2 Zinghomo 5 - Luganuzi Luswanu Kuli Wanhu Wose 2002

¹ U mutemi Solomona, yali yeza kukondya u mulimo we Nyumba yo Mulungu, hanyuma yakakongholeza vinhu vyose vyono sogwe Dawudi yavisiwanula kuli Muwaha Mulungu, yakaviwika mu viwutwa vye Nyumba yo Mulungu yo kuwika viwutwa, nha cinji fweza, zahabu, hamonga ne vinhu vinji vyose.

Lisanduku lye Cilagane likwinjizwa mu Nyumba yo Mulungu

² Hanyuma yayo, u mutemi Solomona, yakawa kuwacema walongola wose wa mu milango ye Waisilayeli, hamonga ne wawaha we zimhuga, wekongholele ku Yelusalemi, ho walisole Lisanduku lye Cilagane lyo Mulungu ku wulawa ku Sayuni mwi'kaya lya Dawudi, walinjize mu Nyumba yo Mulungu.

³ Na wose wakekongholela hamonga, mu cipango ce sikukuu ye vibanda.

⁴ Nawo walongola wose wali weza kukondya kwikonghola hamonga, hobaho Walawi wakalidinghula Lisanduku lye Cilagane,

⁵ wakalinjiza mu Nyumba yo Mulungu. Hanyuma, wakohani hamonga ne Walawi, wakalimwagula Lihema lyono Lyelile, wakalisola hamonga ne vinhu vyayo vyose, wakavinjiza mu Nyumba yo Mulungu.

⁶ Nayo mutemi Solomona, hamonga ne wanhu wose wa Isilayeli, wakekongholela ha mwande ye Lisanduku lye Cilagane, wakalavya makumbiko ga ngholo nyinji, hamonga na ng'ombe nyinji muno, hamba si za kuwala.

⁷ Hanyuma ya zizo, nhondo i wakohani ho wakawa kulidinghula Lisanduku lye Cilagane lyo Mulungu, wakalinjiza mu Nyumba yo Mulungu, wakaliwika i Hanhu Hono Helile, Helile muno, hasi ye Makelubi.

⁸ Ne mabawa ge Makelubi, gakalifuniciza Lisanduku, hamonga ne mabici gayo go kulidinghulila.

⁹ Ninga mabici go kulidinghulila Lisanduku vyono gali matali, holeka gasumaga kwijela kuli munhu wo wose mono kokwima vidomile no mulango we Hanhu Hono Helile, Helile muno. (Ne mabici gago, gakali gali baho sunga nalu).

¹⁰ Na mumo mugati ye Lisanduku lye Cilagane, mwali musina cinji, langa mwali mozili zi mbawo zinyejete ze mabwe, zono Musa yazitajila mumo, lono yali yali he 'tunda lya Sinayi, i hanhu hono Muwaha Mulungu, yanozeza cilagane hamonga ne wanhu wakwe Waisilayeli, lono wawuyaga wakulawa ku Misili.

U lukumyo lo Muwaha Mulungu

¹¹ Ne wakohani wose wono wali wali baho, si wali wehangulize wanhu na cipuga cawo, langa wose wali wahangahanjile du, kanyhi wose wali wakondya kwiyeza.

¹² Ne Walawi iwembi, wose kono walila, wa Asafu, na Hemani, na Yedutuni, hamonga na wo lulelo lwawo, wose wali wavwalile vivwalo vizelu 'swe. Nawo wawa Walawi, wakema ku lubavu lwa kucilima, behi ne cikumbicilo, akuno webate ne misesele ne masumbi ne zindonondo. Kanyhi hakawa na wakohani yigana limonga na makumi mejete, wono watowaga zindulele.

¹³ Nawo i wembi, wembaga wose hamonga kwe mazi maswanu muno, hamonga ne zindulele ne misesele, ne masumbi, hamonga ne vinhu vinji vinji vyono watowaga, wakumukumya Muwaha Mulungu wakutya, “Muwaha Mulungu yalumbwe, hambi nha muswanu. No lusungu lwakwe nha lwa cibitilila.” Likaza yivunde kwa nhinicizo, likayimemya nhojo yo Muwaha Mulungu mumo mu Nyumba yakwe.

¹⁴ Sunga ne wakohani, si wasuma kanyhi kujendelela no kuwulongoza wuhembi yaye. Hambi Nyumba yo Mulungu, nha yali yamema nhojo yo Muwaha Mulungu.