2 Zinghomo 34 - Luganuzi Luswanu Kuli Wanhu Wose 2002

Yosiya u mutemi wa Yuda

¹ Yosiya yali yaficile myaka munana du, lono yanziza kutema mu Yuda. Nayo yakatema mu Yelusalemi myaka makumi madatu na wumonga.

² Na mu wuteme wakwe, yaketuma zono zamwendezaga Muwaha Mulungu, yakatyatya musambo muswanu wo kukuye mutemi Dawudi, yakawukamisa wulajilize wose wo Mulungu.

Yosiya yakuwiyagaza wuhembi we milungu yinji

³ Na mu mwaka wo munana wa mu wutemi wakwe, lono yali yakali mudodo, yakawa kwanza kumuhemba Mulungu wo kukuye mutemi Dawudi. Na ku wulawa baho, yali yeza kupuluta kanyhi myaka mine, Yosiya yakawa kwanza kuhakumulanga i hanhu hose hono wahembelaga wuhembi we wanhu wono si wamumanyile Mulungu, hamonga ne vihwani vyo mulungu we cicekulu Ashela, hamonga ne vihwani viseswe vyose.

⁴ Yakawatuma wanhu wakwe, wakavimwagula vikumbicilo vyose, hanhu hose, hono wamuhembelaga Baali. Yakavimwagula sunga ne vikumbicilo vyo kufusiza wuvumba, vyono vyali vizenjigwe behi ne hanhu hose hono wamuhembelaga Baali. Wakavipondanjiza vihwani vyose vya mulungu we cicekulu Ashela, wakavitindya vikawa manghundi, hamonga ne vihwani vyose viseswe. Wakagasola manghundi gago, wakageyagaziza mucanyha ye vitenjelo vye wanhu wono walavywa kuli milungu yiyo.

⁵ Yakagasola mafupa ge wakohani we milungu yiyo, yakagakongonjela mu vikumbicilo vyawo. Na mu wituma zizi zose, yakawanoza i wanhu wa Yuda na Yelusalemi, weyeze kanyhi.

⁶ Yakanoza nhavivi, sunga na mu makaya ne hanhu hose, hono hali hakondya kuhodangwa, nha cinji, yisi ya Manase, na Efulayimu, na Simiyoni, sunga ko kusumuka ku yisi ya Nafutali.

⁷ Yakavitulanjiza vikumbicilo vyose mu yisi yose yo wutemi wo lubavu lwa kusumuka, hamonga ne vihwani vyo mulungu we cicekulu Ashela, yakavitindya vihwani vyose viseswe vikawa manghundi. Yakavibenanjiza vikumbicilo vyose vyono wafusizaga wuvumba. Hanyuma hodu yakawa kuwuya ku Yelusalemi.

I citabu co Wulajilize cikwijela

⁸ Na mu mwaka we likumi na munana, wa mu wutemi wakwe, lono yali yakondya kuyeza yisi hamonga ne Nyumba yo Mulungu, no kuwudumya wuhembi we wanhu wono si wamumanyile Mulungu. Hobaho mutemi Yosiya, yakawa kuwatuma wanhu wadatu, wayinozeleze Nyumba yo Muwaha Mulungu, nawo wali awa, Shafani u mwana wa Azaliya, na Maseya u muwaha we likaya lya Yelusalemi, na Yowa u mwana wa Yowahazi u mwitumami mulongola.

⁹ Ne zipesa zono Walawi i walindilizi wazikonghola mu Nyumba yo Mulungu, wakamupela Hilikiya u Mukohani Muwaha yaziwice. (Zipesa zizi, zakongholwaga ku wulawa kuli wanhu wa Efulayimu, na Manase, hamonga na kuli wanhu wono wasigala ku wutemi wa ku lubavu lwa kusumuka, na kuli wanhu wa Yuda na Benyamini, na Yelusalemi.)

¹⁰ Hanyuma kanyhi zipesa zizo, nayo Hilikiya Mukohani Muwaha, yakawapela wawalya wanhu wadatu wono wali wo walanjilizi wo mulimo wo kuyinozeleza Nyumba yo Mulungu, nawo wakawa kuziwika mu miwoko ye waselemala, hamonga ne wazenji, ho wagule mabwe hamonga ne zimbawo,

¹¹ i vinhu vyono viketumamilwa mu wunozelezi we mazengo gono watemi wa Yuda, wagaleceleza gakahodanjika.

¹² Ne wanhu wawo wono wawituma mulimo wuwo, wakawituma ko wihuwilwa muno, hasi yo wulanjilizi we Walawi wane, Yahati, na Obadiya, we mhuga ya Melali, na Zekaliya, hamonga na Meshulamu we mhuga ya Kohati. (Ne Walawi wawo i walanjilizi wo mulimo, wali wanghula muno mu wimbi.)

¹³ Ne Walawi wanji nawo, wakawikwa wawe walanjilizi wo wudinghuzi we vinhu vyo kuzenjela, hamonga no kuwalanjilila wetumami mu milimo hayo hayo. Wanji nawo, wakawa wo wandici, hamonga no kwituma mulimo wo wulanjilizi.

¹⁴ Ne mapesa gago, gali geza kuwuswa gose mu cinyumba co kuwicila viwutwa, hobaho Hilikiya u Mukohani Muwaha, yakaciwona citabu co Wulajilize wo Muwaha Mulungu, u Wulajilize wono Mulungu yamupela Musa.

¹⁵ Hilikiya yakamulonjela Shafani yakatya, “Ane niciwona citabu co Wulajilize mu muno mu Nyumba yo Mulungu.” Hodu yakawa kumupela Shafani, citabu cico.

¹⁶ Nayo Shafani, yakawa kucitegula ko mutemi Yosiya, yakawa kumulonjela mutemi yakatya, “Cakondya kuzinoza zose zono wulajilize,

¹⁷ cakondya kuziwusa zipesa zose zono zali mbice mu Nyumba yo Mulungu, ciwa kuwapela i wetumami, hamonga ne walanjilizi wawo.

¹⁸ Kanyhi hamonga na zizo, nina citabu acino cono Hilikiya yamhelile.” Hodu yakawa kucisoma ha mwande yo mutemi kwe'zi waha.

¹⁹ Nayo mutemi Yosiya, yali yeza kuzihulika zono zikusomwa mu citabu, hobaho yakawa kuvidemulanga vivwalo vyakwe ko wusungu wuwaha muno.

²⁰ Yakawa kuwalonjela Hilikiya na Ahikamu u mwana wa Shafani, na Abudoni, u mwana wa Mikaya, na Shafani u mwandici, hamonga na Isaka, u mwitumami wo mutemi, yakawatya,

²¹ “Alu, mubite mukambuzize kuli Muwaha Mulungu, hamonga ne wanhu wono wakali wasigaye mu Isilayeli na mu Yuda. Muzimanye ze mejizo gono gali mu citabu cici. Hambi Muwaha Mulungu nha yacikoleywe likuwo, vyono i walezi wetu si wenda kuyihulika nghani yo Muwaha Mulungu hamba kwituma zono zinojeye wazitume, nha vyono zandicigwe mu citabu cicino.”

²² Nayo Hilikiya hamonga ne wayagwe, wakawa kubita kumuwuza mucekulu yunji litagwa lyakwe Hilida, u muwizi, mono yekalaga mu hanhu hapya mu Yelusalemi, nha vyono mutemi yawalajiliza. (U mulume wo mucekulu yuyo yacemwaga Shalumu u mwana wa Tikiva, kanyhi mwizukulu wa Balihasi, yali yo mulanjilizi we vivwalo vyono wetumamilaga ku wulongoza wuhembi mu Nyumba yo Mulungu.) Nawo wali weza kumwagana, wakamuloloseza zose zono zijeye.

²³ Nayo yakawalonjela wawuye ko mutemi, wakamulonjele

²⁴ nha vyono Muwaha Mulungu yakulonga yakutya, “Ane no Muwaha Mulungu, noyilipiciza Yelusalemi, hamonga ne wanhu wayo, kwe malijito gono gandicigwe mu citabu cico, cono wamusomeye mutemi.

²⁵ Hambi nha wakondya kunema'ne, no kuyilavizya makumbiko milungu yinji. Holeka nane, wakondya kunghoza likuwo so zose zono wetumile. Nakondya kuyikolelwa likuwo Yelusalemi, ne likuwo lyangu, hamba si lyowuka yaye.

²⁶ Nayo mutemi, mumulonjele mutye, ‘Agwe Yosiya, vyono kuzihulika zono zali kusomwa mu citabu

²⁷ na kanyhi vyono kunena, kanyhi kuwa kwinenenyheza hali 'ne, kuwa kuwulajila wunene wako, mu nzila yo kudemulanga vivwalo vyako. Kuwa kulila, weza kuhulika nha vyono noyilipiciza Yelusalemi, hamonga ne wanhu wayo. Holeka nane lu, no Muwaha Mulungu, u Mulungu wa Isilayeli, niwuhulika wulombe wako.’

²⁸ Holeka luno, wulipicize wono nali niwalipicize wanhu wa Yelusalemi, alu hodu, si nowalipiciza, sunga kolo agwe wakondya kufwa. Ninga nokuleka wufwe ko mulamu.” Nawo wanhu wa walya, wakawa kuwuya kuli mutemi Yosiya, hamonga ne zinghani zizo.

Yosiya yakunoza Cilagane ce cihuliko kuli Muwaha Mulungu

²⁹ Mutemi Yosiya, yakawa kuwakonghola i walongola wose we Wayuda na Yelusalemi.

³⁰ Nawo, hamonga no mutemi, wakawa kwinjila mu Nyumba yo Mulungu, hamonga ne wakohani, ne Walawi, hamonga ne wanhu wose wono wasigala, i wagoli ne waciwa. Mutemi yakawa kwima ha mwande ye wanhu wose, yakawa kucisoma citabu cose ce cilagane, cono cejela mu Nyumba yo Mulungu.

³¹ Yakema he sumbili lye watemi, yakanoza cilagane no Muwaha Mulungu, nha vyono komuhulika no kwibata wulajilize, hamonga ne malajilizo gakwe, kwe nhumbula yakwe yose, hamonga na ko mutima wakwe wose. Na kanyhi, kokwituma zose nha vyono zinha mu cilagane, nha vyono zandicigwe mu citabu.

³² Yakawasaka wanhu wose, sunga ne wanji wose du, wono wali wali mumo mu Yelusalemi, wehuwize nha vyono wokwibata cilagane. Nawo wanhu wa Yelusalemi wakavihulika visakwa vye cilagane, cono wacinozize no Mulungu we walezi wawo.

³³ Hodu mutemi Yosiya, yakawa kuviwusa i vihwani vyose vye mawifyo, vyono vyali vye wanhu wa Isilayeli, vyono vyali vitagaliye mu yisi yose. Na mu nghango yo wikale wakwe wose, yajendelela kuwakong'onheza wanhu, wamwitumamile Muwaha Mulungu, u Mulungu we walezi wawo.