2 Watemi 3 - Luganuzi Luswanu Kuli Wanhu Wose 2002

Wulugu we Waisilayeli ne wa Mowabu

¹ Mu mwaka we yikumi na munana wo wuteme wa Yehoshafati u mutemi wa Yuda, nayo Yolamu u mwana wa Ahabu, ho yatemela mu wa Isilayeli, Yolamu yakatema myaka yikumi na myejete mu Samaliya.

² Ninga yakamusutizya Muwaha Mulungu. Hamba nhavivyo si yali mubi muno nho sogwe Ahabu, hamba nho nyina Yezebeli. Mwene Yolamu yacikumulanga cihwani cono sogwe yacinoza so wuhembelo wa Baali.

³ Ninga hamba nhavivyo, nayo yakawanoza Isilayeli, waketuma wubi, nha vyono yawasutizya mutemi Yelobowamu u mwana wa Nebati, mono yamulongolela kutema. Nawo wakajendelela du kumusutizya Mulungu hamba kuleka yaye.

⁴ Nayo Mesha u mutemi wa Mowabu, yali mudima ngholo, nayo yakawa yakumupela mwaka na mwaka, Ahabu u mutemi wa Isilayeli, cipegwa ca ngholo elufu yigana limonga, hamonga no wusinga wa ngholo elufu yigana limonga.

⁵ Ninga Ahabu mutemi wa Isilayeli yali yeza kufwa, hodu, nayo Mesha yakawa kuwagaluka Waisilayeli.

⁶ Nayo Yolamu yakawuka kamonga mu Samaliya. Yakalikongholela hamonga lipuga lyakwe lyose lye wasilikale wo wulugu.

⁷ Yakatuma munhu kuli Yehoshafati u mutemi wa Yuda, yabite yakamulonjele yatye, “Mesha u mutemi wa Mowabu yakondya kungaluka, holeka nghukulomba wuze cilunze nane, cibite cikamuhome. Wule kowa wiwikanize?” Nayo Yehoshafati u mutemi wa Yuda, yakamupitula yakatya, “Heya nalumba, ane nili mu miwoko yako du, hamonga ne wanhu wangu, hamonga ne zifwalasi zangu zose.

⁸ Ninga alu cokola nzilaci ho cikawahome?” Yolamu yakamupitula yakamutya, “Cokolela nzila nhali yono yikoleye mu mbago ya Edomu.”

⁹ Hodu mutemi Yolamu hamonga no mutemi wa Yuda, no mutemi wa Edomu, wakatuluka wose hamonga. Nawo wali weza kujenda muhinzo wa vilo mupunghati, wakawa wasina malenga so weneco ne mapuga ge wasilikale wawo, hamonga ne zinimu zono zali ziwadinghuliye mitegulo yawo.

¹⁰ U mutemi Yolamu yakazoza yakutya, “Nye! Alu langa ho cawona wusungu! Hambi Muwaha Mulungu, nha yakondya kucitajila ase co watemi wadatu, mu miwoko yo mutemi wa Mowabu!”

¹¹ Ninga Yehoshafati u mutemi wa Yuda yakawuza yakatya, “Alu mwene nye, baha hasina muwizi mono cosuma kumwitumamila yaciwuzize kuli Muwaha Mulungu?” U mwitumami monga wa Yolamu u mutemi wa Isilayeli yakapitula yakatya, “Yali baha Elisha u mwana wa Shafati, mono yali yo mutazi wa Eliya.”

¹² U mutemi Yehoshafati yakapitula yakatya, “Ayo Elisha yo muwizi we mbeka.” Hodu watemi wose vyono wadatu, wakawa kumubitila Elisha.

¹³ Nayo Elisha yakamutya Yolamu u mutemi wa Isilayeli, “Wubite wukawawuze wawizi wono sogo Ahabu hamonga no nyina yako Yezebeli wawawuzaga.” Ninga Yolamu yakapitula yakatya, “Ng'o ye Elisha! Hambi Muwaha Mulungu nha kakondya kucitajila mu miwoko yo mutemi wa Mowabu.”

¹⁴ Elisha yakapitula yakatya, “Nane nghwilahiza hali Muwaha Mulungu mumi, nha vyono hono yali yiwe si mwilunzize na ayu Yehoshafati u mutemi wa Yuda mono nimogopile, si nali nghuhulice zono wukulonga.

¹⁵ Ninga alu mundetele mutowa lisumbi.” Nayo mutowa lisumbi yali yeza kutowa lisumbi lyakwe, i vilungo vyo Muwaha Mulungu vikamuziza Elisha,

¹⁶ yakawa kulonga yakatya, “Muwaha Mulungu yakutya nhavi, ‘Muhimbe makweme makweme mwilolo lili lyose.

¹⁷ Nanye hamba simowona mbeho hamba mvula yitonya, langa lilolo lili lyose lyomema malenga gose, nanye hamonga ne zimitugo zenyu, ne zinimu zono zikudinghula mitegulo yenyu, wose motuga malenga menji muno muno go kung'wa.’ ”

¹⁸ Elisha yakajendelela kulonga yakutya, “Kanyhi mumanye vyono nghani yiyi yo mhelu du ku witumwa no Muwaha Mulungu, na vyono komupelenyi wusume sunga na kuli Wamowabi.

¹⁹ Nanye mogateka sunga ne makaya gawo gose maswanu, gono gena ne magomawakali. Moyitemanga sunga ne mibici yawo yose ye mikalo, moyidinda ne mivwilo yawo yose ye malenga. Moyihodanga no kuyilundila mabwe migunda yawo yose yono yina moso.”

²⁰ Nawo, wali weza kwela mitondo yaco, hakali mitondo, mu vipango vye nhondo zose vyo kulavizya likumbiko, hodu malenga gakaza gakuhuluma gakulawilila ku lubavu lwa ku Edomu, gakalimemya lilolo lyose.

²¹ Nawo Wamowabi wali weza kuhulika nha vyono i watemi wadatu wakuza kuwahoma, hobaho, wanhu wose walume, wawaha ne wadodo wono wali wanojeye mu wihomi, wakakongholwa wose, wakawikwa ha mupaka.

²² Nawo wali weza kwinuka, i mitondo yaco hakali mitondo, lizuwa likawa limulice mucanyha ye malenga, likaganoza malenga gakawa kwijela madunghu nha sakami.

²³ Nawo wakazoza wakutya, “Nye! Ayilya sakami. Yikwijela nha vyono gago mapuga madatu ge wasilikale wo wulugu gewulaga geneco gose! Holeka alenyi cibite cikayitece nghambi yawo!”

²⁴ Ninga wali weza kuyisejelela nghambi, i Waisilayeli wakawahoma wakawawinga. Nawo Waisilayeli, wakajendelela kuwatyatya no kuwawinga Wamowabi, akuno wakuwawulaga mumo mu nzila,

²⁵ no kugongomeza makaya gawo. Na lono wakolaga mu migunda yawo, Waisilayeli wose wagumilaga mabwe, wakugalunda mumo mu migunda, sunga nhondo migunda yose yikamema mabwe gose. Wakayidinda ne mivwilo yose ye malenga, wakayitemanga sunga ne mibici yawo yose ye mikalo. Na hanyuma, likawa lisigaye likaya liwaha lya Kili-halesi, ninga nawo i watowa ne zinhago, wakalipilima nalyo, wakaliteka.

²⁶ Nayo mutemi wa Mowabu yali yeza kumanya nha vyono yasumwa mu wulugu, hobaho yakasola wanhu magana mupunghati wono wena mimaje, yakajela yapulute kwa vilungo haciligati ye walugu wakwe yeponye, yabite ko mutemi wa Siliya, ninga hamba si yasuma yaye.

²⁷ Hobaho yakamusola u mwanagwe, u mulongozi kulelwa, mono yali yo munya kuhala wutemi wakwe, yakawa kumulavya yikumbiko mucanyha ye lijinji lye likaya, kuli mulungu we Wamowabi. Nawo Waisilayeli wali weza kuziwona zizo, wakogofywa muno, hodu wakalileka likaya, wakawuya ku yisi yawo.