2 Samwili 12 - Luganuzi Luswanu Kuli Wanhu Wose 2002

Nghani yo muwizi Natani, no wunene wa Dawudi

¹ Muwaha Mulungu yakamutuma muwizi Natani kuli Dawudi. Nayo Natani yakawa kumubitila Dawudi no kumutya, “Hali na wanhu wejete wono wekalaga mwi'kaya limonga, yumonga yali mugoli, no muyagwe yakawa muciwa.

² Ayulya u mugoli, yali yena ng'ombe nyinji hamonga ne zingholo.

³ Ninga muciwa, yali yena ngholo monga du yono yali yayigulile. Yakayidima sunga yikawilucila mu kaya yakwe hamonga ne wanagwe. Nayo yakawa kuyilisa ndigwa yono yalizaga mweneco, no kuying'wesa mu cikombe cakwe mweneco, hamonga no kuyipagata. Ne ngholo yiyo yikawa nho mwanagwe we cicekulu kuli mwene.

⁴ Mwi'zuwa linji, u mugoli yakaficilwa no mujenzi. Nayo mugoli yakawona vikamu kusola ngholo yakwe monga yamuwulajile yuyo mujenzi wakwe. Langa yakawa kuyisola ngholo yiyilya monga yo muciwa, yakamuwulajila yuyo mujenzi wakwe.”

⁵ Dawudi yali yeza kuzihulika zizo, hodu yakakolwa ne likuwo muno muno, yakawa kutya, “Ane nghwilahiza hali Muwaha Mulungu mumi, vyono u munhu yuyo mono yetuma zono zinha zizi, yanojeye yafwe!

⁶ Na vyono yetuma nghani 'mbi yo wula lusungu, holeka yowa yimunojeye yamugomolele ngholo kali kane.”

⁷ Nayo Natani yakamulonjela Dawudi yakatya, “U munhu yuyo mugoli, yo gwegwe. Nayo Muwaha Mulungu u Mulungu we Waisilayeli yakutya nhavi, ‘Ane nakunoza wuwe wuli mutemi muli Isilayeli, kanyhi nghakuponya na mu miwoko ya Sawuli.

⁸ Nghakupela wutemi wakwe hamonga ne wagolece zakwe wose. Nghakunoza wuwe mutemi muli Isilayeli yose sunga na Yuda. Na hono nali mbone vyono zizi si zikukwiliye yaye, ale, nali nghonjelezeze kali kejete.

⁹ Ninga 'lu nhawule kuwubedegala wulajilize wangu? Kanyhi nhawule kwituma nghani yiyi 'mbi muno muno? Alu lanje vyono kumuwulaga Uliya ku wulugu, kuwaleka Waamoni wamuwulaje, na hanyuma kuwa kumusola sunga no mugolece wakwe!

¹⁰ Holeka ku wulawa lulu, mu zindelo zose zono zikuza, wanji wa muli wanago, wowa kufwa wufwe we magazo mawaha muno, vyono agwe kumbedegala, kanyhi vyono kumusola no mugolece wa Uliya.

¹¹ Nane nghukwilahila nha vyono, nomunoza yunji wa muli mhuga yako, yakuletele magazo mawaha. Nagwe koziwona zizo kolo nghuwasola wagolece zako, nghumupela munhu yunji, nayo munhu yuyo, kogona nawo ne misi calinze mwi'hala, ha meso ge wanhu wose.

¹² Agwe wetuma wubi wuwo cinyele, ninga ane nozituma zizo ne misi calinze, ho Waisilayeli wose wasume kuziwona.’ ”

¹³ Nayo Dawudi yali yeza kuzihulika zizo, yakapitula yakatya, “Nimusutizya Muwaha Mulungu.” Natani yakapitula yakatya, “Ale hodu, Muwaha Mulungu yakondya kukunenela, nagwe hodu, hamba si kofwa yaye.

¹⁴ Ninga alu, vyono wali wakondya kulajila cibede hali Muwaha Mulungu so wituma zimbi zizo, holeka langa u mwanago kofwa.”

¹⁵ Hodu Natani yakawa kuwuya ku kaya. Muwaha Mulungu yakamunoza yawe mutamwa muno muno u mwana mono mugolece wa Uliya yamulelela Dawudi.

U mwana wa Dawudi yakufwa

¹⁶ Dawudi yakamulomba Mulungu so mwana yuyo ho yanoje. Na mu mapango gago Dawudi yakalema kulya ndigwa. Na mu mapango ge cilo yenjilaga mu cumba cakwe, kawa yagonile hasi du sunga wokwela.

¹⁷ Ne wetumami wakwe wa mu kaya wakamubitila ho wamwinule ku wulawa baho hasi, ninga mwene yakalemela lukulu, hamba si yasaka yahanje nawo ndigwa.

¹⁸ Lyali lyeza kupuluta lijuma limonga, hodu u mwana yuyo yakawa kufwa. Nawo wetumami wa Dawudi wakogopa kumulonjela. Hambi nha wehwesa vyono, “Lono mwana yali yakali mumi, Dawudi si yali ku saka hamba no kucilonza bwete. Alu ho cosuma wule kumulonjela zo mwanagwe vyono yakondya kufwa? Lunji kolokwitamisa bwete.”

¹⁹ Nayo Dawudi yali yeza kuwawona wakwipwepwela weneco wose, yakamanya du vyono u mwana yakondya kufwa. Holeka yakawawuza yakutya, “Wulenyi, u mwana yakondya kufwa?” Nawo wakamupitula wakamutya, “Heya yakondya kufwa.”

²⁰ Nayo Dawudi yali yeza kuzihulika zizo, yakawa kwinuka ku wulawa hasi hono yali yagonile, yakehovuga, yakebaka ne mafuta, yakavwala ne myenda miswanu. Hanyuma yakawa kwinjila mu Nyumba yo Muwaha Mulungu, yakahemba. Nayo yali yeza kuwuya mwi'kulu, hobaho yakalajiliza wamunozeze ndigwa, nayo yakayilya baho baho du, wali weza kumutenjela.

²¹ I wetumami wakwe wakamulonjela wakatya, “Ase zizi hamba si cikuzimanya yaye. Vyono lono mwana yali mumi yatamigwe, agwe wali kumulilila, hamba si wali kusaka no kulya zindigwa. Ninga alu lono yakondya kufwa, nagwe wenuka no kulya zindigwa!”

²² Nayo Dawudi yakawapitula yakawatya, “Heya, ane naleka kulya nghawa kulila muno lono yali yakali mumi. Hambi nha nehwesaga vyono u Muwaha Mulungu kombonela lusungu yamulece mwanangu mumi.

²³ Ninga aluno yakondya kufwa. Alu cono coleka kanyhi ndece kulya cicici? Hambi nosuma nene kumugomolela kanyhi mwana wumi wakwe? Aa, ng'o! Langa nene no mweneco mwizuwa linji yo nolobita i hanhu hono ho yuli mwene, ninga u mwene hamba si kolombuyila 'ne lukulu.”

Solomona yakulelwa

²⁴ Dawudi yakamusindamika Betisheba mugolece wakwe, yakenjila kwakwe, yakagona nayo. Nayo yakalela mwana wa cilume. Dawudi yakamucemela litagwa lya Solomona. Muwaha Mulungu yakamwenda muno muno yuyo muzelelo Solomona,

²⁵ yakamulajiliza muwizi Natani yabite yakamupele Solomona litagwa lya Yedidiya, (Nhunizo yayo, Mono yendigwe no Muwaha Mulungu.) Vyono Muwaha Mulungu yali yamwendile.

Dawudi yakuyiteka Laba

²⁶ Nayo Yowabu yakajendelela du kwihoma ku Laba, likaya liwaha lye Waamoni. Nayo lono yali yeza yali behi no kulisola,

²⁷ yakatuma wanhu kuli Dawudi wakamulonjele watye, “Ane nakondya kulihoma likaya lye Laba, nahasola ne hanhu ha wulawo we malenga gawo.

²⁸ Holeka aluno nghulomba, wuwakongholaje hamonga i wasilikale wako wono wasigaye, wuze wulihome likaya wulisole gwegwe go mweneco. Ane si nghusaka, nene no mweneco yo nhuje lukumyo lo kulihoma no kulisola likaya.”

²⁹ Nayo Dawudi yakawakonghola wasilikale wakwe wakabita ku Laba, wakayihoma, wakayisola.

³⁰ Dawudi yakacisola cipombelo ce zahabu, cono cali civwikwe mu mutwe we cihwani co mulungu we Waamoni, mono yakucemwa Moleki, wuzito wayo wali wuficile kilo makumi madatu na yihano, naco cipombelo cico, cikawa cina ne vibwe vyo wuguzi wukamu. Dawudi yakavisola vivyo vibwe vyo wuguzi wukamu, yakaviwicila mu cipombelo cakwe mweneco. Yakasola hamonga ne vinhu vinji muno, vyono yaviteka mumo mwi'kaya.

³¹ Ne wanhu wose wono wali wali mumo mwi'kaya, yakawetumya mu milimo ye misumeno, na ye zimhandilo ze macuma, na ye zinhemo ze macuma, na yo wufyatula matofali no kuganyanya. Nayo yakawanozeza nhavivyo i wanhu wose wa mu makaya gose ge Waamoni. Hanyuma mwene hamonga ne wanhu wakwe, wakawuya ku Yelusalemi.