2 Samwili 1 - Luganuzi Luswanu Kuli Wanhu Wose 2002

Dawudi yakumanyizwa zo wufwe wa Sawuli

¹ Na lono Sawuli yali yakondya kufwa, Dawudi yakawuya yakulawa kuwahoma Waamaleki, yakekala mu Zikilagi vilo vyejete.

² Na mwi'zuwa lye kete, kadatu, yakaza muzelelo yakulawilila ku nghambi ya Sawuli. Nayo yuyo muzelelo, yali yeza kufika hali Dawudi, yakawa kuvidemulanga vivwalo vyakwe, yakemwajila ne manghundi mu mutwe wakwe, yakulajila wusungu wono yali yena nawo mu nhumbula yakwe. Yakawa kusejelela hali Dawudi, yakenama ho hasi, yakulajila cogopo cakwe.

³ Nayo Dawudi yakamuwuza yakatya, “Go muzelelo, alu wukulawilila hayi hene?” Nayo muzelelo yakapitula yakatya, “Ane nhiga mu wulawa mu nghambi ye Waisilayeli.”

⁴ Dawudi yakamutya, “Ale wunonjelaje nghanici zono ziweye kuko?” Muzelelo yakatya, “Lipuga lyetu lyose lye wasilikale, wakondya kutiza ku wulugu, sunga ne wanhu wetu wenji wakondya kuwulagwa. Sawuli nayo kawulagwa hamonga no mwanagwe Yonazani.”

⁵ Dawudi yakamuwuza kanyhi yakatya, “Alu agwe ho kumanya nhawule vyono Sawuli hamonga na Yonazani wakondya kuwulagwa?”

⁶ Nayo yakatya, “Ane nali nili mwi'tunda lya Gilibowa, niwa kuwona Sawuli yawegamiye mugoha wakwe, na vyono matuka go wulugu, hamonga ne wasilikale wapanda zifwalasi we walugu wakumubitila.

⁷ Nayo Sawuli yeza kupituka, kawa kumbona, kawa kunyhema. Nane niwa kumwidika.

⁸ Kawa kumbuza yamanye nene nani, nane niwa kumulonjela vyono ane nili Mwamaleki.

⁹ Nayo kawa kunyitya, ‘Ale wuze wumbulaje, hambi nha neza nina makomele mawaha, kanyhi nili behi no kufwa.’

¹⁰ Ale, nane niwa kumubitila, niwa kumuwulaga, hambi nha manya vyono kofwa du, lulo baho kolo ya kugwa. Nane niwa kucisola cipombelo acino mu mutwe wakwe, hamonga ne bangili ya mu muwoko wakwe, niwa kuza navyo, nghuletele gwegwe muwaha.”

¹¹ Dawudi yali yeza kuzihulika zizo, hodu yakawa kuvidemulanga vivwalo vyakwe ko wukalale, sunga ne wanhu wakwe wose, nawo wakanoza nhavivyo,

¹² wakawa no wukalale wuwaha muno, wakamulilila Sawuli. Na mwi'zuwa lilyo, hamba si walya cinji yaye ku soko ya Sawuli, hamonga no mwanagwe we Yonazani, na ku soko ye wa Isilayeli, i wanhu wo Muwaha Mulungu. Hambi nha wanhu wenji wono wali wakondya kuwulagwa ku wulugu.

¹³ Dawudi yakawa kumuwuza kanyhi u muzelelo yu yulya mono yamulonjeye vyono Sawuli yakondya kufwa, yakamutya, “Alu agwe wukulawilila hayi?” Nayo yakatya, “Ane nili Mwamaleki, ninga nikalaga mumuno mono yisi yako.”

¹⁴ Dawudi yakamuwuza kanyhi yakatya, “Alu 'gwe, nhawule kuwa kwijelela kumuwulaga u munhu mono Muwaha Mulungu yamuhagula yawe mutemi?”

¹⁵ Hodu, Dawudi yakawa kumucema yunji wa muli wanhu wakwe, yakamutya, “Muwulagaje ayu.” Nayo u munhu mono yatumwa, yakawa kumuhungucila yuyo Mwamaleki, yakamutowanga sunga yakafwa.

¹⁶ Dawudi yakamutya yuyo Mwamaleki, “Mbali yiyi kwiletela gwegwe go mweneco. Hambi nha kwihomelela vyono kumuwulaga mono Muwaha Mulungu yali yamwitiye mafuta yawe mutemi.”

Dawudi yakuwalilila Sawuli na Yonazani

¹⁷ Dawudi yakawalilila Sawuli no mwanagwe Yonazani.

¹⁸ Kanyhi yakalajiliza zinghani ze cililo ci cino, wejizwe i wanhu wose wa Yuda. (Nazo zandicigwe mu citabu ca Yashali). Ne zinghani zono Dawudi yemba mu cililo cakwe, zali zozi:

¹⁹ “I walongola wetu, wawulajilwa mu matunda ga Isilayeli! I wasilikale wetu vitung'ati wagwa!

²⁰ Ninga mulece kuzanza ku Gati, hamba mu zinzila za mu Ashikeloni. Mulece kuwanoza wacekulu Wafilisiti wasangalale. Hamba kuwaleka i wana we cicekulu wa wono si walame wasecelele.”

²¹ “Halece kuwa buhe hamba mvula, mu matunda ga Gilibowa, ne migunda yayo yose yeze hakavu! Hambi zingula ze citung'ati, nha ho hanhu hono zatajililwa wavufywe, ne ngula ya Sawuli, hamba si mbace ne mafuta yaye.

²² Wupinde wa Yonazani, wali wa wuwulaji, no mumaje wa Sawuli nawo, wali wusina lusungu, wukawagwisa wono wali vilungo, wukawawulaga walugu.”

²³ “Sawuli na Yonazani wo wanhu wo wizine, kanyhi weyendile. Wali wali hamonga mu wumi, na mu wufwe, kanyhi wali wamanyhi kuciza Ndi, wali wali vilungo kuciza simba.”

²⁴ Nanye nyo wacekulu we Ciisilayeli mumulililaje Sawuli! Mwene mono yamuvwicenyi vivwalo vyo wihambo, kanyhi yakamuhambenyi kwe zi alimasi ne zahabu.

²⁵ Lanje ta vyono wasilikale we citung'ati wakondya kugwa, wakondya kuwulajilwa ku wulugu. Nayo Yonazani yagwiye mu matunda, yakondya kufwa.

²⁶ “Ane nghalaye muno muno so gwegwe ndugu yangu Yonazani. Nali nghwendile muno muno! U wendo wako wa kuli'ne, wali wo wizine muno, wali wucizize no wendo we wacekulu.

²⁷ “Lanje ta vyono wasilikale vitung'ati wakondya kugwa, ne vitwalo vyawo vyo wulugu vyakondya kongomezwa.”