2 Zinghomo 10 - Luganuzi Luswanu Kuli Wanhu Wose 2002

I we milango ya wono wekalaga ku lubavu lwa kusumuka, wakugaluka

¹ Ale, Lehobowamu yakawa kubita ku Shekemu, kono wali wehangulizize wanhu wose wa Isilayeli, we milango ya wono wekalaga ku lubavu lwa kusumuka, ho wamunoze yawe mutemi.

² Ninga Yelobowamu u mwana wa Nebati, mono yamutiza Solomona, yakawa kutiziza ku Misili, yali yeza kuzihulika zizo, hodu yakawa kuwuya kukaya.

³ Nawo i wanhu wose we milango ye Waisilayeli, wono wekalaga ku lubavu lwe sumuka, wakamucema Yelobowamu, yakaza, hanyuma wose hamonga na Yelobowamu, wakawa kumubitila Lehobowamu, wakawa kumutya,

⁴ “U sogo Solomona, yacitumyaga vibi muno, no kucidinghuza mutegulo muzito. Holeka agwe hono wucicepulile wuwanda wuwo wo sogo, no mutegulo wakwe muzito, wono yacidinghuzaga, ale, nase cokwitumamila.”

⁵ Nayo Lehobowamu yakawatya, “Ale mumhelaje vilo vidatu, ane nihwese nghani yiyi.” Hanyuma ho muze kanyhi nimupenyi lipitulo. Hodu nawo wanhu wakawa kwiyagala.

⁶ Mutemi Lehobowamu, yakawawuza i wanyamhala wono wamutazaga u sogwe mu zinghani, lono yali yakali mumi, yakawatya, “Ale, ta, munhazaje, mumhele lipitulo lyono nowapitula wanhu wawa.”

⁷ Nawo i wanyamhala, wakamupitula wakamutya, “Agwe hono wusace wuwetumamile wanhu wawa viswanu, ale, weze kuwapela mapitulo gono gowakwila mu visakwa vyawo, holeka nawo wojendelela nhondo zose kukuhulika.”

⁸ Ninga mwene Lehobowamu, yakazibedegala zinghani ze wanyamhala, yakawa kuwawuza wazika wayagwe, wono lulo wali wo watazi wakwe mu zinghani, yakawatya,

⁹ “Alu, wulenyi, nanye mukuwona wule? ‘Alu mbite nghawapitule, nitye nhawule, vyono wene wakusaka niwacepulile mutegulo?’ ”

¹⁰ Nawo i wazelelo, i wazika wayagwe, wakamupitula wakamutya, “Alu nagwe wubite wukawalonjele wutye nhavi, ‘Cidole nene cangu, ciwaha cicizize ciwino ca baba Solomona.

¹¹ Holeka hono yawe baba yali kumudinghuzenyi mutegulo muzito, alu ane nowonjeleza mutegulo wenyu wuwe muzito kuciza. Na hono yali kumukunenyi no mukotya, ane nomukunenyi muno muno no mujeledi we mamiya!’ ”

¹² Vyali vyeza kupuluta vilo vidatu, Yelobowamu hamonga ne wanhu wose we Waisilayeli, wakawa kumubitila kanyhi mutemi Lehobowamu, nha vyono yali yawalonjeye.

¹³ Ninga mutemi Lehobowamu, vyono yazibedegala zinghani ze wanyamhala, yakawa kulongana ne wanhu ko wukali muno muno. Yakagatyatya mahweso ge wazelelo, i wazika wayagwe, yakawa kuwalonjela wanhu yakutya,

¹⁴ “Baba Solomona, yamudinghuzajenyi mutegulo muzito, heya, ninga ane nomonjelezenyi mutegulo wenyu wuwe muzito muno. Mwene yali kumukunenyi no mukotya, ninga ane nomukunenyi muno muno no mujeledi we mamivya.”

¹⁵ Na wuwo, wali wo wuhile wo Muwaha Mulungu, ziwe nhavivyo, nha vyono Muwaha Mulungu yamulonjela Yelobowamu u mwana wa Nebati, mu nzila yo muwizi Ahiya munya Shilo. Na yiyi yo yaleka mutemi Lehobowamu si yasaka yazihulicize ze wanhu.

¹⁶ Nawo wanhu waza kuwona nha vyono mutemi Lehobowamu si yakuwahuliciza yaye, hodu, wakazozeza wose hamonga wakutya, “Mwene nye, ase cina yigawoci ne mhuga ya Dawudi! Hamba wuhazici wono cina muli mwana wa Yese? Nye nyo wanhu wa Isilayeli, alenyi ciyagale, ciwuye ku zikaya zetu! Mulece kumutyatya kanyhi Lehobowamu, mumulekaje yali wene!” Hodu, hobaho i wanhu wa Isilayeli, wakawa kumugaluka mutemi Lehobowamu.

¹⁷ Wakawa kumuleka Lehobowamu yawe mutemi we wanhu wono wekalaga mu yisi ya Yuda du.

¹⁸ Hanyuma mutemi Lehobowamu, yakamutuma Adonilamu, mono yali yo mulanjilizi muwaha wa wetuma milimo wose, yabite kuli Waisilayeli. Ninga Adonilamu yali yeza kufika kuko, Waisilayeli wakamutowanga ne mabwe sunga yakafwa. Na ku soko ya zizo, hodu Lehobowamu yakawa kupanda musunho mwi'tuka lyakwe lyo wulugu, yakawa kutiziza ku Yelusalemi.

¹⁹ Na ku wulawa mwizuwa lilyo, hodu i Waisilayeli wo wutemi wa ku lubavu lwa kusumuka, wakawa kuyigaluka nyumba ya Dawudi sunga nalu.