2 Samwili 8 - Luganuzi Luswanu Kuli Wanhu Wose 2002

Dawudi yakusuma mu milewo

¹ Kukawa hanyuma ya zizo, u mutemi Dawudi yakawahoma kanyhi Wafilisiti, yakawasuma. Yakawawusiza lukulu wutemi wawo wa mu yisi.

² Hanyuma kanyhi, yakawasuma Wamowabi. Yakawa kuwalambalila i wafungwa mu micilili. Hanyuma yakawa kuwawulaga wafungwa wejete wejete mu wulawa mu wafungwa wadatu wadatu. Na wawo i wo yumonga yumonga wono wasigala muli wawo wadatu wadatu, yakawaleka womi. Yakawanoza Wamowabi wawe wetumami wakwe, wakawa kumulipa sunga ne kodi.

³ Hanyuma kanyhi Dawudi yakamuhoma Hadadezeli u mutemi wa Siliya ya Zoba, u mwana wa Lehobu, lono Hadadezeli yabitaga ho yegomolezeze u wutemi wakwe we yisi, he 'kolongo lya Efulata.

⁴ Baho Dawudi yakawateka wasilikale wa Hadadezeli, i wapanda fwalasi, waficile elufu monga na magana mupunghati, hamonga ne wasilikale wajenda ne migulu, waficile elufu makumi mejete. Yakasola fwalasi, liwalo lyono lyali likwiliye ku wukwega matuka yigana limonga, go wulugu. Ne zifwalasi zose zono zasigala, yakazidumulanga matimba gazo.

⁵ Nawo Washamu wanya Siliya ya ku Damesiki, wakawategula wasilikale, wakamutaze mutemi Hadadezeli, ninga Dawudi yakawahoma Washamu yakawawulaga wanhu waficile elufu makumi mejete.

⁶ Hanyuma yakawa kusita ne nghambi ye wasilikale wakwe mu yisi yawo. Washamu wakawa wetumami wakwe, wakawa wakumulipa sunga ne kodi. Nayo Muwaha Mulungu yakamupela Dawudi wusume wuwaha muno hanhu hose.

⁷ Dawudi yakaziteka zingula zose ze zahabu zono zali zidinghuywe ne walongola wa Hadadezeli, yakazitegula zose ku Yelusalemi.

⁸ Yakasoleleza hamonga ne shaba nyinji muno, yono yali yili mu Beta na Belotayi i makaya ga Hadadezeli.

⁹ Nayo Towi u mutemi wa Hamati, yakahulika nha vyono mutemi Dawudi yagasumiza mapuga gose ge wasilikale wa Hadadezeli.

¹⁰ Hodu yakawa kumutuma Yolamu u mwanagwe, yabite yakamulamuse mutemi Dawudi, no kumuhonjeza so wusume wakwe wono yakondya kumusuma Hadadezeli, mono vyekalaga vikulewana nayo kenji na kenji. Nayo Yolamu yakawa kumutegulila mutemi Dawudi hamonga ne vipegwa vye zahabu, na fweza, hamonga ne shaba.

¹¹ Nayo mutemi Dawudi yakavisiwanula ho viwe kwitumamilwa mu wuhembi, hamonga ne zifweza ne zizahabu zono yali yakondya kuzisola ku wulawa mu makungugo gono yagasuma, ge,

¹² Waedomu, Wamowabi, Waamoni, Wafilisiti, hamonga ne Waamaleki, hamonga ne zisawo zinji zono yaziteka kuli Hadadezeli u mutemi wa Zoba.

¹³ Mutemi Dawudi, yaketujila yilumbo yiwaha muno muno, lono yawuyaga ku wulawa kuwahoma no kuwawulaga Waedomu, waficile elufu yikumi na munana mwi'lolo lyo mwino.

¹⁴ Yakasimya nghambi nyinji ze wasilikale wakwe mu yisi yose ye Waedomu. Ne Waedomu wose wakawa wetumami wakwe. Nayo Muwaha Mulungu yakamupela mutemi Dawudi wusume wuwaha muno hanhu hose.

¹⁵ Mutemi Dawudi yakatema mu Isilayeli yose, yakayinoza mikalile ye wanhu wakwe yiwe yili mu ling'ani na mu mbeka.

¹⁶ Nayo Yowabu mu nghalo nyina mono yacemwaga Zeluyiya, yuyo yali yo muwaha we wasilikale wo wulugu. Nayo Yehoshafati u mwana wa Ahiludi, yakawa yo mulanjilizi we vikumbucizo vye zinghani.

¹⁷ Nayo Zadoki u mwana wa Ahitubu, hamonga na Ahimeleki u mwana wa Abiyatali, awa wakawa wo wakohani. Nayo Selaya yakawa yo mwandici we libalaza.

¹⁸ Benaya nayo u mwana wa Yehoyada, yakawa yo mulanjilizi we cipuga ce wasilikale, wono wamudimaga mutemi Dawudi, nawo i wana wa Dawudi, wakawa wo wakohani.