2 Zinghomo 3 - Luganuzi Luswanu Kuli Wanhu Wose 2002

¹ Ninga mutemi Dawudi, u sogwe wa Solomona, yali yakondya kuhawikaniza i hanhu hono yozengwa yiyo Nyumba yo Mulungu. Ne hanhu heneco, hali ha Yelusalemi, he 'tunda lya Moliya, hono Muwaha Mulungu yelajilila kuli Dawudi, i hanhu hono Olinani u Muyebusi, yahetumamilaga nha cuga cakwe.

² Mutemi Solomona yakalwanza luzengo lulo mu mwezi we kejete, wa mu mwaka we kane, wa mu wutemi wakwe.

³ Ne Nyumba yo Mulungu yono mutemi Solomona yayizenga, yali yina wutali wo mulandala wayo, wa mita makumi mejete na mupunghati, no wugazi wayo, wali mita yicenda,

⁴ Ne likumbo lyono lyali lili ku mwande yayo, mulandala walyo, wali winha wugazi we Nyumba, lyali lina mita yicenda, no wutali wo kubita kucanyha, wali mita makumi mahano na yine. Ne likumbo lilyo, lyali yihiliwe zahabu nengu mugati yalyo.

⁵ Ne nyumba mbaha, yakayifunika ne zimbawo zo muhagata, zono hiliwe ne zahabu nengu. Yakayihamba mitende ne minyolo.

⁶ Mutemi Solomona, yakayihamba Nyumba yo Mulungu ne vibwe vyo wuguzi wukamu, hamonga ne zahabu yono yaletwa ku wulawa ku Palevayimu.

⁷ Yakayitumamila zahabu yiyo mu wuhiliwa majinji gose ge Nyumba yo Mulungu, hamonga ne micici yayo, ne zifulemu zayo, hamonga ne milango yayo. Na mu majinji, yakawika vihwani vye makelubi.

⁸ Cumba ca haciligati, cono cikucemwa i Hanhu Hono helile helile muno, cali na wutali wa mita yicenda, no wugazi wa mita yicenda. Nawo wali wo wugazi we Nyumba yo Mulungu. Yakasola zahabu ya wuzito wa tani makumi mejete, yakayitumamila so wuhiliwe we majinji gose ge Hanhu Hono Helile Helile, muno.

⁹ Kanyhi yakasola zahabu yo wuzito wa kilo magana mahano na makumi mupunghati, yakayitumamila so wutyana misumali. Ne majinji ge vyumba vya ku golofa, navyo vyose, vikahiliwa zahabu.

¹⁰ Kanyhi mutemi Solomona, yakawalajiliza wetumami wakwe wanoze vihwani vye makelubi mejete, wakagafunika na zahabu, wakagawika i Hanhu Hono Helile, Helile muno,

¹¹ gakawa gose galanjile ku mulango. Nago gose vyono mejete, gali gena mabawa mejete mejete. Ne libawa limonga, lyali lina wutali wa mita nyejete, na lobo.

¹² Ne mabawa gayo gali matandakule, gepamizize haciligati ye cumba, na ku lubavu luyagwe, libawa lye kejete, lyali lipamize kwi 'jinji.

¹³ Mabawa gago ku wutandakule wayo, gali gakwiliye wugazi we cumba cose mita yicenda.

¹⁴ Yakanoza ne libupa lyo mwenda we citani ciswanu, we liwala lye buluu, no lugandu, hamonga ne liwala lidunghu, yakahonela ne cihwani ce makelubi, yakaliwika licitize i Hanhu Hono Helile, Helile muno.

Masumbili mejete ge shaba

¹⁵ Mutemi Solomona, yakanoza masumbili mejete, limonga lina wutali wa mita yikumi na yihano na nusu. Yakagasimya ku mwande ye Nyumba yo Mulungu. Ne lisumbili limonga lyali lina mukumbo wa mita nyejete na lobo wutali wayo.

¹⁶ Na ku visonje, kucanyha ye masumbili, kwali kuhambwe na minyolo, hamonga ne makomamanga yigana limonga ga shaba.

¹⁷ Ne masumbili gago, gali masimye akuno, na akuno ha mulango we Nyumba yo Mulungu, limonga ku lubavu lwa kutakama yo mulango, walicemaga Yakini, ne liyagwe nalyo lyo lubavu lwa kusumuka, walicemaga Bowazi.