Amosi 4 - Luganuzi Luswanu Kuli Wanhu Wose 2002

¹ Hulicizenyi zizi, anye nyo wacekulu wa Samaliya, mono mujinaga nhe zing'ombe za Bashani, mono mukuwatendela vibi wono wasoceye, no kuwewonela i waciwa, no kusaka walume zenyu wamupelenyi wujimbi we mawala gose mung'we.

² Nha vyono Muwaha Mulungu mono yelile, yelahiza yakatya, “Lizuwa lyolokuza lono nolomukwejenyi ne ndobogo, na wose muli nyenye molowa nha somba mu cilowelo.

³ Nanye molokwegwa sunga behi na hono hamwaguywe mwi'jinji no kutagwa kunze.”

Waisilayeli walemegwa kwiyijiza

⁴ U Muwaha Mulungu yakutya, “Nye nyo Waisilayeli, ale, mubite hanhu hono helile mu Beteli muketume wubi, hono muwe munojeye! Mubite sunga sunga ko ku Giligali, muketume zo wubi mu nghango yono mukusaka nyenye nyo weneco. Kanyhi mujendelele ku wuleta nhondo zose hakali mitondo mitugo zenyu so likumbiko. Kanyhi nhondo zose mwi'zuwa lye kadatu, mweze kulavya zaka.

⁵ Mujendelele no kulavya mikate yenyu yo wulumbize kuli Mulungu, no kwilumbila mu vilavya vyono vizize ko winji vyono mukuleta! Ayi yo nghani yono anye mwendile kwituma.

⁶ “Nane yo nene mono naleta nzala mu makaya genyu gose, ninga hamba simwambuyila yaye.

⁷ Nane nghayimila mvula yilece kuvitonyela vilimwa vyenyu lono vilimwa vyayisakaga muno. Nghayitonyeza mvula mwi'kaya ali, na linji nghalizumha. Mvula yikatonya mu mugunda awu, ninga mugunda muyagwe wono vihegame, wukanyala.

⁸ Wanhu wakasocela so nyhilu, wanhu we makaya ganji wakabita mwi'kaya linji lyono wakwihwesa wotuga malenga, ninga hamba kuko kwali kusina gono gakukondya ku wung'we. Hamba nhavivyo si mwambuyila yaye.

⁹ “Nghayileta mbeho, yivinyaze vilimwa vyenyu. Ne zinzije zikalya migunda yenyu yose ne mizabibu, mikuyu yenyu hamonga ne mizeyituni. Ninga hamba simwambuyila yaye.

¹⁰ Nghamuletelenyi lihuhuji kotya nha lyono nategula ku Misili. Nghawawulaga i wazelelo wenyu ku wulugu, no kuzisola zifwalasi zenyu. Nghamevya munungho we mivimba ye wanhu wono wafwiye mu zimhula zenyu, mu zinghambi zenyu. Ninga hamba simwambuyila yaye.

¹¹ “Nghawahodanga wanji muli'nye, nha vyono nayihodanga Sodoma na Gomola. Wawo wono wasigala muli'nye, wakawa nha cibici cinyanywe, cono ciponile ku wulawa mu moto. Ninga hamba simwambuyila yaye.” Vyo yakutya Muwaha Mulungu.

¹² “Holeka anye nyo Waisilayeli, nane nomulipicizenyi. Holeka vyono nomunozezenyi zizi, ale nanye, mwiwikanizaje kuwitang'anila no wuling'anizi wangu!”

¹³ Mulungu yo yanoza matunda no kuwumba mbeho. Mwene kaganozaga mahweso gakwe, gamanyice kuli munhu. Kakawanizaga misi ciwa cilo, no kuhakanyaga hono henuce mu yinze. Ali lyo litagwa lyakwe, Muwaha Mulungu mono yali vilungo!