2 Zinghomo 22 - Luganuzi Luswanu Kuli Wanhu Wose 2002

Ahaziya u mutemi wa Yuda

¹ I walabu wanji wali, wakondya za nhinicizo no kuwawulaga i wana wose wo mutemi Yeholamu, langa Ahaziya u mwana mudodo, ayo si wamuwulaga yaye. Holeka i wanhu wa Yelusalemi, wakawa kumunoza Ahaziya, yawe mutemi yahale wutemi wo sogwe.

² Ahaziya yatema lono yali yaficile myaka makumi mejete na myejete, nayo yakatema mu Yelusalemi mwaka monga du. Ninga nayo Ahaziya yatyatya musambo mubi we mhuga yo mutemi Ahabu, vyono u nyina Ataliya, u mwana we cicekulu wo mutemi Ahabu, kanyhi mwizukulu wo mutemi Omuli wa Isilayeli,

³ wamufunda vibi, wakamulongoza ku wituma zimbi.

⁴ Yaketuma zimbi hali Muwaha Mulungu, vyono lono sogwe yakondya kufwa, mwene yakasola wanji wa mu mhuga yo mutemi Ahabu, yakawanoza wawe wo watazi wakwe mu zinghani, nawo wakamulongoza sunga ko ku wongomele.

⁵ Nayo yakatyatya wutonji wawo, yakelunza no mutemi Yolamu wa Isilayeli mu milewo, wakehoma na Hazayeli mutemi wa Siliya ku Lamoti ya Gileyadi. Ninga mutemi Yolamu yakatamiswa muno, yakatuga nghomele kuko ku wulugu.

⁶ Holeka yakawa kuwuya, yakabita kwikala kwi'kaya lya Yezeleli, ho wamutamye zinghomele zakwe. Nayo mutemi Ahaziya, yakabita kumulanga.

⁷ Ale, no wongomele wa Ahaziya, waletwa no Mulungu, vyono Ahaziya yakabita kumulanga Yolamu. Vyono lono Ahaziya yali yali kuko kwa Yolamu, vikatulukana na Yolamu, wakawa kubita kuli Yehu u mwana wa Nimushi. U munhu mono Muwaha Mulungu yamuhagula yawongomezeze lukulu we nyumba ya Ahabu.

⁸ Na lono Yehu yanozaga wuling'anizi wo kuyilipiciza nyumba ya Ahabu, hobaho yakawagana walongola we Wayuda, hamonga ne wana we wanduguze wa Ahaziya wono vikazana na Ahaziya wamulanje Yolamu. Hobaho Yehu yakawa kuwawulaga wose.

⁹ Ninga Ahaziya mweneco, yakehundika, nawo wakamulondola sunga wakamwagana yehundice ku Samaliya. Wakamusola wakamutegula kuli Yehu, wakawa kumuwulaga. Ninga wakamuzika kwe 'lumbo, vyono u kukuye u mutemi Yehoshafati, yamwitumamila Muwaha Mulungu kwe nhumbula yakwe yose. Na ku wulawa baho, hakawa hasina kanyhi wa mu nyumba ya Ahaziya mono yawibata wutemi.

Ataliya, u mutemi we cicekulu wa Yuda

¹⁰ Nayo Ataliya, u nyina yo mutemi Ahaziya, yali yeza kumanya nha vyono mwanagwe Ahaziya yakondya kuwulagwa, hobaho nayo, yakalajiliza nha vyono i wana wose we citemi we nyumba ya Yuda wawulagwe.

¹¹ Nayo Ahaziya yali yena u lumbulye mono yacemwaga Yehosheba, mono yali mutolwe no mukohani, litagwa lyakwe Yehoyada. Ale yuyo Yehosheba yakamuponya yumonga wa muli wana wa Ahaziya, mono yacemwaga Yowashi ho yalece kuwulagwa na Ataliya. Mwene yakamusola, yakamuwusa mwi'puga lye wana we watemi wono wali wawikanizwe wawulagwe, yakamuwika mu citanda cono cali cili mu Nyumba yo Mulungu, yakamuhundika mumo, yakamuponya, ho yalece kuwulagwa na Ataliya.

¹² Yakamuhundika sunga yikapuluta myaka mutandatu, mu vilo vyono Ataliya yali yakali yatemile.