2 Samwili 22 - Luganuzi Luswanu Kuli Wanhu Wose 2002

U lwimbo lwa Dawudi lwo wusume

¹ Na lono Muwaha Mulungu yali yakondya kumusumila Dawudi kuli Sawuli na kuli walugu wakwe wanji. Hodu Dawudi yakawa kumwimbila Muwaha Mulungu lwimbo alu yakatya,

² “Muwaha Mulungu wo wutizizo wangu, lyo ligomawakali lyangu lye vilungo.

³ Mulungu wangu wo wutizizo wangu, nane nikaye mholile muli mwene. Yakuwa kunyhitila kotya ngula, kandimaga no kumbika mholile. Kanyhi yo mukombozi wangu, kanyhitilaga no kumhonya mu zimbali.

⁴ Nimulililaga Muwaha Mulungu, nayo kamhonyaga muli walugu wangu. Muwaha Mulungu yalumbwe!

⁵ “Hambi i mawingo ge lifwa, nha gali gamhilime, ne mahwazi go wongomezwe, gakunghola mucanyha yangu.

⁶ Ne zimbali ze lifwa zali zimhilime, ne mitego ye lifwa yali yinhejeze nene.

⁷ Na mu wugaye wangu nghamucemeleza Muwaha Mulungu, nghamucemeleza Mulungu yamhele wutazi. Na mu Nyumba yakwe yakalihulika lizi lyangu, yakacihulika cililo cangu co kulondola wutazi.

⁸ “Yisi nayo yikasinjisika, yikacicima, ne misinji ya ku wulanga yikatinuka, yikasinjisika vyono Mulungu yali yena likuwo!

⁹ Lyosi likakomoka mu mhula zakwe, malambi go wutakamize, hamonga no moto we makala, vikalawa mu mulomo wakwe.

¹⁰ Yakawudemula wulanga, yakatima hasi hamonga ne citi ciwaha ce mavunde ha magulu gakwe.

¹¹ Yakagulucila mwi'Kelubi yakajendela mu mabawa ge mbeho.

¹² Yakegubika no wutitu, mavunde mazito, gamemile malenga gamupilime.

¹³ Makala go moto gakaka, ha wuzelu wa ha mwande yakwe.

¹⁴ Hanyuma u Muwaha Mulungu yatowa lididimo ku wulawa ku wulanga, ne lizi lyo Mulungu mono Yalawiliciye, likahulikwa.

¹⁵ Yakazigumila zisonga zakwe, yakaweyagaza walugu wakwe, yakawawinga ko wumwekule we limuli.

¹⁶ Lilenga likanyazwa, hakawa hakavu, no musinji we yinze wukawa wuli mwazi, lono yawakalipila walugu wakwe, no kuwakolomela kwe likuwo lyakwe.

¹⁷ “Muwaha Mulungu yakatima hono hasi ku wulawa kucanyha, yakanyibatiliza, yakamhonya mu wulawa mu malenga menji.

¹⁸ Yamhonya mu miwoko ye walugu wangu we vilungo, na kuli wose wono wasulile.

¹⁹ Na lono nali nili mu wugaye, walugu wangu wakanyiziza, ninga Muwaha Mulungu yakamhonya.

²⁰ Yakamhonya ku wulawa mu mbali, yamhonya vyono yali yendezwe nane.

²¹ “Muwaha Mulungu kahumbilizaga, vyono nane nitumaga zo wiling'ano, kandugutizaga, hambi nha sina masutya.

²² Hambi nane nha nilikamisaga lilajilizo lyo Muwaha Mulungu nghali hamba sinamugaluka Mulungu wangu.

²³ Nane niwukamisaga wulajilize wakwe, nghali nagabeza ne malajilizo gakwe.

²⁴ Kanyhi yamanyile vyono ane sina masutya, ngheyimila ho ndece kusutya.

²⁵ Muwaha Mulungu kahumbilizaga, vyono nane nitumaga zo wiling'ano, hambi nha yamanyile vyono ane sina masutya.

²⁶ “Gwe go Muwaha Mulungu, agwe wuli mwihuwilwa kuli wono wehuwilwa kuli gwe, kanyhi wuli muswanu muno kuli wose wono wali mugoloka.

²⁷ Agwe welile kuli wono welile, ninga wuwasulile i wanhu wabi.

²⁸ Agwe kuwaponyaga i wenenenyhezi, ninga kuwanyetyaga wono wakwikumya.

²⁹ Gwe go Muwaha Mulungu, yo gwegwe go wuzelu wangu, kumbusizaga wutitu hali'ne.

³⁰ Kumhelaga vilungo vyo kwihomela ne walugu wangu, kanyhi kumhelaga wusume wo kugazumha majinji gawo.

³¹ Nzila zo Mulungu, za mugoloka ne zinghani zakwe za mbeka. Mwene wo wutazi kuli wono wakutiziza kuli mwene.

³² “Nayo Muwaha Mulungu, yo Mulungu du yali wene, Mulungu du yali wene yo mudimi wetu.

³³ Mulungu yuyu lyo ligomawakali lyangu, yo kanhongaga mu nzila yo mugoloka.

³⁴ Kaganozaga magulu gangu gawa nha ga nhemanyika, kanghamisaga mholile mu matunda.

³⁵ Kanyijizaga zinzila zo wihomi mu wulugu, ho sume kuwitumamila wupinde wono wukamile.

³⁶ Gwe go Muwaha Mulungu, wunhaze kanyhi wumhonye, hambi wutazi wako nha wamhela lukumyo.

³⁷ Wanhaza lono nali nhecigwe hamba nghali nagwa hasi yaye.

³⁸ Nghawalonda i walugu wangu nghawongomeza, nane sinolecela lukulu, sunga kolo nawongomezeza lukulu.

³⁹ Nghawagwisa hasi, hamba si wosuma kwinuka kanyhi, heya, wagwa hasi ye magulu gangu.

⁴⁰ Kumhelaga vilungo mu milewo, hamonga no wusume kuli walugu wangu.

⁴¹ Wukawanoza walugu wangu watize ha mwande yangu, niwongomezeze lukulu wono wasulile.

⁴² Wakalondola wutazi, ninga hamba si wamutuga mono kowaponya. Wakamucemeleza Muwaha Mulungu, ninga nayo hamba si yawapitula yaye.

⁴³ Nane nghawapondanga, wakawa nhe manghundi, nghawakanyanjila nha nhope ya mu nzila.

⁴⁴ “Agwe wanhaza mu miwoko ye wanhu wangu wagaluci, wukanghamisa niwe muwaha mu makungugo, ne wanhu wono nali si niwamanyile, alu woweza wetumami wangu.

⁴⁵ Ne wanhu wajenzi, wakunyinamila, na lono nghulonga, wakuhulika.

⁴⁶ Nawo vilungo vyawo vyakondya kumalika, alu wakuza wakucicima, wakulawa mu magomawakali gawo.

⁴⁷ “Muwaha Mulungu yo mumi! Yalumbwe u mudimi wangu! Ale, mwanze zo wuwaha wakwe, u Mulungu mono yali vilungo mono kamhonyaga!

⁴⁸ Hambi nha kamhelaga wusume muli walugu wangu, kawacepulaga vilungo makungugo ha mwande yangu,

⁴⁹ kanyhi kamhonyaga kuli walugu wangu. Gwe go Muwaha Mulungu, kumhelaga wusume kuli walugu wangu, kanyhi kunyitilaga ne wanhu wabi.

⁵⁰ “Holeka nane nghukulumbila mu makungugo, kanyhi nolimbila ne litagwa lyako.

⁵¹ Mulungu kamupelaga wusume mutemi wakwe, kalajilaga lusungu lwakwe luwaha kuli mono yamuhagula, kuli Dawudi hamonga ne wanagwe cibitilila.”