2 Samwili 21 - Luganuzi Luswanu Kuli Wanhu Wose 2002

I wana wa Sawuli wakuwulagwa

¹ Mu vilo vyo wutemi wa Dawudi, yikagwa nzala mbaha muno, yikasola myaka midatu. Nayo mutemi Dawudi, mwaka na mwaka, yamuwuzaga Muwaha Mulungu so nghani yiyo. Nayo Muwaha Mulungu yakamupitula yakatya, “Sawuli hamonga ne mhuga yakwe, wena wubi wo wuwulaji, hambi nha yawawulanga wanhu wa ku Gibeyoni.”

² (I wanhu wa ku Gibeyoni si wali Waisilayeli, langa wali wali cipuga cidodo du ce Waamoli, wono Waisilayeli wehuwiza nha vyono wowadima. Ninga Sawuli yakasaka yawongomeze, ku soko yo wivu wakwe, kuli wanhu wa Isilayeli ne wanhu wa Yuda.)

³ Holeka Dawudi yakawawuza i wanhu wa ku Gibeyoni yakawatya, “Alu mosaka nimutendelenyi wule ho noze wilamule so nghani zono mwanozezwa, nanye ho musume kuwalugutiza i wanhu wo Mulungu?”

⁴ Nawo Wagibeyoni wakapitula wakatya, “Wugombane wetu na Sawuli hamonga ne mhuga yakwe, si wosuma kulamulwa mu nzila ya fweza hamba zahabu, hamba si cosaka munhu wo wose wa muli Isilayeli yawulagwe.” Dawudi yakawawuza kanyhi yakatya, “Alu cinhuci cono mukwihwesa cono ndahile kumutendelenyi?”

⁵ Nawo Wagibeyoni wakatya, “Wumanyile! Sawuli yali yena wuhile yaciwulaje ase wose, yalece kusigala hamba yumonga mumi, mu yisi yose ya Isilayeli.

⁶ Holeka aluno cikukunena wuwalavye wa muli wanagwe we cilume mupunghati nase cowatumbicila hali Muwaha Mulungu kuko ku Gibeya mwikaya lya Sawuli u mutemi muhagulwa wo Muwaha Mulungu.” Mutemi Dawudi yakawatya, “Ale nowalavya.”

⁷ Ninga mutemi Dawudi yakamusigaza Mefibosheti, u mwana wa Yonazani, kanyhi yo mwizukulu wa Sawuli, ku soko yo wihuwize wono weyihuwiza mwene na Yonazani.

⁸ Langa, yakawasola Alimoni na Mefibosheti i wana we cilume wejete, wa Lizipa u mwana we cicekulu wa Aya, wono vyalelana na Sawuli. Yakasola kanyhi ne wana we cilume wahano, wono wali walelwe no mwana we cicekulu wa Sawuli, mono yacemwaga Melabi, mono yalelwa na Adiliyeli, u mwana wa Balizilayi u munya ku Mehola.

⁹ Dawudi yakawalavya kuli wanhu wa Gibeyoni. Nawo Wagibeyoni wakawatumbika mucanyha ye litunda hali Muwaha Mulungu, mu vilo vye nhwanga, lono wadudulaga shayili. Nawo wose vyono wali wali mupunghati, wakafwa wose lwa kamonga.

¹⁰ Hanyuma Lizipa u mujitulwa wa Sawuli u mwana we cicekulu wa Aya, yakasola magunila, yakenozeza lihema mucanyha ye litalawe, behi ne mivimba yiyo. Nayo yakekala kuko ku wulawilila mu vilo vivyo vye nhwanga, sunga mvula yikatonya. Nayo mu misi, yekalaga yakwamila zindeje zilece kusejelela ha mivimba. Na mu cilo, yamilaga malimu galece kuza ha mivimba.

¹¹ Nayo Dawudi yali yeza kuzihulika zono Lizipa yetumile,

¹² hodu, yakawa kubita kugasola mafupa ga Sawuli, hamonga na go mwanagwe Yonazani ku wulawa kuli wanhu wa Yabeshi ku Gileyadi. (Hambi nha wali wagahiza mu nzila ya Beti Shani, lono Wafilisiti wayitumbicila miwili, mwizuwa lono wamuwulajila Sawuli mwitunda lya Gilibowa.)

¹³ Ale, Dawudi yakagasola mafupa ga Sawuli, hamonga ne mafupa ga Yonazani, yakagakongholeza hamonga ne mafupa ga wa walya wanhu mupunghati wono watumbikwa.

¹⁴ Hanyuma wakawa kubita kugazika mafupa ga Sawuli, na ga Yonazani mu citenjelo co sogwe Kishi, ku Zela, mu yisi ya Benyamini. Nazo zizo zose zikanozwa nha vyono mutemi Dawudi yalajiliza. Hanyuma nhondo nayo Mulungu, ho yakawa kwanza kuwupitula wulombe wawo ku soko ye yisi yawo.

Wulugu we Wafilisiti ne Waisilayeli

¹⁵ Kukawa kanyhi no wulugu, i Wafilisiti wakawa kwihoma ne wa Isilayeli. Dawudi hamonga ne wanhu wakwe wakawahoma Wafilisiti. Na mu mapango ganji, Dawudi yakawa yakatala muno muno.

¹⁶ Linhu linji litali muno muno, lyono lyacemwaga Ishibibenobu, lyono lyali lina mugoha wa shaba, wuzito wayo wali wuficile kilo yidatu na nusu. Kanyhi lyali livwalile mu ciwino calyp mumaje mupya, lyehwesaga limuwulaje Dawudi.

¹⁷ Ninga Abishayi u mwana wa Zeluya, yakaza musunho yamutazilize Dawudi. Abishayi yakalihungucila lilyo linhu litali, yakaliwulaga. Hanyuma ya zizo, i wanhu wa Dawudi wakamulonjela Dawudi, vyono yalecele lukulu kubitana nawo kanyhi ku wulugu. Wakamutya, “Agwe yo gwegwe witumbilo we Waisilayeli, holeka si yowa nghani swanu hono cikwajilize.”

¹⁸ Wali weza kupuluta wulugu wuwo, kukawa kanyhi no wulugu wunji wo kwihoma ne Wafilisiti ku Gobu, kono nayo Sibekayi munya Husha, yakaliwulaga kanyhi linhu linji litali, lyono lyacemwaga Safu.

¹⁹ Hakawa no wulugu wunji kanyhi wo kwihoma ne Wafilisiti kuko ku Gobu, kono Elihanani u mwana wa Yayili, munya ku Betelehemu, yamuwulaga Goliyati u Mugiti, mono yali yena mugoha wono wali wina nghome nghangazi muno muno winha mucici wa kaya.

²⁰ Kanyhi kukawa no wulugu ku Gati, nako kuko kwali kolili linhu linji litali muno, lyono lyali lyendile muno milewo. Linhu lilyo likawa lina vidole mutandatu mutandatu mu miwoko yalyo yose vyono myejete. Ne migulu yalyo nayo, yikawa yina vidole mutandatu mutandatu yose vyono myejete.

²¹ Linhu lilyo likawatovula Waisilayeli, nayo Yonazani u mwana wa Shimeya u nduguye wa Dawudi, yakaliwulaga linhu lilyo.

²² Ne manhu gago gose vyono mane, gali go go lulelo lwe manhu matali ga ku Gati, nayo Dawudi hamonga ne wanhu wakwe, wakagawulaga gose.