2 Zinghomo 7 - Luganuzi Luswanu Kuli Wanhu Wose 2002

Wusiwanule we Nyumba yo Mulungu

¹ Nayo mutemi Solomona yali yeza kukondya wulombe wakwe wuwo, hobaho moto wukatima wulawa ku wulanga, wukakongojeza makumbiko gose manyanywe, gono gali malavywe baho. Ne nhojo yo Muwaha Mulungu, yikamema mu Nyumba yo Mulungu.

² Hamba ne wakohani, si wasuma kwinjila mu Nyumba yo Mulungu, hambi Nyumba yo Mulungu, nha yali yimemile nhojo yo Muwaha Mulungu.

³ Nawo wanhu wa Isilayeli wali weza kuwuwona moto wukugwa wulawa ku wulanga, hamonga no wuzelu wamema mu Nyumba yo Mulungu, hobaho wose wakafugama hasi, no wusu wawo wukapamiza ho hasi, wakamuhemba Mulungu no kumulumba so wuswanu wakwe hamonga no wendo wakwe we cibitilila.

⁴ Hanyuma ya zizo, mutemi Solomona, hamonga ne wanhu wose, wakawa kumulavizya Muwaha Mulungu makumbiko.

⁵ Mutemi Solomona, yakalavya makumbiko, ng'ombe elufu makumi mejete na nyejete, hamonga na ngholo elufu yigana limonga na makumi mejete, vilavywa vyo mulamu. Hanyuma nhondo u mwene hamonga ne wanhu wakwe ho wakawa kuyisiwanula Nyumba yo Mulungu.

⁶ Nawo wakohani wakema i hanhu hono wali wawiciywe, nawo Walawi wakawa wedomilenawo, akuno, wakamukumya Muwaha Mulungu mu viya vyo kwimbila, vyono mutemi Dawudi yavilavya, wakwimba ne zinyimbo wakutya, “Lusungu, lwakwe lwikalaga cibitilila!” Nha vyono walajilizwa no mutemi Dawudi. Nawo wakohani wakazitowa zindulele ha mwande yawo, ne Waisilayeli wose wali wemile wima.

⁷ Mutemi Solomona, yakahasiwanula ha wuduwilo, wono wali haciligati, ha mwande ye Nyumba yo Mulungu. Hanyuma yakalavya ne vilavywa vinyanywe, ne vilavywa vyo wusaje hamonga ne mafuta ga mu vilavywa vyo mulamu. Nayo yanoza nhavivyo, vyono ci cilya cikumbicilo ce shaba cono yacinoza, cali cidodo muno, si cali cikwile ku wulavizya vilavywa vyose vivyo.

⁸ Nayo Solomona, hamonga ne wanhu wose Waisilayeli, wakayinoza sikukuu yiyi ye vibanda, vilo mupunghati. Na hakawa na wanhu wenji muno muno, wanji wali walawiliye kutali, ku Hamati Pasi, ku lubavu lwa kusumuka, na ku mupaka we yisi ya Misili, ku lubavu lwa kutakama.

⁹ Nawo wose, wakawa baho du vilo mupunghati, so wusiwanule we cikumbicilo, hanyuma kanyhi vilo mupunghati so sikukuu yeneco. Na mwi'zuwa lye ndumilizo, wakawa no wudumilize wo wuhembi wo wusiwanuzi,

¹⁰ na mitondo yaco, lizuwa lye makumi mejete na yidatu lya mu mwezi wo mupunghati, mutemi Solomona, nhondo ho yakawa kuwakombola wanhu wawuye ku zikwawo. Nawo wanhu wose wakawa no wusangalale wuwaha muno, ku soko yo wulugutwe wono Muwaha Mulungu yawapelile wanhu wakwe Waisilayeli, hamonga na Dawudi, na Solomona.

Mulungu yakwilajila kanyhi kuli Solomona

¹¹ Nayo mutemi Solomona, lono yali yayikondya i milimo yose yo wuzenji we Nyumba yo Mulungu, hamonga ne kaya yo wutemi, nha vyono yali yehwesize mu nhumbula yakwe,

¹² mwizuwa linji ne cilo, Muwaha Mulungu yakamulawila, yakamulonjela Solomona yakutya, “Gwe Solomona, ane niwuhulika wulombe wako, nane niyibocela Nyumba yiyi, hawe ho hanhu hono mowa kundavizya makumbiko.

¹³ Na mu mapango go gose hono niyimile mvula yilece kutonya, hamba hono niwaletele nzije zilye vilimwa vyawo, hamba ndete lihuhuji muli wanhu wangu,

¹⁴ nawo wanhu wangu wono wakucemwa mwi'tagwa lyangu hono, wenenenyheze no kulomba kuli'ne, no kunondola kanyhi wagalece ne metumo gawo mabi gono wali kwituma, nane nowahulika kuko ku wulanga, nowanenela no wubi wawo, no kuyimotya kanyhi yisi yawo.

¹⁵ Nane noyilanjilila muno Nyumba yiyi, kanyhi nowa niwikanize kuwuhuliciza wulombe wose wono wowa kuwulombela hanhu baha.

¹⁶ Hambi nha yo nene mono nahahagula hanhu baha no kuhasiwanula, hawe ho hanhu hono nowa kuhembelwa cibitilila. Holeka nowa nihalanjiliye, no kuhadima mu mapango gose.

¹⁷ Nagwe hono wunyitumamile ko wihuwilwa nha vyono sogo Dawudi yanyitumamila, wugebate malajilizo gangu, kanyhi witume zose zono nghulajilize,

¹⁸ nane nowufisiliza wihuwizo wangu, wono namwihuwiza sogo Dawudi, lono namulonjela nha vyono, Waisilayeli wowa kutemwa ne wana wawo du vilo vyose.

¹⁹ Ninga wulanjilile! Hono gwegwe, hamba wanhu wako, muwubene wulajilize wangu hamonga ne malajilizo gangu gono namupelenyi, nanye muwe kuyitumamila no kuyihemba milungu yinji,

²⁰ nane nomuwusenyi mu yisi yono namupelenyi, kanyhi noyileka ne Nyumba yiyi yono nene no mweneco nayisiwanula, yiwe ho hanhu hono nowa kuhembelwa. Nane noyinoza yiwe nha mbazi, ne wanhu wose woyihong'onga, wayisece, no kuyibedegala.

²¹ “Kwa luno, Nyumba yiyi yo Mulungu, yina cogopo muno kuli wanhu wose. Ninga hanyuma, munhu wo wose mono kolowa kukola behi nayo, kolokwizina muno no kuwuza yawe kutya, ‘Alu socici lo Muwaha Mulungu ketuma zono zinha zizi mu yisi yiyi, na mono Nyumba yiyi?’

²² Nawo wanhu wolopitula watye, ‘Ku soko i Waisilayeli wakondya kumuleka Muwaha Mulungu, u Mulungu wawo, mono yawawusa i walezi wawo ku yisi ya Misili, wakegwadilila ne milungu yinji no kuyihemba. Na yiyi yo soko yono yaleka Muwaha Mulungu yakuwagumilila magazo gaga muli wene.’ ”