Amosi 2 - Luganuzi Luswanu Kuli Wanhu Wose 2002

Mowabu

¹ Muwaha yakutya, “Wanhu wa Mowabu, wetuma wubi kali kenji, na ku soko yiyo, nane nowalipiciza. Hambi nha si wali na cogopo kuli mafupa go mutemi wa Edomu, wene kwa kuganyanya wagatakamiza sunga gakawa mavu.

² Nane notegula moto mu yisi ya Mowabu, no kugatakamiza makaya ga keliyoti. Ne wanhu wa Mowabu wolofwa ku soko ye nyhinyinho ne lizozo lyo wulugu lono wasilikale wolowa wakuzoza, hamonga ne mazi ge zindulele.

³ Nane nolomuwulaga mutemi wa Mowabu, hamonga ne walongola wose we yisi.”

Yuda

⁴ Muwaha yakutya, “Wanhu wa Yuda, wetuma wubi kali kenji na ku soko yiyo, nane nowalipiciza. Hambi nha wehepa mafundo gangu, hamba siwebate ne malajilizo gangu. Hambi nha wakondya kwajiliza so wutyatye milungu yo wulambi yono wasogo zawo wayitumila.”

⁵ Holeka nane notegula moto kuli Yuda, no kuganyanya makaya ga Yelusalemi.

Uling'anizi wo Mulungu kuli Isilayeli

⁶ Muwaha yakutya, “Wanhu wa Isilayeli, wetuma wubi kali kenji nane ku soko yiyo, nowalipiciza. Wawaguza ku wuwanda iwanhu wehuwilwa wono siwasuma kulipa migawa yawo, i wanhu waciwa wono si wali wasumile kulipa hamba uguzi wa malatu.”

⁷ Wakuwewonela wanhu wono wasoceye, na wono wasina wutazi, no kumwivyajiza nzila muciwa. U munhu no sogwe, wose wakuhanga kugona no muhinza yumonga muwanda no kulyavufya litagwa lyangu lyono lyelile.

⁸ Ne hanhu ho hose hono wakuhembela, wakuyigonela myenda yono wayisolile kulawa kuli waciwa, yono wayipinjice so migawa yawo. Mu wuhembelo wo Mulungu wawo wakung'wa divayi yono wayisolile kulawa kuli wawo wono wawadayaga mapesa.

⁹ “Holeka, 'nye nyo wanhu wangu, ku soko yenyu, yo yaleka nane nghawongomeza lukulu Waamoli, wanhu wono wali watali kotya mibici ye mihagata, kanyhi we vilungo kotya mibici ye minghola.

¹⁰ Nane nghamuwusenyi mu yisi ye Misili, nghamutonjenyi mu nyika myaka makumi mane, kanyhi nghawa kumupelenyi ne yisi ya Waamoli yiwe yisi yenyu.

¹¹ Nghawahagula muli wana wenyu, wanji wawe wawizi, na muli wanhu wenyu iwazelelo, wanji wawe wanazili. Wulenyi, azi si zili mbeka, anye nyo wanhu wa Isilayeli? Ane no Muwaha Mulungu vyo nghutya.

¹² Ninga nye mwawanoza wanazili wang'we divayi, no kuwalajiliza i wawizi, walece kulonga zinghani zangu.

¹³ Holeka 'lu nane, nomusindanjilenyi ho hasi, nanye motulilwa nho mukokoteni wono wudinghuye wuhemba.

¹⁴ Hamba no munhu mumanyhi sikolotiga yaye, no munhu we vilungo kolowula, vilungo vyakwe, no musilikale sikolosuma kuponya wumi wakwe.

¹⁵ No munhu mugumi we zisonga, sikolokwima, no mumanyhi nayo sikolotiza, ne wanhu wa mu zifwalasi siwolotiga hamonga no wumi wawo.

¹⁶ Mwi'zuwa lilyo, sunga ne wasilikale we nhumbula ye cilume-lume, wolotaga vitwalo vyawo vyo wulugu, no kutiza.” Muwaha Mulungu vyo yakutya.