2 Samwili 24 - Luganuzi Luswanu Kuli Wanhu Wose 2002

Dawudi yakusola liwalo lye wanhu

¹ Muwaha Mulungu, yakawakolelwa likuwo kanyhi Waisilayeli, yakawa kumunoza Dawudi yawagaze. Muwaha Mulungu yakamulonjela Dawudi yakatya, “Alu wubite wukawawale wanhu wa Isilayeli na wa Yuda.”

² Nayo Dawudi yakawa kumulajiliza Yowabu u muwaha we wasilikale wakwe, yakamutya, “Alu wupilime mu yisi yose hamonga ne wetumami wako, mukawale wanhu we zimbeyu zose ze Waisilayeli ku wulawilila ku lubavu lumonga lwe yisi, sunga ko ku lubavu luyagwe. Nghusaka manye liwalo lyawo.”

³ Ninga Yowabu yakamupitula mutemi yakatya, “Gwe Mutemi, u Muwaha Mulungu, u Mulungu wako, yakawonjeleze wanhu wa Isilayeli kali cigana, wawe wenji kuciza na vyono wenha aluno, nagwe wuwumipe sunga wuziwone zizi zikwitumwa. Ninga socici lu Gwe go Mutemi wukuhila kwituma zizi?”

⁴ Ninga mutemi yakawanoza Yowabu hamonga ne wetumami wakwe sunga wamuhulice. Hodu wakawuka ha mwande yakwe, wakawa kubita kuwawala Waisilayeli.

⁵ Wakalowoka likolongo lya Yoludani, wakasita nghambi yawo ku lubavu lwa kutakama ye Aloweli, likaya lyono lili haciligati ye lilolo, mu yisi ya Gadi. Na ku wulawilila baho, wakawakubita ku lubavu lwa kusumuka ku Yezeli.

⁶ Wakajendelela sunga ko ku yisi ya Gileyadi, sunga ku Kadeshi, mu yisi ye Wahiti. Hanyuma wakabita ku yisi ya Dani, na ku wulawa ku yisi ya Dani, wakabita ku lubavu lwa kumwezi, ku Sidoni.

⁷ Hanyuma wakadoma ku lubavu lwa kutakama sunga ko kwi'kaya lya Tulo lye magomawakali. Wakajendelela sunga wakadoma mu makaya gose ge Wahiti ne Wakanani. Na ku ndumilizo wakabita ku Belisheba, ku lubavu lwa kutakama lwe yisi ya Yuda.

⁸ Wayipilima yisi yose myezi cenda na vilo makumi mejete, wakawa wawukondya mulimo wawo. Hodu wakawa kuwuya ku Yelusalemi.

⁹ Wakawa kumulonjela mutemi Dawudi liwalo lye wanhu wa Isilayeli walume wono wakwiliye mu mulimo wo wusilikale, waficile elufu magana munana. Wanhu wa Yuda nawo, waficile elufu magana mahano.

¹⁰ Ninga Dawudi yali yeza kubocela liwalo lye wanhu, hodu ciselinji cakwe cikanza kumugaza, yakawa kumulonjela Muwaha Mulungu yakatya, “Gwe go Muwaha Mulungu, ane nituma wubi so wituma zizi zo kuwala wanhu! Alu nghukunena wunenele, hambi nha nituma zo wulele muno muno.”

¹¹ Nayo Muwaha Mulungu yakamulonjela Gadi u muwizi wa Dawudi, yakamutya,

¹² “Wubite wukamulonjele Dawudi vyono, ane nghumupela nghani yidatu, zono nghumusaka mwene yahagule nghani monga du muli zizo yidatu. Nane nomutendela nha vyono mwene kohagula.”

¹³ Nayo Dawudi yali yeza kwinuka hakali mitondo, Gadi yakawa kumuziza, yakawa kumulonjela nha vyono Muwaha Mulungu yateye. Gadi yakamuwuza Dawudi yakatya, “Alu ya hayi yono kokwenda? Yiwe nzala mu yisi yako myaka midatu, hamba myezi midatu wuwe kutiza ha mwande ye walugu wako, hamba vilo vidatu vye lihuhuji mu yisi yako? Ale wihwesaje wumhele lipitulo lyono nomugomelela Muwaha Mulungu.”

¹⁴ Nayo Dawudi yakamupitula Gadi yakatya, “Alu ane nenjilwa na mahwele mawaha muno muno! Kanyhi hamba si nendile ndipicizwe ne wanhu. Holeka yili ciba Muwaha Mulungu yo yacilipicize mweneco, hambi mwene nha yali lusungu.”

¹⁵ Hodu Muwaha Mulungu yakaleta lihuhuji muli wanhu wa Isilayeli, nalyo likajendelela ku wulawa hakali mitondo yiyo, sunga mwi'daha lyono Muwaha Mulungu yali yatemizye, nalyo nhondo ho likawa kuwuka. Wakafwa mu yisi yose Waisilayeli waficile elufu makumi mupunghati.

¹⁶ Nayo malayika wo Muwaha Mulungu yali yeza yali behi no kuyongomeza Yelusalemi. Ninga Muwaha Mulungu yakawukawaniza wuhile wakwe wo kuwalipiciza wanhu. Holeka yakamulonjela malayika mono yawawulagaga, yakamutya, “Hodu lu wulece! Zakondya zizo zono wetuma!” Nayo malayika yali yali behi ne cuga ca Alawuna u Muyebusi.

¹⁷ Nayo Dawudi yamuwona malayika mono yawawulagaga wanhu, holeka yakawa kumulonjela Muwaha Mulungu yakamutya, “Gwe go Muwaha Mulungu, ane nili musutyi muno, hambi nha netumila zizi mwidindimila lyangu. Alu i wanhu wawa nawo wasutya nghanici lo? Alu yali yiwe yili ciba le, wali wandipicize nene no mweneco hamonga ne mhuga yangu.”

¹⁸ Na mwi'zuwa lilyo du, Gadi yakamubitila Dawudi, yakamulonjela yakatya, “Alu wubite sunga ku cuga ca Alawuna, wukamuzenjele cikumbicilo baho u Muwaha Mulungu.”

¹⁹ Nayo Dawudi yakawa na cihuliko kuli Muwaha Mulungu, yakawa kubita nha vyono yalonjelwa na Gadi.

²⁰ Nayo Alawuna yali yeza kulanga nhavi, yakamuwona mutemi Dawudi hamonga ne wetumami wakwe, wakumuziza. Hobaho Alawuna yakegumila hasi ha mwande ya mutemi Dawudi,

²¹ yakawuza yakatya, “Gwe Mutemi, alu nhawule wuli bahano?” Dawudi yakamupitula yakamutya, “Ane niza nicigule cuga cako, nimuzenjele Muwaha Mulungu cikumbicilo, ho lihuhuji liwuce.”

²² Nayo Alawuna yakamupitula yakamutya, “Gwe Mutemi, wucisolaje du, wumulavizye Muwaha Mulungu co cose cono kokwenda gwegwe. Ahano hozili azi zing'ombe, zono kosuma kumulavizya Muwaha Mulungu cilavywa cinyanywe mu cikumbicilo. Kanyhi kosuma kusola ne viya vyo kutwanjila, hamonga no lubano lwe zing'ombe ziwe zo ngwagu.”

²³ Alawuna yakamukombolela mutemi vinhu vivyo vyose, yakamutya, “Ale Muwaha Mulungu, u Mulungu wako, yacibocele cilavywa cako.”

²⁴ Ninga mutemi nayo yakamupitula yakamutya, “Aa, ng'o! Ane novigula vivi vyose kuli'gwe, hambi nha si nosuma kumulavizya Muwaha Mulungu cilavywa cono si nicibahuciye yaye.” Hobaho Dawudi nhondo yakawa kucigula cuga, hamonga ne zing'ombe, yakalavya fweza makumi mahano.

²⁵ Yakamuzenjela Muwaha Mulungu cikumbicilo, yakamulavizya cilavywa cinyanywe, hamonga ne cilavywa co mulamu. Nayo Muwaha Mulungu yakawupitula nhondo no wulombe wakwe, ne lihuhuji likawa kuwuka muli Isilayeli.