mihanga.