2 Samwili 5 - Luganuzi Luswanu Kuli Wanhu Wose 2002

Dawudi yakuwa mutemi wa Isilayeli na Yuda

¹ Hanyuma, we milango yose ya Isilayeli wakawa kumuziza Dawudi ku Hebuloni, wakamutya, “Ase cili sakami monga na gwegwe,

² hamba baho katali lono Sawuli yali yakali yacitemile, agwe wawalongozaga i wanhu wa Isilayeli ku wulugu. No Muwaha Mulungu yakwihuwiza vyono agwe yo kowalongoza wanhu wakwe Waisilayeli, na kanyhi yo kowa wuli mutemi mu Isilayeli.”

³ Holeka i walongola wose we Waisilayeli, wakamuziza mutemi Dawudi kuko ku Hebuloni. Nayo yakanoza cilagane nawo hali Muwaha Mulungu, nawo wakamwitila mafuta, yakawa mutemi wa Isilayeli.

⁴ Dawudi yali yaficile myaka makumi madatu lono yatemela, nayo yakatema myaka makumi mane.

⁵ Hebuloni ku Yuda yakatema myaka mupunghati na myezi mutandatu. Namo mu Yelusalemi, yakatema wanhu wa Isilayeli hamonga na Yuda myaka makumi madatu na midatu.

⁶ Vyali vyeza kupuluta vilo vilo, mutemi Dawudi hamonga ne wanhu wakwe wakawa kutuluka wakayihome Yelusalemi. Hambi i Wayebusi wono wekalaga mumo, nha wehwesaga nha vyono Dawudi si kosuma kulisola likaya lya Yelusalemi, holeka wakawa kumutya, agwe hamba si kosuma kwinjila bahano, hambi 'gwe waco, i wabofu na wono wakusenzegula, nha wo wokuwinga du.

⁷ (Ninga Dawudi yakasola ligomawakali lyawo lya Sayuni, sunga likamanyika vyono lyo “Likaya lya Dawudi.”)

⁸ Na mwi'zuwa lilyo Dawudi yakawalonjela wanhu wakwe yakatya, “Wulenyi, bahano ho yuli munhu mono yawasulile Wayebusi, nha vyono ane niwasulile, yabite yawawulaje? Ale yalowocele mu cikwelelezi ce malenga yakawahome wawo wabofu no wono wakusenzegula.” (Na yiyi yo soko yono yilekaga wakutya, “Iwabofu na wono wakusenzegula, siwokwinjila mu nyumba yo Muwaha Mulungu.”)

⁹ Wali weza kulisola ligomawakali, hodu, Dawudi yakawa kwikala mumo, yakalicemela, “Likaya lya Dawudi.” Mwene yakawa kuzenga likaya likalipilima, yakanziza Milo i hanhu hono henuce ku lubavu lwa kucilima ye litunda sunga mugati yayo.

¹⁰ Nayo Dawudi yakajendelela kuwa ne vilungo vilo vyose, hambi u Muwaha Mulungu we mihanga, nha yali yali hamonga nayo.

¹¹ Ale, Hilamu u mutemi wa Tulo, yakatuma kuli Dawudi wanhu, yakamutegulila ne zimbawo ze mibici yo muhagata, hamonga ne waselemala, ne wanghula wo kusesa mabwe, ho wakamuzenjele Dawudi likaya lyo wutemi.

¹² Nayo Dawudi ho yakamanya vyono Muwaha Mulungu yamuwika yawe mutemi we Waiilayeli, na vyono kanyhi yawumotyaga wutemi wakwe nha vyono wanhu weneco wendaga.

¹³ Nayo Dawudi yali yeza kuhama ku wulawa ku Hebuloni yakubita ku Yelusalemi, yakacila kwisolela wajitulwa ne wacekulu, na mu nzila yiyo, yalela wana wenji we cilume na we cicekulu.

¹⁴ Ne wana wono walelelwa kuko ku Yelusalemi wo awa: Shamuwa, Shobabu, Natani, Solomona,

¹⁵ Ibihali, Elishuwa, Nefegi, Jafiya,

¹⁶ Elishama, Eliyada, na Elifeleti.

Wafilisiti wakusumwa

¹⁷ Nawo Wafilisiti wali weza kulonjelwa nha vyono Dawudi yetilwa mafuta yawe mutemi wa Isilayeli, hodu i wasilikale wawo wo wulugu, wakawa kwiwikaniza ho wakamutece. Ninga nayo Dawudi yakazihulika zizo, yakawa kubita kwinjila kwigomawakali.

¹⁸ Nawo i Wafilisiti wakawa kubita mwi'lolo lya Lefayimu, wakawa kulisola.

¹⁹ Dawudi yakamuwuza Muwaha Mulungu yakatya, “Nosuma kubita nghawahome Wafilisiti? Wule komhela wusume hono mbite?” Nayo Muwaha Mulungu yakamutya, “Heya wubite, nane nokupela wusume!”

²⁰ Hodu Dawudi yakawa kubita ku Baali Pelazimu. Nako kuko yakawasuma Wafilisiti, yakawa kutya, “Muwaha Mulungu kawapongholeza i walugu wangu kotya yihwazi lya malenga.” Holeka hanhu baho hakacemwa “Baali-pelazimu.”

²¹ Nawo Wafilisiti wakatiza, wakavileka vihwani vyawo vye milungu. Nayo Dawudi hamonga ne wanhu wakwe wakaviwusiza lukulu.

²² Hanyuma kanyhi i Wafilisiti wakabita kwi'lolo lya Lefayimu wakalisola.

²³ Dawudi yakamuwuza kanyhi Muwaha Mulungu, nayo Muwaha Mulungu yakamutya, “Ninga wulece kuwahomela ku lubavu luluno, langa wupilime, wiwikanize ho wuwahome ku wulawilila ku lubavu lulo luyagwe behi ne mibici ye mikulo.

²⁴ Nagwe kolo wukuhulika lizi, lilawiliye ku visonje vye mibici yiyo ye mikulo kotya wanhu wakujenda, ale wahungucilaje Wafilisiti wuwahome, hambi ane nha nowa nghulongoleye kumwande yako, niwasume lipuga lye wasilikale we Wafilisiti.”

²⁵ Nayo Dawudi yakazinoza zose, nha vyono Muwaha Mulungu yalajiliza, nayo yakasuma kuwawinga Wafilisiti ku wulawilila ku Geba sunga ko ku Gezeli.