Amosi 3 - Luganuzi Luswanu Kuli Wanhu Wose 2002

¹ Muhulicizenyi nghani ayi, anye nyo wanhu wa Isilayeli yono Muwaha Mulungu yayilonga kuli'nye, anye nyo we likungugo lyose lyono yaliwusa ku Misili yakatya,

² “Muli makungugo gose ga mono yinze, ane nghamumanyenyi nyenye no kumukamisenyi. Na yiyi yo yikuleka no wubi wenyu wukuwa wakogofya. Holeka nane yinojeye nimulipicizenyi so masutya genyu.”

Mulimo wo muwizi

³ Alu 'mbi wanhu wejete wosuma kujendana hamonga muhinzo lono siwalagane?

⁴ Hambi simba yikolomaga bwete du mu mbago, lono si yitujile mhelembo? Hamba nyana ye simba yikolomaga mu mwina wayo, lono si yibate cinji?

⁵ Hamba ndeje yigwilaga 'mbi mu cidoga, lono cidoga cisina cikocezo? No mutego nawo ma, wutegukaga 'mbi lono siwuteguywe na cinji?

⁶ Hamba ndulele yo wulugu ma, yotowa mu kaya, wanhu walece kogopa? Hamba nghani 'mbi ma, yosuma kwinjila mwi'kaya lono Muwaha Mulungu si yayitemizye?

⁷ U Muwaha siketumaga cinji co cose lono siyawagubuliye wetumami wakwe wawizi.

⁸ Lono simba yikukoloma, nani 'mbi mono si kebatwaga no woga? Na lono Muwaha yakulonga, alo nani mono kosuma kuleka kuyiganula inghani yakwe?

Wongomezwe wa Samaliya

⁹ Muwalonjele wawo wono wekaye mu makaya go wutemi, ge Misili na Ashidodi, muwatye, “Mwihangulize hamonga mu matunda gono gayipilime Samaliya nanye mowona wusagahale hamonga no wubi wono wukwitumwa mumo.”

¹⁰ Muwaha yakutya, “Wanhu awa, wakumevya mu zinhumba zawo vinhu vyo wuhizi no wuwulaji, hamba siwakumanya vyono yiwanojeye wawe wehuwila.

¹¹ Holeka walugu woyipilima yisi yawo, no kugahodanga magomawakali gawo, no kuwaboka makaya gawo.”

¹² Muwaha Mulungu yakutya, “Nha vyono mudimi kakugaga magulu mejete, hamba yikutu lye ngholo yono yaligwa ne simba, nhavivyo vyo wosigala wacefu du muli wanhu wa Samaliya, wono wakugona mu vitanda vye cinyemo-nyemo.

¹³ Alu muhulicize, mukawakaje wo lulelo lwa Yakobo zo yakutya, Muwaha Mulungu u Mulungu we Mihanga.

¹⁴ Mwi'zuwa lyono nolowalipiciziza wanhu wa Isilayeli so wubi wawo, nolovihodanga vikumbicilo vya Beteli. Ne zinhuzi zose ze cikumbicilo vyose zolobenangwa no kuga hasi.

¹⁵ Nane nolozihodanga zinyumba ze madaha ge cinyuli na ze madaha ge livuce. Ne zinyumba zo wihambo we meno ge zinhembo, zolokongomezwa ne zikaya zose zimbaha, zolohodanjicila lukulu.”