2 Zinghomo 14 - Luganuzi Luswanu Kuli Wanhu Wose 2002

U mutemi Asa, yakuwasuma Wakushi

¹ U mutemi Abiya, yakafwa, yakazikwa mu vitenjelo vye watemi, mwi'kaya lya Dawudi. Na Asa u mwanagwe, yakahala wutemi wakwe. Na mu cipango co wutemi wa Asa, wanhu wakawa wena mulamu, sunga yikapuluta myaka yikumi.

² Asa yakamwendeza muno Muwaha Mulungu, u Mulungu wakwe, so wituma ziswanu na ze ling'ani.

³ Yakaviwusa vikumbicilo vijenzi, hamonga ne hanhu hose ho wuhembelo we wanhu wono si wamumanyile Mulungu. Yakagabenanga masumbili ge mabwe, yakavidumulanga vihwani vyose vyo mulungu we cicekulu Ashela.

⁴ Yakawalajiliza wanhu wose wa Yuda wetume wuhile wo Muwaha Mulungu, u Mulungu we walezi wawo, wagebate ne mejizo gakwe, hamonga no wulajilize wakwe.

⁵ Hambi nha yakondya luno, kuhahodanga hanhu hose ho wuhembelo we wanhu wono si wamumanyle Mulungu, hamonga ne vikumbicilo vyose vyo kufusiza wuvumba, hanhu hose mu makaya gose ga Yuda. No wutemi wukawa wutulile mu vilo vyo wutemi wakwe.

⁶ Yakazenga magomawakali mu makaya ga Yuda, mu vilo vyakwe. Na hakawa hasina wulugu wo wose sunga myaka yikatela, hambi Muwaha Mulungu nha yamupela mulamu.

⁷ Nayo yakawalonjela wanhu wa Yuda yakawatya, “Alenyi cigazenje makaya, cigapilimizye magomawakali, cigazenjele ne minala, ne milango, hamonga ne mapajicilo, ho ciwe kuyidinda milango no kuyipajika. Hambi ase nha cikuyilongoza yisi, vyono cikwituma zo wuhile wo Muwaha Mulungu, u Mulungu wetu. Nayo yakucidima, kanyhi yakucicitila mbavu zose.” Hodu wakawa kuzenga, no kutuga wumoteswe.

⁸ Nayo mutemi Asa, yali yena mhuga ye wasilikale, walawa mu yisi ya Yuda, wena ne zingula hamonga ne migoha, waficile elufu magana madatu. Na wanji walawa ku yisi ya Benyamini, nawo waficile elufu magana mejete na makumi munana, nawo wena ne zingula zawo, hamonga no wupinde wawo. Ne wasilikale wawa wose, wali wejizwe muno mulimo wo wusilikale wo wulugu, kanyhi vitung'ati.

⁹ Hakawa ho yuli Mukushi, litagwa lyakwe Zela, munhu yuyo, yakaza hamonga ne lipuga lyakwe lye wasilikale wo wulugu, waficile milyoni monga, hamonga ne matuka go wulugu, gaficile magana madatu, yakayihoma yisi ya Yuda, yakajendelela sunga ko ku Malesha.

¹⁰ Hodu, Asa nayo yakawa kubita vikehome nayo. Nawo wose mbavu zose, wakawa kutandala mwilolo lya Zefata, behi na Melesha, wanhu na lubavu lwawo.

¹¹ Asa yakawa kumulomba Muwaha Mulungu, u Mulungu wakwe, yakutya, “Gwe go Muwaha Mulungu, agwe yo gwegwe du, mono wudahile kuwapela wutazi lipuga lyono lisina vilungo, kuli lyono lili vilungo. Alu, wucitaze 'gwe go Muwaha Mulungu, go Mulungu wetu, hambi ase nha cikwitumbiye gwegwe du. Na mwi'tagwa lyako, holeka nase cijelela kuza cihome ne lipuga lili liwaha. Agwe go Muwaha Mulungu, agwe yo gwegwe yo wuli Mulungu wetu, hamba hasina mono kokwihwesa nha vyono yadahile yakusume agwe.”

¹² Nayo Asa yali yeza kwanza kwihoma ne Wakushi, u Muwaha Mulungu yakawasuma Wakushi, wakawa kutiza.

¹³ Nayo Asa, hamonga ne lipuga lyakwe lye wasilikale, wakawalondelela Wakushi sunga wakawafisa ku Gelali. Na mu nzila yiyo, wasilikale wenji we Cikushi wakawulagwa muno, hambi nha wali wawula vilungo vyo kwihomela. Muwaha Mulungu yali yakondya kuwawusiza vilungo vyawo. Ne lipuga lye wasilikale wa Asa, wakasola vinhu vinji vye walugu.

¹⁴ Hanyuma ya zizo, wakagongomeza makaya gose, gono gali gayipilime Gelali, hambi i wanhu wose wa mumo, nha wali wakondya kugwilwa ne cogofyo co Muwaha Mulungu. Holeka lipuga lye wasilikale likasuma kuvisola vinhu vyose vyono vyali vili mu makaya gose.

¹⁵ Wakazihoma sunga ne zinghambi ze wadimi, wakasola mumo zingholo nyinji muno, hamonga na ngamiya nyinji. Hanyuma ya zizo, nhondo wakawa kuwuya ku Yelusalemi.