2 Samwili 23 - Luganuzi Luswanu Kuli Wanhu Wose 2002

Nghani za Dawudi ze ndumilizo

¹ Dawudi mwana wa Yese, yo munhu mono Mulungu yamupela lilumbo yiwaha muno. Yo munhu mono u Mulungu wa Yakobo yamuhagula yawe mutemi, kanyhi yo munhu mono yali yo mutula zinyimbo mu Isilayeli. Ne zinghani zakwe ze ndumilizo zozi.

² “Muhe wo Muwaha Mulungu walonga kuli'ne, ne nghani yili mu mulomo wangu.

³ Mulungu wa Isilayeli yalonga, u mudimi wa Isilayeli yanonjela yakatya, ‘Mutemi mono katemaga kwe ling'ani, mono katemaga mu cihuliko kuli Mulungu,

⁴ yehwanile lizuwa lyono likudula hakali mitondo, lizuwa lyono liganozaga mahanze gawa kucindika lono gatonyelwa na mvula.’

⁵ Nhavivyo vyo Mulungu kowalugutiza we zindelo zangu, hambi nha yanoza nane cilagane ce cibitilila. Hamonga no wilumbanize wono si wulabeneka yaye, no wihuwizo wono si wulapituka yaye. Hambi nha wo wilowe wangu, vyono kowa kusumila. No Mulungu nayo mbeka kofisiliziza zose.

⁶ Ninga i wanhu wabi, wotagwa nhe mamivya, hasina munhu mono kowapamiza ne miwoko.

⁷ Langa yowa yikunojeye witumamile mwibato wa cuma, hamba mugoha, nawo holeka wokongojezezwa lukulu.”

Wasilikale wa Dawudi i watambule

⁸ Aga go matagwa ge wasilikale wa Dawudi iwatambule: Mulongola yali Yoshebu Bashebeti, munya Takemoni, mono yali yo mulongola muwaha we “Wadatu.” Yuyu Yoshebu yehoma na wanhu magana munana, yakawawulaga wose ko mugoha wakwe mu wulugu wuwo,

⁹ Nayo mono yakutyatya muli wawa we citung'ati wadatu yali Eleyezali u mwana wa Dodo we mhuga ya Ahohi. Mwi'zuwa linji, mwene yuyu Eleyezali hamonga na Dawudi, wawasowa Wafilisiti wono wali wekonghola ku wulugu. Waisilayeli wakawuya ne nyuma.

¹⁰ Langa mwene Eleyezali, yakema cilumelume, yakajendelela kwihoma ne Wafilisiti, hamba si yasuma kuwulecela mumaje. Muwaha Mulungu yaketujila wusume wuwaha muno muno mwi'zuwa lilyo. No wulugu wali weza wamalika, i Waisilayeli nawo ho wakawa kuza kuli Eleyezali, wakawa kuwahambula wono wafwiye, no kuvisola i vinhu vyawo.

¹¹ Ne citung'ati we kadatu, yali Shama u mwana wa Aje munya Halali. Nawo Wafilisiti wali wekongholeye ha Lehi, ha mugunda we zinandala. Waisilayeli wakatiza ha mwande ye Wafilisiti.

¹² Ninga mwene Shama, yakema cilume-lume haciligati yo mugunda, yakakamisa, yakawawulaga Wafilisiti. Muwaha Mulungu yaketujila wusume wuwaha muno muno mwizuwa lilyo.

¹³ I vilo vye nhwanga, lono vyali vyeza vili behi, i vitung'ati wadatu wa muli walongola “Makumi madatu” wakabita ku mhango ya Adulamu kono kwali ko yuli Dawudi, lono nawo i Wafilisiti wali wasitile nghambi yawo mwi'lolo lya Lefayimu.

¹⁴ Na mwipango lilyo, mwene Dawudi yali yali mwigomawakali mwitunda, nayo mhuga ye Wafilisiti wali wayisola Betelehemu.

¹⁵ Baho nayo Dawudi yakawa yakuhulika cisukwa ciwaha kukaya, yakawa kuwalonjela wayagwe yakatya, “Nye wayangu, ane nali nyende, hono yunji yali yabite yandetele malenga go kung'wa, ga mwi'sima lya ha mulango we likaya lya Betelehemu!”

¹⁶ Hobaho wawalya i vitung'ati wadatu wakawa kutuluka, wakawabitila Wafilisiti ku nghambi yawo, wakanega malenga ga mwi'sima, wakamutegulila Dawudi. Ninga nayo hamba si yagang'wa yaye, langa yali yeza kugabocela, yakagamwaga hasi, cikawa nha cilavywa kuli Muwaha Mulungu.

¹⁷ Hanyuma yakawa kutya, “Gwe go Muwaha Mulungu, ane si nosuma hamba hadodo kugang'wa malenga gaga! Hambi nha yowa nha nghung'wa sakami ye wanhu wawa wono wesuzize wumi wawo?” Hodu hamba si yagang'wa yaye. Ne zinghani zizi ze citung'ati, zo wanoza wawalya wasilikale wadatu watambule.

¹⁸ Nayo Abishayi nduguye wa Yowabu (u nyina yawo yacemwaga Zeluya.) Mwene Abishayi yakawa yo mulongola muwaha mutambule we “Watambule vitung'ati makumi madatu.” Nayo yakehoma na wanhu magana madatu, yakawawulaga wose ko mugoha wakwe. Holeka nayo yakawa mwi'walo lye “Watambule vitung'ati wa walya i wadatu.”

¹⁹ Ninga mwene yakawa yo mutambule muno muli wawalya we “Makumi madatu.” Yakawa yo mulongola wawo. Ninga hamba nhavivyo, si yali mutambule muno muno kotya awalya “Watambule vitung'ati wadatu i walongozi.”

²⁰ Hakawa na musilikale yunji kanyhi mutambule, mono yacemwaga Benaya, u mwana wa Yehoyada, munya Kabizeli, nayo yuyuno, yetuma nghani nyinji ze citung'ati, hamonga no kuwawulaga wasilikale vitung'ati wejete we Wamowabi. Mwi'zuwa linji yenjila mwikombo mu vilo vye seluji yakawulaga lisimba.

²¹ Kanyhi mwi'zuwa linji yamuwulaga Mumisili, munhu wo muwili muwaha. Yuyo Mumisili yali yebate no mugoha wakwe mu muwoko. Mwene Benaya yali yena shale du, ninga yakamusukula Mumisili mugoha wono yali yebate, yakamuhoma no mugoha wuwo, yakamuwulaga.

²² Na gago gali go metumo ge citung'ati gono yetuma Benaya, nayo yakawa yumonga wa awalya vitung'ati “Wadatu.”

²³ Mwene Benaya yakawa mutambule si nha awalya we “Makumi madatu.” Ninga si yali mutambule kotya awalya vitung'ati “Wadatu.” Nayo Dawudi yakamuwika yawe yo muwaha muli wadimi wakwe wono wamudimaga.

²⁴ Ne watambule wanji wa muli wa walya vitung'ati we makumi madatu, wowa: Asaheli u nduguye wa Yowabu, hamonga na Elikana u mwana wa Dodo, munya Betelehemu.

²⁵ Shama na Elikana wanya Halodi.

²⁶ Helezi munya Peleti na Ila u mwana wa Ikeshi munya Tekowa.

²⁷ Abiyezeli munya Anatoti na Mebunayi munya Hushahi.

²⁸ Zalemoni munya Ahohi na Mahalayi munya Netofati.

²⁹ Holebu u mwana wa Bana munya Netofa na Itayi u mwana wa Libayi munya Gibeya ya Benyamini.

³⁰ Benaya munya Pilatoni, na Hidayi munya malolo behi na Gashi.

³¹ Abiyaliboni munya Alaba na Azimaveti munya Bahulimu.

³² Eliyaba munya Shaliboni, i wana wa Yashini, na Yonazani.

³³ U mwana wa Shama munya Halali na Ahiyamu u mwana wa Shalali, munya Halali.

³⁴ Elifeleti u mwana wa Ahasibayi munya Maka, na Eliyamu u mwana wa Ahitofeli munya Gilo.

³⁵ Hezilo munya Kalimeli, na Palayi munya Walabu.

³⁶ Igali u mwana wa Natani munya Zoba, na Bani munya Gadi.

³⁷ Zeleki munya Amoni, na Nahalayi munya Beeloti, u mudinghuzi we vitwalo vya Yowabu u mwana wa Seluya.

³⁸ Ila na Galebu wanya Yatili.

³⁹ Uliya u Muhiti. Hali howali wasilikale watambule makumi madatu na mupunghati wose hamonga.