2 Samwili 11 - Luganuzi Luswanu Kuli Wanhu Wose 2002

Dawudi na Batisheba

¹ Nayo yali yeza kuwa mu mwamulizo wo mwaka wunji, mwi'daha lilyo, lono watemi watulucilaga wakubita ku wulugu, mutemi Dawudi yakamutuma Yowabu hamonga ne walongola, hamonga ne lipuga lyose lye wasilikale we Waisilayeli. Nawo wakabita wakawahoma Waamoni, wakaliteka likaya lya Laba. Ninga mwene Dawudi siyabita ku wulugu yaye, langa yekala du ha Yelusalemi.

² Na mwi'zuwa linji mapango ge cinyamihe, Dawudi yakenuka mu citanda cakwe, yakabita mu canyha ye litembe lye nyumba yo wutemi. Na lono yajendajendaga mumo mwi'tembe, yalanje nhavi, yakawona mucekulu yakwihovuga. No mucekulu yuyo ku wulangwe mbeka yali muswanu muno muno.

³ Hodu yakawa kutuma munhu yabite yakamanye zo mucekulu yuyo. Nayo yali yeza kumanya vyono kumbe yali Betisheba, u mwana we cicekulu wa Eliyamu, kanyhi vyono yo mugolece wa Uliya u Muhiti.

⁴ Hodu hobaho Dawudi yakawa kutuma wanhu wabite wakamulete kuli mwene. Nawo wakamuleta kuli mwene, nayo yakawa kugona nayo. (Nayo Betisheba yali ho yakulawa du mu wiyeze we vilo vyakwe vyo mwezi). Hanyuma ya zizo Betisheba yakawa kuwuya ku kaya yakwe.

⁵ Ninga hanyuma yali yeza kumanya vyono yatuga muda, hodu yakatuma munhu yabite yakamulonjele Dawudi vyono yakondya kutuga 'nda.

⁶ Nayo Dawudi yali yeza kuzihulika zizo, hodu yakawa kutuma munhu kuli Yowabu yakamutye, “Wumugomolaje kono kwangu yuyo Uliya u Muhiti.” Ale, nayo Yowabu yakawa kumugomola kuli Dawudi.

⁷ Nayo Uliya yali yeza kufika kuli Dawudi, Dawudi yakamuwuza Uliya hono Yowabu muswanu hamonga ne mapuga gose ge wasilikale, na vyono wulugu wukujendelela.

⁸ Hanyuma ya zizo, yakamutya Uliya, “Alu wubite ku kaya yako ho wukacehe hadodo.” Nayo Uliya lono yatulukaga, Dawudi yakamupela ne vipegwa so mugolece ne wanagwe.

⁹ Ninga Uliya hamba si yabita ku kaya yakwe ng'o, langa yakabita kugona ha mulango we nyumba yo wutemi, hamonga ne wadimi wo mutemi.

¹⁰ Nayo Dawudi yali yeza kuhulika vyono Uliya hamba si yawuyile kukaya yakwe, hodu yakamucema yakamuwuza yakutya, “Uliya, nha wali wuli mu muhinzo kwa vilo vinji, alu nhawule si wubitile ku kaya yako?”

¹¹ Nayo Uliya yakapitula yakatya, “Gwe mutemi, iwanhu wa Isilayeli na wa Yuda wali kutali ku wulugu, ne Lisanduku lye Cilagane nalyo lili hamonga nawo. Nayo Yowabu muwaha wangu, hamonga ne walongola wose, wali mu nghambi mwi'hala caka. Alu ane ho nosuma nhawule mbite ku kaya yangu, nghalye, nghang'we, kanyhi nghagone no mugolece wangu, lono wayangu wali mu mbago? Nghani yiyi yili mwiko. Nane nghwilahiza nha vyono, ane si nosuma kwitumila lukulu nghani yono yinha yiyo!”

¹² Nayo Dawudi yakamutya Uliya, “Ale, hodu! Wikalaje baha zuwali, i mitondo ho nokukombola wubite kanyhi ku wulugu.” Ale baho, Uliya yakawa mu Yelusalemi mwizuwa lilyo, sunga ne mitondo yaco.

¹³ Dawudi yakamucemela Uliya kulya kwakwe zindigwa ze cinyamihe. Yakamung'wesa divayi sunga yakagala muno. Ninga hamba nhavivyo, Uliya si yawuya ku kaya yakwe ng'o. Langa yakatandika libulanjeti lyakwe mu nyumba ye wadimi wo mutemi, yakagona mumo.

¹⁴ Na mwi'zuwa lye kejete hakali mitondo, mutemi Dawudi yakamwandicila Yowabu baluwa, yakamupela Uliya yamutegulile.

¹⁵ Ne baluwa yiyo yikandikwa nhavi: “Wumuwikaje Uliya ku mwande kono koyili milewo mikali muno, anye muwuye nenyuma mumulece yali wene ho yahomwe yafwe.”

¹⁶ Na mwi'pango lono Yowabu yalitekaga likaya, yakamuwika Uliya i hanhu hono yali yamanyile vyono ho howuli wulugu wukali.

¹⁷ Nawo walugu wakalawila mwi'kaya wakawahoma wasilikale wa Yowabu, sunga ne wetumami wanji wa Dawudi wakawulagwa, hamonga na Uliya.

¹⁸ Nayo Yowabu yakawa kutuma munhu kuli mutemi Dawudi, yakamulonjela zo wulugu vyono zinha.

¹⁹ Yakamulajiliza yuyo munhu yakutya, “Kolo wakondya kumuloloseza zo wulugu zose mutemi,

²⁰ nitumbiye vyono kokolwa ne likuwo yakuwuze yawe kutya, ‘Alu nhawule anye mubita sunga behi ne likaya ho muwahome? Alu si mwali mumanyile vyono wosuma kumugumenyi ne zisonga mu wulawilila mu majinji lo?

²¹ Hamba si mwakumbucila za Abimeleki u mwana wa Gideyoni vyono yawulagwa lo? Nghani yiyi, yejela ku Tebezi, kono mucekulu yagumila luzala hasi, ku wulawilila mwi'jinji mucanyha yakawa kumuwulaga. Alu nhawulenyi nanye muwa kubita sunga behi ne lijinji?’ Holeka hono mutemi yakuwuze mawuzo gaga, ale nagwe wumulonjele wutye, ‘Sunga no mwitumami wako Uliya, nayo kawulagwa nhavivyo.’ ”

²² Nayo munhu yuyo yakabita kuli Dawudi, yakamulonjela zose nha vyono Yowabu yali yamulajilize yakamulonjele mutemi.

²³ Yakamulonjela yakatya, “I walugu wetu wali wali vilungo muno wacicizize, nawo walawila kunze ye likaya ho wacihomele mwi'hala. Nase ninga ciwasumiza, ciwawinga sunga ciwafisa ha mulango we likaya.

²⁴ Hanyuma wene wawa kuciguma ne zisonga mu wulawa mwijinji, na wanji wa muli wetumami wako go mutemi, wawulagwa. Sunga no mwitumami wako Uliya, nayo kawulagwa.”

²⁵ Nayo Dawudi yakamutya yuyo munhu, “Alu wubite wukamusindamice Yowabu, wumulonjele vyono nghani yiyi yilece kumukalaza. Hambi mu wulugu mumaje nha wulizaga ayu na ayu. Na hasina munhu mono kosuma kutya, wa hayi mono kofwa ku wulugu. Wumulonjele yahidimbale kulihoma likaya sunga yalisole.”

²⁶ Nayo Betisheba yali yeza kuhulika nha vyono mulume wakwe kakondya kuwulagwa, yakamulilila muno.

²⁷ Ne vilo vye cililo vyali vyeza kupuluta, hodu Dawudi yakawa kutuma munhu yakawa kumuleta Betisheba kwi'kulu, yakawa mugolece wakwe. Nayo Betisheba yakamulelela Dawudi mwana wa cilume. Ninga Muwaha Mulungu, hamba si yendezwa ne nghani yiyi yono Dawudi yetuma.