2 Samwili 4 - Luganuzi Luswanu Kuli Wanhu Wose 2002

Ishibosheti yakuwulagwa

¹ Nayo Ishibosheti u mwana wa Sawuli, yali yeza kuhulika vyono Abineli yakondya kuwulagwa ku Hebuloni, mwene yakenjilwa no woga muno, ne Waisilayeli wose wakagazika muno mu mahweso gawo.

² Ishibosheti yali yena wetumami wejete wono wali wo walongola we cipuga, matagwa gawo, yumonga yali Bana, na we kejete yali Lekabu, i wana we wa Limoni munya Beeloti, wa mu mulango wa Benyamini. (Yisi ya Beeloti, yawalwagwa yo monga ne yisi ya Benyamini.

³ I Wabeloti wanya wu'si, wali wakondya kutiziza ku Gitayimu, kono wekaye sunga nalu.)

⁴ Ale, Yonazani u mwana wa Sawuli, yakawa yena mwana wa cilume yalemaye, litagwa lyakwe Mefibosheti. Mwene Mefibosheti yali yaficile myaka mihano, lono zinghani ze lifwa lyo sogwe Yonazani hamonga no kukuye Sawuli zawaziza ku wulawa kwi'kaya lya Yezeleli, u mukoci wakwe yakamudinghula yakawa kumutizya. Ninga vyono yali yasunhile, Mefibosheti yakasulumhuka mu mawoko yakagwa hasi, yakatuga cilema.

⁵ Hodu Lekabu hamonga na Bana, wakawa kutuluka, wakawa kumubitila Ishibosheti, ku kaya yakwe, wakafika baho mu misi mugati, wakamwagana Ishibosheti yacehile.

⁶ Nayo mucekulu mono yali yali ha mulango vyono yali yena yifwefwe lya nhongo, lono yasenyenhaga ngano, hodu yakawa yagona nhongo. Nawo wa Lekabu hamonga na Bana wakawa kwinjila mu nyumba.

⁷ Wakawa kuhelela lwa kamonga mu cumba cono yagonaga Ishibosheti, wakamwagana yagonile nhongo nzito, wakawa kumuwulaga. Wakawa kuwudumula mutwe wakwe, wakawusola, wakawa kujenda cilo cose wakoleye mwi'lolo lya Yoludani.

⁸ Wakawa kumutegulila Dawudi u mutwe kuko ku Hebuloni, wakawa kumutya, “Lanje awu ahano mutwe wuwo Ishibosheti u mwana wa Sawuli u mulugu wako, mono yasakaga yakuwulaje. Ninga izuwali Muwaha Mulungu kamulipiciza Sawuli hamonga no lulelo lwakwe.”

⁹ Nayo Dawudi yakawapitula yakawatya, “Nane nghwilahiza hali Muwaha Mulungu mumi, mono yamhonya mu zimbali zose!

¹⁰ U munhu mono yanyiziza ku Zikilagi, yakawa kunonjela ze lifwa lya Sawuli, yehwesaga vyono yakundetela nghani zono zonyendeza. Nane nghawa kumwibata, nghawa kumuwulaga. Hambi cico, nha co cali co cambuzi cakwe cono namupela so zinghani zakwe ziswanu!

¹¹ Hambi nha yowa vibi muno kuli wanhu wabi, wono wakumuwulaga munhu we ling'ani, lono yali mu nhongo, mu nyumba yakwe! Holeka nane aluno nomulipicizenyi, vyono nanye mumuwulaje. Na kanyhi nomongomezezenyi lukulu mu wusu we yisi!”

¹² Hodu, hobaho Dawudi yakawa kulajiliza, nawo wasilikale wakwe wakawa kuwawulaga Lekabu hamonga na Bana. Wakawa kuwadumula miwoko ne migulu, wakawa kuyitumbika mucanyha, behi ne lilamba lya ha Hebuloni. Wakawusola mutwe wa Ishibosheti, wakawuzika mu citenjelo ca Abineli baho ha Hebuloni.