2 Samwili 3 - Luganuzi Luswanu Kuli Wanhu Wose 2002

¹ Ninga wulugu kuli wono wamutazaga Sawuli na kuli wono wamutazaga Dawudi wakajendelela vilo vinji. Na ku soko yiyo, Dawudi yakacila kuwa na vilungo muno, ninga i watyatyi wa Sawuli wakacila muno kuwa wasina vilungo.

I wana we cilume wa Dawudi

² I wana we cilume vyono wali mutandatu, wose vyono wali wetyatizye mu ndelwa yawo, wose walelelwa ku Hebuloni, nawo wo awa: Amunoni munghalo nyina Ahinowamu munya Yezeleli,

³ na we kejete Kileyabu munghalo nyina Abijeli mono yali mugolece wa mwazi Nabali munya Kalimeli, na we kadatu, Abusalomu munghalo nyina Maka, u mwana wo mutemi Talimayi mutemi wa ku Geshuli.

⁴ We 'kane Adoniya munghalo nyina Hagiti, we'hano Shefatiya munghalo nyina Abitali,

⁵ wo mutandatu, Iteleyamu munghalo nyina Egila. Ne wana wawa wose we cilume walelelwa ku Hebuloni.

Abineli wakwilunza na Dawudi

⁶ Ne milewo yacilaga kujendelela hagati ye wanhu wa Dawudi ne wanhu wono wali wamuhulice Sawuli. Abineli yakacila muno kuwa ne vilungo ku lubavu lwe wanhu wa Sawuli.

⁷ Ninga mwi'zuwa linji, Ishibosheti mwana wa Sawuli yakamuhosa Abineli, so wugona no mujitulwa wa Sawuli mono yacemwaga Lizipa, mwana we cicekulu wa Aya.

⁸ Ne nghani yiyi yikamukalaza muno muno Abineli, yakawa kutya, “Alu agwe Ishibosheti, wukwihwesa ane nomugaluka Sawuli? Alu agwe wukwihwesa vyono ane mbeka nili ku lubavu lwa Yuda? Ane ku wulawa mwamulizo, njendeleye kuwa ne cihuliko kuli sogo Sawuli, ne wanduguze, hamonga ne weyendi wayagwe. Nane nali njendeleye du kukwitumamila, ku wulawa lono Dawudi yakusumila. Ninga hamba nhavivyo izuwali agwe wukusonjeza vyono ane nili musutyi ku soko vyono nagona no mucekulu!

⁹ Ninga wumanye, Muwaha Mulungu yamwihuwiza Dawudi, vyono kowuwusa wutemi ku wulawa mu nyumba ya Sawuli ne zindelo zakwe,

¹⁰ nayo komunoza Dawudi yawe mutemi we hanhu hose kuli Isilayeli, na kuli Yuda, ku wulawilila ku mhelo ye yisi, sunga ko ku lubavu luyagwe. Nalu Mulungu yambulagaje, hono ndece kuzinoza zizi ziwe za mbeka!”

¹¹ Baho Ishibosheti yakawa kumogopa muno Abineli, hamba si yasuma kanyhi kumupitula nghani yo yose.

¹² Hobaho Abineli yakawa kutuma munhu kuli Dawudi. Nayo Dawudi lulo yali yakali ku Hebuloni, yakamulonjele yatye, “Alo nani mono kosuma kuyitema yisi yiyi? Ane nghukunena cilumbanizaje nane, nane nghutaze niwapitule Waisilayeli wakutyatye gwegwe.”

¹³ Dawudi yakamupitula yakatya, “Heya viswanu, ninga nonoza cilagane nagwe mu nghani monga, wunojeye wumulete Mikali u mwana we cicekulu wa Sawuli kono kwangu kolo weza kuza kunamusa.”

¹⁴ Baho Dawudi yakawa kutuma wanhu wabite wakamulonjele Ishibosheti watye, “Nghombolelaje mugolece wangu Mikali, mono namutolela cigumo ca nzunga yigana limonga ze Wafilisiti.”

¹⁵ Baho Ishibosheti yakawa kubita kumusola Mikali kuli Palitiyeli, u mwana wa Layishi, u mulume mono yali yamutola.

¹⁶ Nayo Palitiyeli yakawa kumutyatilila mu nyuma, akuno yakulila, vikafikana sunga ko kwi'kaya lya Bahulimu. Ninga Abineli yakamutya Palitiyeli, “Gwe Palitiyeli, wu wuye ku kaya.” Nayo Palitiyeli yakahulika, yakawa kuwuya.

¹⁷ Abineli yakawa kuwabitila i walongola we Waisilayeli, yakawa kuwatya, “Anye Waisilayeli, ku wulawa katali mwamusakaga Dawudi yo yawe mutemi wenyu.

¹⁸ Alu aci co cilejeho cenyu. Kanyhi mukumbucile nha vyono Muwaha Mulungu yalonga yakatya, ‘Nomwitumamila u mwitumami wangu Dawudi, yawaponye wanhu wangu Isilayeli mu miwoko ye Wafilisiti na mu miwoko ye walugu wawo wose.’ ”

¹⁹ Abineli yakawalonjela nhavivyo ne wanhu we mbeyu ya Benyamini. Hanyuma yakawa kubita ku Hebuloni, yakawa kumulonjela Dawudi ze wanhu wa Benyamini, na ze wanhu wa Isilayeli, vyono wose wawona vyono nghani yiyi yowa swanu.

²⁰ Abineli yakawa kubita kuli Dawudi kuko ku Hebuloni, hamonga ne wanhu makumi mejete. Nayo Dawudi yakawanozeza ndigwa nyinji za Sikukuu.

²¹ Hanyuma Abineli yakawa kumulonjela Dawudi yakutya, “Ane nobita nghakukongholele Isilayeli wose wawe mu wutemi wako, cilagane na gwegwe, wuwe mutemi wawo. Nagwe ho kosuma kutuga co cose cono kowa kucisaka, kanyhi koyitema yisi yose.” Nayo Dawudi yakawa kumwihuwiza Abineli vyono kokwikala yapolile. Hodu yakawa kumukombola yabite.

Abineli yakuwulagwa

²² Hanyuma, Yowabu hamonga ne wetumami wanji wa Dawudi wakawuya wakulawa ku wulugu, wakawa waleteleze ne vinhu vinji vyono waviteka kuko. Ninga lulo, Abineli yali yakondya kuwuka hali Dawudi, baho ha Hebuloni, hambi Dawudi nha yali yakondya kumukombola yabite, yakondya no kumwihuwiza nha vyono kokwikala yapolile.

²³ Ninga Yowabu yali yeza kufika hamonga ne wanhu wakwe, yakalonjelwa nha vyono Abineli u mwana wa Neli yali yali baha ko mutemi Dawudi. Nayo mutemi Dawudi kamukombola yabite, kanyhi kamwihuwiza nha vyono kokwikala yapolile.

²⁴ Hobaho baho Yowabu yakawa kumubitila mutemi Dawudi, yakawa kumutya, “Alu yiyi yo nghanici yono wunozize? Alu Abineli nha yali yaza kono kwako, nhawule kanyhi kumuleceleza kawa kubita?

²⁵ Hambi Abineli nha kaza kukukonga du, ho yaziwone zako zose zono wukwituma, kanyhi yamanye na kono wukubita. Nagwe zizi mbeka wuzimanyile!”

²⁶ Hobaho Yowabu yali yeza kuwuka ha mwande ya Dawudi, yakawa kuwatuma wanhu wabite wakamulete Abineli. Nawo wakamwagana he sima lya Sila, wakawa kumuleta. Ninga Dawudi, zizi si yali yazimanyile yaye.

²⁷ Abineli yali yeza kufika du ku Hebuloni, hodu Yowabu yakawa kumukwejela ha mhelo ye lilango lye likaya, yakawa kwinoza nha kotya yakusaka kulongana nayo cinyele, baho yakawa kumuhoma munda, yakawa kufwa. Abineli yawulagwa na Yowabu, vyono Abineli yamuwulaga Asaheli u nduguye wa Yowabu.

²⁸ Nayo Dawudi yali yeza kuzihulika zizo, yakatya, “Muwaha Mulungu yo yamanyile zangu zose, vyono ane hamonga no wutemi wangu, sina wubi wo wose mwi'fwa lya yuyu Abineli.

²⁹ Holeka wulipicizwe we lifwa lili, wuweze muli Yowabu hamonga na we mhuga yakwe yose! Na mu lulelo lwakwe lose, mu vilo vyose, mowa mo yuli munhu yunji mu wanhu wakwe, wa mu nyumba yakwe, mono kowa yena kaswende, hamba wukoma, hamba mono yakujendela makome, hamba mono yawulagwe ku wulugu, hamba mugaya ndigwa!”

³⁰ Ale, Yowabu na Abishayi mwanakwawe, wamuwulaga Abineli, vyono yamuwulaga mwana kwa wawo Asaheli ha Gibeyoni ku wulugu.

Abineli yakuzikwa

³¹ Dawudi yakawa kumulonjela Yowabu, hamonga ne wanhu wakwe wademulanje myenda yawo, wavwale magunila, wamulilile Abineli. Na lono wabitaga mu mazishi, mutemi Dawudi, yali yalityatizye munyuma lisanduku lyono wali wadinghuliye muwili wa Abineli.

³² Wakamuzika Abineli ku Hebuloni, no mutemi Dawudi yakalila muno ne lizi yiwaha baho ha citenjelo, sunga ne wanhu wose wakabocelela, nawo wakalila muno.

³³ Nayo Dawudi yakemba lono yamulililaga Abineli, yakatya, “Alu nhawule Abineli kafwa nha vyono wafwizaga i walele?

³⁴ Miwoko yakwe si yali miwopwe, migulu yakwe nayo si yali miwope ne manyolo yaye. Kafwa nha munhu mono yabenile wulajilize!” Ne wanhu wakacila muno kumulilila kanyhi Abineli.

³⁵ Na mu misi yose wanhu waswa wakumupepeleza Dawudi yalye ndigwa, ninga mwene yakelahiza yakutya, “Mulungu yambulagaje hono nilye cinhu co cose lono lizuwa likali si naswa!”

³⁶ Nawo wali weza kuzihulika zizi, hodu, wakendezwa nazo. Sunga na muli zose zono yetumaga mutemi, mbeka zikawendeza muno wanhu.

³⁷ I wanhu wa Dawudi, sunga ne Waisilayeli, nhondo ho wakawa kumanya vyono mutemi Dawudi, yasina nghani yo yose 'mbi, mwi'fwa lya Abineli.

³⁸ Mutemi Dawudi yakawa kuwalonjela wetumami wakwe yakutya, “Alo si mukwizuka vyono izuwali, u mulongola muwaha wa mu Isilayeli kakondya kufwa?

³⁹ Na nene no mweneco hamba niwe nahagulwa no Mulungu niwe mutemi, ninga nghuhulika wusocele wuwaha muno muno izuwali. Ne wana wawa we cilume wa Zeluya, wakamu muno kuli'ne. Ale, Muwaha Mulungu yawalipicize so wubi wawo!”