2 Zinghomo 8 - Luganuzi Luswanu Kuli Wanhu Wose 2002

I milimo yono yetuma Solomona

¹ Mutemi Solomona, yayizenga Nyumba yo Mulungu hamonga ne kaya yakwe yo wutemi, myaka makumi mejete, ho yakawa yakondya.

² Kanyhi yakagazenga sunga ne makaya gono mutemi Hulamu yamupela yakawenjiza Waisilayeli wekale mu makaya gago.

³ Yakayiteka yisi ya Hamati, ne yisi ya Zoba,

⁴ yakalizenjela ligomawakali likaya lya Palimila lya mu nyika. Yakagazenga ne makaya gose ga mu Hamati, wukawa wo wuwiko wakwe we viwutwa.

⁵ Mutemi Solomona, yakagazenga sunga ne makaya gaga gose gono getyatizye, Bete-holoni ya kucanyha, na Bete-holoni ya kusika, (yakagazenjela ne magomawakali makaya gose, yakawicila ne milango ho yiwe ne vidindilo.)

⁶ Hamonga ne likaya lya Baalati, ne makaya gose gono yali yawicile viwutwa, na mu makaya gose gono yali yaziwicile zifwalasi zakwe, hamonga ne matuka gakwe go wulugu. Yakawa yena mahweso go wuzenga vyono yasakaga mwene mu Yelusalemi, na mu Lebanoni, sunga na mu yisi yose yono yali yayitemile mwene.

⁷ Solomona yakawasola wanhu wose we Cikanani wono wasigala, wono si wo lulelo lwe Waisilayeli, wono Waisilayeli si wasuma kuwawulajila lukulu, lono wayisolela yisi yiyo, yakawenjiza mu witumami, wakawa wetumami mu yisi yakwe.

⁸ Ne wanhu wawa, wali wo Wahiti, Waamoli, Wapelizi, Wahivi, hamonga ne Wayebusi, na wawo wose, sunga ne wana wawo, wakajendelela kuwa wetumami wa mu yisi yiyo, sunga mu vilo vivi vye behi.

⁹ Ninga wene Waisilayeli, si wetumywaga nha wetumami, langa wene wetumaga milimo yo wusilikale, na yo wulongola, na yo wulanjilizi we matuka go wulugu, na yo wulanjilizi we wapanda zifwalasi.

¹⁰ Hali ho wali wanhu magana mejete na makumi mahano, wono wali wawicigwe wawe wo walanjilizi we wetuma milimo yose yo wuzenji, wono walanjililaga wuzenji wose we mazengo ge hayo hayo.

¹¹ Mutemi Solomona, yakamusola mugolece wakwe u mwana we cicekulu wo mutemi wa Misili, yakamuhamya mwi'kaya lya Dawudi, yakamwinjiza mu kaya yakwe yono yamuzenjela. Hambi nha yehwesa yakatya, “Si yowa viswanu mugolece wangu yekale mwi'kulu lya Dawudi u mutemi we Waisilayeli. Vyono ho hose hono lyowa liwicigwe Lisanduku lye cilagane, hanhu baho haweza helile.”

¹² Mutemi Solomona, yakamulavizya Muwaha Mulungu makumbiko, mu cikumbicilo cono yacizenga ha mwande ye Nyumba yo Mulungu.

¹³ Yakalavya vilavywa vinyanywe mu nghango nha vyono Wulajilize wa Musa wali wulajilize mu vilo vyose vyono vyelile. Yakalavya mu vye zi Sabato, na so sikukuu ze ndawo yo mwezi, na so zi sikukuu yidatu za mu mwaka, nha cinji, sikukuu ye mikate yono yisina cisase, ne sikukuu ye nhwanga, ne sikukuu ye vibanda.

¹⁴ Solomona, yakatyatya wityatye wono sogwe Dawudi yawuwika. Nayo yakayiwikaniza i milimo ye nhondo zose ye wakohani mu wiwalile wawo, hamonga na ye Walawi wono wawatazaga wakohani mu wimbe we zinyimbo, hamonga na mu witume we milimo yawo. Kanyhi yakawawikaniza i walindilizi we Nyumba yo Mulungu, mu hanhu hayo hayo, ho wasume kwituma viswanu i milimo yawo ye nhondo zose, yo wulindiliza milango, nha vyono Dawudi u munhu wo Mulungu yalajiliza.

¹⁵ Ne malajilizo gose gono mutemi Dawudi yawalajiliza wakohani, hamonga ne Walawi, kuli ze zinyumba zo kuwicila viwutwa, hamonga ne milimo yinji, wulajilize wuwo wose, wukafisilizwa.

¹⁶ Na mu mapango gaga, i milimo yose yono yali yayihwesize Solomona yayitume, nhondo yikawa yakondya. Ku lubavu lo wuzenji we Nyumba yo Mulungu, ku wulawa musinji wayo, sunga yikakondya yose, zose ziketumwa viswanu muno.

¹⁷ Na hanyuma ya zizo, Solomona yakabita ku Eziyoni-gebeli na ku Elati, ha mhwani ya Agaba, mu yisi ya Edomu.

¹⁸ Nayo mutemi Hulamu, yakamuletela magalawa mu miwoko ye wetumami wakwe. Ne wetumami wakwe wakajendela mwi'lenga, hamonga ne wetumami wa Solomona wakafika ku yisi ya Ofili. Nawo wakasola zahabu kuko ku Ofili zificile kilo elufu yikumi ne'hano, wakamuletela mutemi Solomona.