2 Zinghomo 9 - Luganuzi Luswanu Kuli Wanhu Wose 2002

Mutemi we cicekulu wa Sheba yakumubitila Solomona

¹ No mutemi we cicekulu wa Sheba, yaza kuzihulika zo lukumyo lo mutemi Solomona, hodu, yakawa kutuluka yakawa kubita ku Yelusalemi, yabite yakamujele mutemi Solomona mu mawuzo makamu. Na lono yabitaga, yakabitana hamonga ne watyatyi wakwe wenji muno, yakateguliza no muhalaka, ne vibwe vyo wuguzi wukamu muno, hamonga na zahabu nyinji muno. Na vivi vyose, vyali vipacizwe mu zingamiya. Nayo yali yeza kwiwona na Solomona, hobaho yakawa kumuwuza nghani nyinji muno mu nghango vyono yali yehwesize.

² Ninga nayo Solomona, yakamupitula nghani zose, hamba hasina nghani yinji yono yamulemela kuyipitula.

³ Nayo mutemi we cicekulu wa Sheba, yakagawona mahala ga Solomona, ne kaya yo wutemi yono yayizenjile.

⁴ Yakaziwona ne zindigwa zono yatenjelwaga ha meza, no wikalo wa wetumami wakwe hono wekalaga, no wityatye wa wetumami wa mwi'kulu, ne vivwalo vye milimo vyono wavwalaga, hamonga ne myenda yono wavwalaga i wetumami wono wamwitumamilaga ha zindigwa ze zisikukuu, na mu makumbiko gono yalavyaga mu Nyumba yo Mulungu. Yali yeza kuziwona zizo zose, yakezina muno muno.

⁵ Hobaho yakawa kumulonjela mutemi Solomona yakatya, “Kumbe zako zono hulikaga lono nili ku yisi yangu, hamonga na ze mahala gako, zose za mbeka!

⁶ Ninga ane, si nehuwilaga zono wanonjelaga, sunga nhondo niza kwiwonelela no mweneco ne meso gangu. Nalu nakondya kuwona vyono kumbe, nali nghali si nahulika hamba nusu bwete ze mahala gako. Kumbe 'gwe wina mahala menji muno, kuciza no wulonje wono wanhu wakulonga.

⁷ Holeka wamoti ne wanhu wono wakukwitumamila, wono wemaga ha mwande yako nhondo zose, wakukuhuliciza ze mahala gako!

⁸ Ale, Muwaha Mulungu, u Mulungu wako yalumbwe! Mono yakulajila vyono yendezwa nagwe, holeka yakawa kukunoza wuwe mutemi, wuteme mwi'tagwa lyakwe. Hambi nha yawendile wanhu wakwe Waisilayeli, nayo yakusaka yawakamise cibitilila. Nayo yakakunoza wuwe mutemi we Waisilayeli, ho wunoze ling'ani no wiling'ano.”

⁹ Hodu mutemi we cicekulu wa Sheba, yakawa kumupela Solomona, vipegwa vyono yamuletela, nha cinji kilo elufu yine za zahabu, no muhalaka mwinji muno, hamonga ne vibwe vyo wuguzi wukamu. Hamba hakali kanyhi si nawa no muhalaka wunji muswanu muno, nho muhalaka wono mutemi we cicekulu wa Sheba, yamupela mutemi Solomona.

¹⁰ (Ne wanhu wo mutemi Hulamu, hamonga na wo mutemi Solomona, wono waleta zahabu ku walawa ku Ofili, nawo waleteleza ne mibici yo musandali, hamonga ne vibwe vyo wuguzi wukamu.

¹¹ Mutemi Solomona yakayitumamila mibici ye misandali so wuzenjela ngazi ze Nyumba yo Mulungu, hamonga na likulu. Yakasesa masumbi hamonga ne zindonondo, ku so wembi. Na hakawa hasina kanyhi masumbi ne zindonondo zono zejela mu yisi ya Yuda, zono zali zihwanile zizo.)

¹² Nayo mutemi Solomona, yakamupela yuyo mutemi we cicekulu wa Sheba, vyose vyono yavisakaga. Hamonga kanyhi ne vinhu vyono wakakawana, kuli avilya vyono mwene mutemi we cicekulu wa Sheba, yamuletela Solomona. Hanyuma ya zizo, mutemi we cicekulu wa Sheba, hamonga ne wetumami wakwe, wakawa kuwuya kwawo ku yisi ya Sheba.

Sawo yo mutemi Solomona

¹³ Na mu mwaka na mwaka, mutemi Solomona yabocelaga zahabu kilo elufu makumi mejete ne'datu,

¹⁴ ku watowelele hamonga ne kodi yono walavyaga iwasuluza ne wakwawi. I watemi wa ku Alabiya, hamonga ne walongola we zisi ze Waisilayeli, wose wakamuletela Solomona zahabu na fweza.

¹⁵ Mutemi Solomona yakanoza ngula zimbaha zificile magana mejete, yakazihiliwa zahabu ya wuzito wa kilo mupunghati.

¹⁶ Kanyhi yakanoza na ngula zinji zi ndodo ndodo, zificile magana madatu, nazo yakazihiliwa zahabu ya wuzito wa kilo yidatu. Yakazisola zizo ngula zose, yakaziwika mu nyumba yono yacemelwa litagwa lya Nyumba ya mu Mbago ya Lebanoni.

¹⁷ Hanyuma kanyhi, mutemi Solomona yakanoza yigoda yiwaha lya mbali za nhembo, yakalihiliwa zahabu nengu.

¹⁸ Ne ligoda lilyo, likawa na ngazi mutandatu, zono zetumamilwaga, ho wuhaficile hono holili ligoda lyeneco. Kanyhi mu mhelo ye zingazi, mukawa na mbawo zo kwibata akuno na akuno, nazo hiliwe zahabu.

¹⁹ Kanyhi hakawa na hwani ya simba zono zali mbice zimile akuno na akuno. Na ku wulawilila baho, hakawa hasina kanyhi wutemi wo wose wono wali wina ligoda lyono lihwanile lilyo.

²⁰ Ne vikombe vyose vyo mutemi Solomona, vyali vya zahabu du, sunga ne vitumamilwa vyose vyono vyali vili mu Nyumba ya mu Mbago ya Lebanoni, vyose vyali vya zahabu nengu. Ninga fweza mu vilo vyo mutemi Solomona, yali si cinhu cono cikamile yaye.

²¹ Mutemi Solomona, yali yena ngalawa zono zabitaga ku Talishishi hamonga ne zingalawa zo mutemi Hulamu. Na mu myaka midatu, ngalawa zo mutemi Solomona, zaletaga zahabu, fweza, mbali za nhembo, ne zinyani, hamonga ne zindeje.

²² Nayo mutemi Solomona, yakagolipa muno muno, yakawa yo munhu we mahala menji si nho mutemi wo wose wa mono'nze.

²³ Na wose wakawa wakumuziza wakumuwuza wuza, no kumanya zo winji we mahala gakwe, gono Mulungu yamupelile.

²⁴ Na wose wono wamuzizaga, wamuletelaga ne vipegwa vye vinhu vye fweza, na vye zahabu, hamba vivwalo, ne vitwalo, na vye mhunjile swanu, ne zifwalasi, hamonga ne zinyumbu. Ne nghani yiyo, yajendelela mwaka na mwaka.

²⁵ Mutemi Solomona, kanyhi yali yena mabanda elufu yine go kuwicila matuka gakwe go wulugu, hamonga ne zifwalasi zakwe. Kanyhi yali yena ne wapanda zifwalasi, waficile elufu yikumi na nyejete. Wanji wa muli wawa, yakawawika mu Yelusalemi, na wono wasigala yakawawika mu makaya hayo hayo.

²⁶ Yakawa mutemi muwaha muli watemi wose wa mu'si, ku wulawa kwi 'kolongo lya Efulata, sunga ko ku yisi ye Wafilisiti, ko ku mupaka we yisi ya Misili.

²⁷ Na mu vilo vyo wutemi wakwe, fweza yali nha cinhu ca bwete du mu Yelusalemi, yikawa nha mabwe du. Ne mibici ye mihagata, nayo yali minji muno, yikawa nhe mibici ye mikuyu yono yili mu mwalambalo we matunda ga Yuda.

²⁸ Wakamuletela Solomona, zifwalasi ku wulawa ku Misili, na ku zi'si zinji.

Wulolose we ndumula, kuli zo wutemi wa Solomona

²⁹ Ne zinghani ze ndawililo yo Wutemi wa Solomona, ku wulawilila mwamulizo, sunga ko ku ndumo yakwe, zandicigwe mu citabu ce zinghomo za Natani muwizi, na mu wuwizi wa Ahiya munya Shilo, sunga na mu wugubulilwe wa Ido u muwizi, kanyhi mono yali na mu vilo vya Yelobowamu u mutemi wa Isilayeli.

³⁰ Solomona yatema Waisilayeli wose mu Yelusalemi, myaka makumi mane.

³¹ Solomona yakafwa, yakazikwa mwi'kaya lya Dawudi. Na Lehobowamu u mwanagwe, yakahala wutemi wakwe.