2 Zinghomo 2 - Luganuzi Luswanu Kuli Wanhu Wose 2002

Wuwikanize wo wuzenji we Nyumba yo Mulungu

¹ Mutemi Solomona yakadumula nghani vyono, yanojeye yazenje Nyumba yo Mulungu, yono yowa ho hanhu hono wowa kumuhembela Muwaha Mulungu, na kanyhi na mweneco nayo, yezenjele ne likulu lyakwe.

² Na hobaho du, yakawawika wanhu elufu makumi mupunghati so mulimo wo kuvidinghula no kuvileta vinhu vyo kuzenjela lizengo lilyo, na wanhu elufu makumi munana so mulimo wo kusesa mabwe. Hanyuma yakawawika wanhu elufu yidatu na magana mutandatu wawe wo walanjilizi we milimo yose.

³ Hanyuma Solomona yakawa kutuma wanhu kuli Hilamu, mutemi wa Tulo, wakamulonjele watye, “Nghukulomba, wunhendele nane nha vyono wamutendela baba Dawudi, vyono wamuguzizaga mabici go muhagata, so wuzenjela kaya yakwe ye likulu.

⁴ Alu nane nanza mulimo wo kuzenga Nyumba yo Mulungu wangu. Ne Nyumba yiyo, howa ho hanhu hono helile hono i wanhu wangu, hamonga na nene, cowa kumuhemba Muwaha Mulungu, u Mulungu wetu, akuno cikufusa no wuvumba we mhunjile swanu, no kumulavizya vilavywa vyo mukate wono welile vilo vyose. Kanyhi ciwe kumulavizya sunga ne vilavywa vinyanywe nhondo zose, hakali mitondo ne cinyamihe. Sunga na mu vilo vyose vye Sabato, na mu zisikukuu ze ndawo yo mwezi, na mu vilo vinji vyose vyono vyelile, ciwe kumupela lilumbo Muwaha Mulungu, u Mulungu wetu. Hambi nha vyo yawalajiliza Waisilayeli, weze kunoza nhavivi cibitilila.

⁵ Holeka nane, nakondya kudumula nghani, nha vyono nzenje Nyumba yo Mulungu, yono yowa mbaha muno muno, hambi mwene Mulungu wetu, nha yo Muwaha, yacizize milungu yinji yo yose.

⁶ Hamba nhavivyo, hasina munhu mono kosuma kumuzenjela Mulungu Nyumba yono kosuma kwinjila, vyono sunga no wulanga, hamonga no mwanya wayo si vikumukwila yaye. Holeka 'ne waco nene nani 'mbi, ho sume kumuzenjela Mulungu Nyumba yono yowa swanu, langa, howa hanhu du, ho kufusiza wuvumba hali mwene.

⁷ Holeka nghukulomba wundetele munhu munghula, we milimo ye zahabu ne fweza ne shaba, ne vyuma, na mu wunoza myenda ye liwala lye buluu, ye liwala lyo lugandu, na ye liwala lidunghu. Kanyhi yasume kwitumana hamonga ne wanhu wa Yuda na Yelusalemi, wono baba Dawudi yawawika.

⁸ Nane nha manyile wunghula we wanhu wako vyono wenha. Holeka wundetelaje mabici go muhagata, ne mibeloshi, ne mabici go musandali, ku wulawa ku Lebanoni. Nane nakondya kwiwikaniza, nghuletele wanhu wangu, ho vitazilize ne wanhu wako,

⁹ ho wasume kuwikaniza mbawo nyinji muno, hambi nha nadumula nghani vyono yinojeye nzenje Nyumba yo Mulungu mbaha muno muno, kanyhi yono yowa yina lukumyo luwaha.

¹⁰ Na langa ta, ane nowapela wetumami wako, wuhemba, tani elufu nyejete, na shayili, tani elufu nyejete, na divayi, lita elufu magana mane, hamonga na mafuta, nago lita elufu magana mane.”

¹¹ Ale, du! Nayo mutemi Hilamu, yakamwandicila baluwa Solomona, yakamupitula yakatya, “Gwe Solomona, Muwaha Mulungu vyono yawendile wanhu wakwe, holeka yakunoza agwe wuwe mutemi wawo.

¹² Holeka, yalumbwe Muwaha Mulungu, u Mulungu we wa Isilayeli, mono yawumba wulanga ne yinze! Hambi nha yamupela Dawudi mwana we mahala, mono yena wizuce wuwaha, kanyhi munghula, mono yakondya kudumula nghani yamuzenjele Muwaha Mulungu Nyumba yakwe.

¹³ Holeka nane aluno, nghukuletela munhu munghula muno, litagwa lyakwe Hulamu.

¹⁴ U nyina wa Hulamu, mwene yo mulawa mu mulango wa Dani. U sogwe nayo, munya Tulo. Mwene Hulamu, yo munghula muno mu milimo ye zahabu, na ye fweza, na ye shaba, na ye vyuma, na ye mabwe, sunga na ye mabici. Kanyhi mwene kosuma kwituma sunga ne milimo yo wunoza myenda ye liwala lye buluu, na ye liwala lyo lugandu, na ye liwala lidunghu. Kanyhi yo munhu mono kosuma kwituma milimo yose yo wulula, hambi nha kosuma kwiga cihwani co cose cono kolajilwa. Holeka wumulece vitumane ne wanhu wako i walula, hamonga ne wanhu wono wetumaga kuli sogo mutemi Dawudi.

¹⁵ Holeka aluno, heya, wuciletelaje vinhu vyono wehuwiza, wuhemba ne shayili, ne divayi, hamonga ne mafuta.

¹⁶ Nase cobita mwi'tunda lya Lebanoni, cikakutemele mabici go muhagata, mu nghango nha vyono gwegwe kosaka. Hanyuma cogawopeleza hamonga, cigojeze mwi'lenga, sunga ko ku Yopa. Nagwe kogasolela baho, wugategule ku Yelusalemi.”

Wuzenji we Nyumba yo Mulungu wukwanza

¹⁷ Mutemi Solomona, yakawawala i wanhu wose wajenzi wono wekalaga mu Isilayeli, nha vyono sogwe Dawudi yanoza mu vilo vyakwe. Na wakejela wajenzi waficile wanhu elufu yigana limonga na makumi mahano na wadatu, na magana mutandatu.

¹⁸ Yakawasola wose, yakawika wanhu elufu makumi mupunghati, mu mulimo wo wudinghula vinhu vyo kuzenjela, no kuvileta. Na wanji elufu makumi munana, yakawawika mu mulimo wo wusesi we mabwe mu matunda. Na wanji kanyhi elufu yidatu na magana mutandatu, yakawawika wawe wo walanjilizi we milimo yose, i milimo ho yitumwe viswanu.