1 Zinghomo 9 - Luganuzi Luswanu Kuli Wanhu Wose 2002

I wanhu wono wawuya ku wulawa ku wuhamywe

¹ Ne wanhu wose wa Isilayeli wakandikwa liwalo lyawo, mu nghango ye zimhuga zawo vyono zali zinha. No lwandiko lulo lukandikwa mu citabu ce Zinghomo ce watemi wa Isilayeli. Nawo wanhu wa Yuda, wakahamywa nhavivyo, wakategulwa ku Babiloni, ku soko yo wubi wawo.

² Ne wanhu wono walongola kuwuya mu yisi yawo mu makaya gawo, wali Waisilayeli, i wanyawusi, hamonga ne wakohani ne Walawi, ne wetumami wono wetumamaga mu Nyumba yo Mulungu.

³ Ne wanhu wo mulango wa Yuda na wa Benyamini, na wa Efulayimu, hamonga na wa Manase, awa wakabita wakekala ku Yelusalemi.

⁴ Zali zificile mhuga za Yuda magana mutandatu na makumi yicenda, wono wali wekaye mu Yelusalemi. Nayo yali yili nhavi: Yuda yakamulela Pelezi, nayo Pelezi, yakamulela Bani, nayo Bani yakamulela Imuli, nayo Imuli yakamulela Omuli, nayo Omuli yakamulela Amihudi, nayo Amihudi yakamulela Utayi.

⁵ Iwana wa Shela u mwana wa Yuda, yali yena mwana litagwa lyakwe Asaya, yuyu Asaya, yakawa yo mulongola wa mu mhuga yakwe.

⁶ Nayo Zela u mwana wa Yuda, yakawa yena mwana, litagwa lyakwe Yeyuweli, nayo yakawa yo mulongola wawo.

⁷ Awa nawo: Salu, u mwana wa Meshulamu, mono yali mwana wa Hodaviya u mwana wa Hasenuwa,

⁸ na Ibineya u mwana wa Yeholamu, na Ela u mwana wa Uzi, kanyhi mwizukulu wa Makili. Na Meshulamu u mwana wa Shefatiya, mono yali mwana wa Lewuyeli u mwana wa Ibiniya. Wawa wose, wali wo wo mulango wa Benyamini, wono wekala mu Yelusalemi.

⁹ Nawo hamonga mhuga yose, wali waficile wanhu magana yicenda na makumi mahano na mutandatu wo mulango wuwo wa Benyamini, wono wekala kuko ku Yelusalemi. Na wawo walume wose wono matagwa gawo gatambuligwe, wose wali walongola wa mu zimhuga zawo.

I Wakohani wono wali wekaye mu Yelusalemi

¹⁰ Awa nawo wo wakohani wono wekalaga mu Yelusalemi: Yedaya, Yehoyalibu, na Yakini.

¹¹ Azaliya u mwana wa Hilikiya, (mono yali yo mulongola mu Nyumba yo Mulungu.) Mono walezi wakwe wali Meshulamu, Zadoki, Melayoti, na Ahitubu.

¹² Adaya u mwana wa Yelohamu, mono ne walezi wakwe wali Pashuli, na Malikiya. Masayi u mwana wa Adiyeli mono ne walezi wakwe wali Yahizela, na Meshulamu, na Meshilemiti, na Imeli.

¹³ Ne wakohani wono wali wo walongola wa mu zimhuga zawo, wali waficile wakohani, elufu monga na magana mupunghati na makumi mutandatu, liwalo lyawo. Nawo wali wanghula we milimo yose yono yetumwaga mu Nyumba yo Mulungu.

I Walawi wono wali wekaye mu Yelusalemi

¹⁴ Awa nawo wo Walawi wono wekalaga mu Yelusalemi. Shemaya, u mwana wa Hashubu, mono ne walezi wakwe wali, Azilikamu na Hashabiya we mhuga ye Wamelali.

¹⁵ Bakibakali, Heleshi, na Galali, Mataniya u mwana wa Mika, mono ne walezi wakwe wali, Zikili, na Asafu.

¹⁶ Obadiya, u mwana wa Shemaya, mono ne walezi wakwe wali, Galali, na Yedutuni. Belekiya, u mwana wa Asa, kanyhi mwizukulu wa Elikana, mono yekalaga mu yisi yono yali yisi ya mwi'kaya lya Netofa.

I walindilizi we Nyumba yo Mulungu, wono wekalaga mu Yelusalemi

¹⁷ Awa wono wali walindilizi we Nyumba yo Mulungu, wono wekalaga mu Yelusalemi. Shalumu, Akubu, Talimoni, hamonga na Ahimani. Nayo Shalumu yali yo mulongola wawo.

¹⁸ Ninga mu cipango cico lono cali cikali, i wanhu we mhuga yawo wose, walindilizaga ku mulango wo lubavu lwa kucilima wono yenjililaga mutemi. Ha mwamulizo, wene wali wo walindilizi we milango ye zinghambi ze Walawi.

¹⁹ Ninga Shalumu u mwana wa Kole, kanyhi mwizukulu wa Ebiyasafu, hamonga ne wayagwe we mhuga ya Kola, wali wo walanjilizi wo wulindilizi wo mulango we Lihema lyono Lyelile, nha vyono walezi wawo wetumaga lono wali walanjilizi we nghambi yo Muwaha Mulungu.

²⁰ Nayo Finehasi u mwana wa Eleyezali, Muwaha Mulungu yali yali hamonga nayo! Hambi nha yo yabitaga kuwalingula mu madaha ganji.

²¹ Na Zekaliya nayo, u mwana wa Meshelemiya, yali mulindilizi wa ha mulango we Lihema lyono Lyelile.

²² Wanhu magana mejete ne kumi limonga na wejete, wo wahagulwa wawe wo walindilizi mu milango. Nawo wakawalwa mu nghango ye vitumbi vyawo vyono wekalaga. U mutemi Dawudi hamonga no muwizi Samwili, wo wawawika walezi wawo wawe walanjilizi wo mulimo wuwu.

²³ Holeka wawo walezi, hamonga ne wana wawo, wakajendelela kuwa walindilizi we milango ye Nyumba yo Mulungu.

²⁴ Ne milango yali yipilime mbavu zose, kusumuka, na kutakama, kucilima na kumwezi. Ne milango yose yali yina mulanjilizi mulongola.

²⁵ Ne walindilizi wawa, nawo watazilizwaga ne wandugu zawo, wono wekalaga mu vitumbi, wono wali wanojeye welecele mu mulimo wuwo wo wulindilizi, mwidaha lya vilo mupunghati, mupunghati.

²⁶ Na muli wawo walanjilizi walongola, i walongola wane, wali Walawi, kanyhi wali wo wena nghani ye ndumilizo. Kanyhi wali wo walanjilizi we vinyumba vyose vye Nyumba yo Mulungu, hamonga ne vitumamilwa vyayo vyose vyono vyali viwicigwe mumo.

²⁷ Nawo wekalaga du behi ne Nyumba yo Mulungu, vyono wali wo mulimo wawo kuyilindiliza, no kuyidigula milango yayo hakali mitondo nhondo zose.

I Walawi wanji kanyhi

²⁸ I Walawi wanji kanyhi, wali wena mulimo wo wulindilizi we viya vyono vyetumamilwaga mu wuhembi. Waviwalaga mu mapango gose, lono vikusolwa no kwitumamilwa, na lono vikugomolwa mu wuwiko wayo lono vyakondya kwitumamilwa.

²⁹ Na wanji nawo kanyhi wakawa wena mulimo wo wulanjilizi we viya vyose vya mugati, vye Hanhu Hono Helile, hamonga no wusaje, divayi, mafuta, wuvumba, hamonga na vye mhunjile swanu.

³⁰ Langa mulimo wo kuhanzahanza vye mhunjile swanu, wali mulimo we wakohani.

³¹ Hakawa ho yuli mulawi yunji, litagwa lyakwe Matitiya, u mwana mulongozi kulewa wa Shalumu, we mhuga ya Kola. Yuyu mwene yali yo mulanjilizi wo wuteleci we mikate ye vilavywa.

³² Nawo we mhuga ya Kola, wali wo walanjilizi wo kuteleka mikate yono yelile ku so Nyumba yo Mulungu mu Sabato zose.

³³ Ne zimhuga zinji ze Walawi, wakawa wo walanjilizi we wembi wa mu Nyumba yo Mulungu. Ne walongola we zimhuga zizino, wanji wekalaga mu vinyumba vinji vya mu Nyumba yo Mulungu. Nawo wakalekwa wetume mulimo wuwo du. Hambi nha wetumaga misi ne cilo.

³⁴ Na wawo wose wakawa wo walongola wa mu zimhuga ze Walawi, mu nghango ye zimhuga zawo mu walezi wawo. Nawo wakawa walongola, wekalaga ku Yelusalemi.

I wakuku zo munhu hamonga na wo lulelo lo mutemi Sawuli

³⁵ Yayiyeli yo yalizenga likaya lya Gibeyoni, nayo yakekala mumo. U mugolece wakwe litagwa lyakwe yali Maaka.

³⁶ No mwanagwe mulongozi kulelwa, litagwa lyakwe yali Abudoni, ne wanagwe wanji wali awa, Zuli, Kishi, Baali, Neli, Nadabu,

³⁷ Gedoli, Ahiyo, na Zekaliya, hamonga na Mikiloti,

³⁸ u sogwe wa Shimeya. I wana wawo, wekalaga ku Yelusalemi behi behi ne zimhuga ze wandugu zawo.

³⁹ Neli yakamulela Kishi, nayo Kishi yakamulela Sawuli, nayo Sawuli yakalela wana wane, Yonazani, Malikishuwa, Abinadabu, na Eshibali.

⁴⁰ Yonazani yakamulela Melibali, nayo Melibali yakamulela Mika.

⁴¹ Nayo Mika yali yena wana wane, Pitoni, Meleki, Talesi, na Ahazi.

⁴² Nayo Ahazi yakamulela Yala, nayo Yala yakalela wana wadatu, Alemeti, Azimaveti, na Zimuli. Nayo Zimuli yakamulela Moza,

⁴³ Nayo Moza yakamulela Bineya, nayo Bineya yakamulela Lefaya, nayo Lefaya yakamulela Eleyasa, nayo Eleyasa yakamulela Aseli.

⁴⁴ Aseli yali yena wana wali mutandatu, wowa, Azilikamu Bocelu, Ishimayeli, Sheyaliya, Obadiya, na Hanani.