2 Samwili 9 - Luganuzi Luswanu Kuli Wanhu Wose 2002

Dawudi na Mefibosheti

¹ Na mwi'zuwa linji, Dawudi yawuza yakutya, “Wulenyi! Hoyuli yunji mono yakali yasigaye mumi mu mhuga ya Sawuli? Vyono hono yawe yali baho ane nghusaka nimunozeze wuswanu ku soko yo wuswanu wa Yonazani wono yanhendela.”

² Na baho hakawa ho yuli munhu mono yacemwaga Ziba, mono yali mwitumami we mhuga ya Sawuli. Yuyo yakalonjelwa nha vyono yabite kuli Dawudi. Nayo mutemi Dawudi yali yeza kumuwona yakamuwuza yakatya, “Ati, yo gwegwe Ziba?” Nayo Ziba yakamupitula yakatya, “Heya, yo nene no mwitumami wako.”

³ Nayo mutemi Dawudi yakamuwuza yakatya, “Ati, wule, howa ho yuli yunji mono yakali yasigaye mumi mu mhuga ya Sawuli, mono ane nosuma kumunozeza wuswanu nha vyono namwihuwiza Mulungu?” Ziba yakamupitula mutemi yakamutya, “Ho yuli yu monga muli wana wa Yonazani mono yakali yasigaye. Ninga yali citewe.”

⁴ Mutemi yakamuwuza yakatya, “Alu yali hayi?” Ziba yakatya, “Mwana yuyo kekalaga ku kaya kwa Macili u mwana wa Amiyeli ako ku Lodebali.”

⁵ Mutemi Dawudi yakawa kutuma munhu yakamulete.

⁶ Nayo Mefibosheti u mwana wa Yonazani, kanyhi yo mwizukulu wa Sawuli, yali yeza kufika, yakenama kwe cogopo ha mwande yo mutemi Dawudi. Nayo mutemi Dawudi yakamucema yakatya, “Mefibosheti.” Nayo Mefibosheti yakedika yakatya, “Ane nili baha muwaha no mwitumami wako.”

⁷ Mutemi Dawudi yakamutya, “Alu, wulece kogopa, hambi ane nha nokunozeza wuswanu ku soko yo wuswanu wono yanhendela u sogo Yonazani. Ane nokugomolela yisi yose yono yali yisi yo kukuyo Sawuli. Nagwe kowa kulya zindigwa hamonga nane ha meza yangu nhondo zose.”

⁸ Nayo Mefibosheti yakenama kanyhi, yakatya, “Gwe muwaha wangu, ane nha si nghwiliye cinji co cose, hamba si nhe libwa lyono lifwiye! Alu nhawule 'gwe wunhendele viswanu nhavivi?”

⁹ Ninga mutemi Dawudi yakawa kumucema Ziba u mwitumami wa Sawuli, yakamutya, “Ane nakondya kumukombolela Mefibosheti u mwizukulu wo muwaha wako Sawuli, i vinhu vyose vyono vyali sawo ya Sawuli, hamonga ne mhuga yakwe.

¹⁰ Holeka alu, gwegwe go mweneco, hamonga ne wanago, hamonga ne wetumami wako, mubite mukawalimile mugunda we mhuga ya Sawuli u muwaha wenyu. Nanye kolo mwadudula, muwapele zindigwa. Ninga langa ayu Mefibosheti, kowa kulizana nane zindigwa, ha meza yangu nhondo zose.” (Nayo Ziba yali yena wana we cilume yikumi na wahano, hamonga ne wetumami makumi mejete.)

¹¹ Ziba yakapitula yakatya, “Gwe mutemi, ane nokwituma nha vyono wulajilize go Mutemi.” Na ku wulawilila baho, hodu Mefibosheti, yakajendelela kulya zindigwa ha meza hamonga no mutemi, yakawa nha yumonga we wana wo mutemi.

¹² Nayo Mefibosheti yali yena mwanagwe mudodo we cilume mono yacemwaga Mika. Ne we mhuga yose ya Ziba, wakawa wetumami wa Mefibosheti.

¹³ Mwene Mefibosheti mono yali yalemaye migulu yose vyono myejete, yekalaga mu Yelusalemi du, yakulya zindigwa zose ha meza, wakulizana hamonga no mutemi Dawudi.