2 Samwili 6 - Luganuzi Luswanu Kuli Wanhu Wose 2002

Lisanduku lye Cilagane likugomolwa ku Yelusalemi

¹ Dawudi yakawakonghola kanyhi i wasilikale vitung'ati muli Waisilayeli, wali waficile elufu makumi madatu liwalo lyawo,

² yakawa kuwategula ku Bala, mu yisi ya Yuda, ho wakalisole Lisanduku lyo Mulungu lye Cilagane, mono litambulilwagwa litagwa lyo Muwaha Mulungu we mihanga vilungo, mono kekalaga mucanyha ye makelubi.

³ Wakalisola mu kaya ya Abinadabu mwi'tunda, wakalipaciza mucanyha yo mukokoteni mupya. Nayo Uza hamonga na Ahiyo i wana wa Abinadabu wo wakawa watonji wo mukokoteni wuwo.

⁴ Nayo Ahiyo yo yali yalongoye ku mwande.

⁵ Dawudi hamonga ne wa Isilayeli wose, wavinaga akuno wakwimba kwe vilungo vyawo vyose, wakumupela cogopo Muwaha Mulungu. Akuno wakutowa ne masumbi, ne zindonondo ne misesele, ne zi kayamba, hamonga ne zimbilili.

⁶ Nawo wali weza kufika ha cuga ca Nakoni, zing'ombe zikakobala, Uza yakawusejelela mukokoteni, yakalibata Lisanduku lye Cilagane.

⁷ Muwaha Mulungu yakamukolelwa likuwo muno mono Uza, yakawa kumuwulaga so wikumhilici wakwe. Uza yakawa kufwila baho ha mhelo ye Lisanduku lye Cilagane.

⁸ Ne hanhu baho hakacemwa “Pelezi-uza” sunga nalu. Dawudi yakatuga wusungu, vyono Muwaha Mulungu kamulipiciza Uza kwe 'kuwo.

⁹ Hobaho Dawudi, yakawa kumogopa Muwaha Mulungu, yakawa kutya, “Alu ho nosuma nhawule kulisola Lisanduku lye Cilagane?”

¹⁰ Hodu, yakawa kudumula nghani nha vyono yalece kulisola yalitegule ku Yelusalemi. Holeka yakawa kulitegula mu kaya ya Obedi Edomu u munyawusi we likaya lya Gati.

¹¹ Nalyo likekala mu kaya yiyo myezi midatu. Nayo Muwaha Mulungu yakamulugutiza muno Obedi Edomu hamonga na we mhuga yakwe wose.

¹² Mutemi Dawudi yakahulika vyono Obedi Edomu hamonga na we mhuga yakwe wose, Muwaha Mulugu yakondya kuwalugutiza, hamonga ne vinhu vyawo vyose vyono wena navyo, ku soko ye Lisanduku lye Cilagane. Hodu Dawudi yakawa kuliwusa Lisanduku lye Cilagane mu kaya ya Obedi Edomu, yakawa kulitegula ku Yelusalemi hamonga ne nyemo mbaha.

¹³ Nawo i wanhu wono wali walidinghuye Lisanduku lye Cilagane, wali weza kuwa watelatela nghanzo mutandatu, Dawudi yakawa kuwemya, yakawa kumulavizya Muwaha Mulungu likumbiko lye ng'ombe, hamonga ne nyana ye ng'ombe yono yijinile.

¹⁴ Baho Dawudi yali yetunjile du mwenda mu ciwino, yakuvina kwe vilungo vyakwe vyose, yakumupela cogopo Muwaha Mulungu.

¹⁵ Hanyuma mwene hamonga ne Waisilayeli wose, wakawa kulitegula Lisanduku lye Cilagane ku Yelusalemi, akuno wazozize so nyemo, hamonga ne mazi ge zindulele.

¹⁶ Nalyo Lisanduku, lono lyenjilaga mwi'kaya, Mikali mwana we cicekulu wa Sawuli, yali yemile he 'dilisha yalanjiliye, hanyuma yakawa kumuwona mutemi Dawudi vyono, yakuzumhazumha yakuvina hali Muwaha Mulungu. Hodu mwene mikali yakawa kumubedegala mu nhumbula yakwe.

¹⁷ Wakawa kulileta Lisanduku, wakaliwika mwihema lyono Dawudi yali yaliwikanize so mulimo wuwo. Hanyuma, yakalavya makumbiko, hamonga ne vilavywa vyo mulamu, kuli Muwaha Mulungu.

¹⁸ Nayo yali yeza kukondya ku wulavya makumbiko, hobaho yakawa kuwalugutiza wanhu mwi'tagwa lyo Muwaha Mulungu mono yali vilungo,

¹⁹ yakawagawila wanhu wose ne zindigwa. Yakawagawila Waisilayeli wose, walume ne wacekulu mukate monga monga, hamonga na mhonje ya nyama nghasice, hamonga ne zizabibu zi nghavu. Hanyuma wose wakawa kuwuya ku zikaya zawo.

²⁰ Hanyuma Dawudi yakawa kwinjila mu kaya yakwe, ho yawalamuse we mhuga yakwe. Nayo Mikali yakawa kumuhinjiliza, akuno yakutya, “Izuwali mutemi we Waisilayeli kenozeza litagwa yiwaha muno muno. Hambi nha kegubula no kwilajila nha munhu mulele, ha meso ge wetumami we cicekulu, we wetumami wakwe!”

²¹ Nayo Dawudi yakatya, “Ane nali kuvina ho nimupele cogopo Muwaha Mulungu mono yahagula ho halile ho sogo, hamonga na we mhuga yakwe yose, yakanoza niwe mulongola we wanhu wakwe Isilayeli. Holeka nane nojendelela du kuvina ho nimupele cogopo Muwaha Mulungu.

²² Nane lu, ho nocila kwikoza cevu nili wene. Nagwe ku lubavu lwako, kosuma kwihwesa vyono ane si nili cinji yaye, ninga wahinza wawano wocila kumhela yilumbo yiwaha!”

²³ Mikali u mwana we cicekulu wa Sawuli, yali mugumba yasina wana sunga yakafwa.