1 Zinghomo 7 - Luganuzi Luswanu Kuli Wanhu Wose 2002

Wo lulelo lwa Isakali

¹ Isakali yali yena wana wane, Tola, Puwa, Yashubu, na Shimuloni.

² Tola yali yena wana mutandatu Uzi, Lefaya, Yeliyeli, Yahimayi, Ibusamu, na Shemuyeli. Nawo wakawa wo walongola we zimhuga za we mhuga ya Tola, kanyhi wali wali vitung'ati mu milewo. Na mu vilo vyo mutemi Dawudi, wene wali waficile wanhu elufu makumi mejete na nyejete, na magana mutandatu.

³ Nayo Uzi, yali yena mwana yumonga, litagwa lyakwe Izilahiya. Nayo Izilahiya yali yena wana wane, Mikayeli, Obadiya, Yoweli, na Ishiya. Nawo wakawa wo walongola wa mu zimhuga zawo.

⁴ Nawo wali wena wacekulu wenji hamonga ne wana, holeka i wana wawo wono welavya mu mulimo wo wusilikale, wakawa waficile elufu makumi madatu na mutandatu.

⁵ Ne wanhu wose, wono wali wakwiliye mu mulimo wo wusilikale, wono walawa mu zimhuga za wo mulango wa Isakali, wali waficile wanhu elufu makumi munana na mupunghati liwalo lyawo.

Wo lulelo lwa Benyamini na Dani

⁶ Benyamini yali yena wana wadatu, Bela Beka, na Yediyayeli.

⁷ Nayo Bela yali yena wana wahano, Eziboni na Uzi, Uziyeli, Yelimoti, na Uli. Nawo wakawa wo walongola we zimhuga zawo mu mhuga yawo, nawo wose wali wali vitung'ati mu wulugu. Ne wana wawo wono wali wakwiliye mu mulimo wo wusilikale, wali waficile wanhu elufu makumi mejete na nyejete, na makumi madatu na wane, liwalo lyawo, mu wulawa mu zimhuga zawo zose.

⁸ Beka nayo, yali yena wana yicenda, Zemila, Yowashi, Eliyazali, Eleyonayi, Omuli, Yelemoti, Abiya, Anatoti, na Alemeti.

⁹ Ne liwalo lye wana wawo mu zimhuga zawo, wali waficile wanhu elufu makumi mejete na magana mejete, wono wali wakwiliye mu mulimo wo wusilikale wo wulugu.

¹⁰ Yediyayeli yali yena mwana yumonga du, Bilihani. Nayo Bilihani yali yena wana wali mupunghati, Yewushi, Benyamini, Ehudi, Cenana Zetani, Talishishi, na Ahishahali.

¹¹ Nawo wakawa wo walongola wa mu zimhuga zawo, mu mhuga yawo, kanyhi wakawa wali citung'ati muno mu wulugu. Na muli wana wawo, wakawa waficile wanhu elufu yikumi na mupunghati, na magana mejete, wono wali wakwiliye mu mulimo wo wusilikale wo wulugu.

¹² Washupimu ne Wahupimu, wali wana wa Ili. Nawo Wahushimu, wali wana wa Dani. Na wose wawo wali we mhuga yiyo.

Wo lulelo lwa Nafutali

¹³ Nafutali yali yena wana wane, Yahiziyeli, Guni, Yezeli, na Shalumu. (Nawo wali wana wa Biliha).

Wo lulelo lwa Manase

¹⁴ Manase vikalelana no mujitulwa wakwe Mwalamu, wana wejete, Asiliyeli na Macili. Yuyu Macili yali yo sogwe wa Gileyadi.

¹⁵ Macili yakatola wacekulu ku wulawa mu mhuga ye Wahupimu ne Washupimu. Ne litagwa lyo lumbulye, yacemwaga Maaka. U mwana we kejete wa Macili, yacemwaga Zelofehadi, nayo Zelofehadi yali yalelile wana we cicekulu wose.

¹⁶ Nayo Maaka u mugolece wa Macili, yakamulelela Macili wana wejete, wono wacemwaga Peleshi, na Sheleshi. Yuyo Peleshi, yali yena wana wejete, Ulamu, na Lakemu.

¹⁷ Nayo yuyo Ulamu, yali yena mwana yumonga, litagwa lyakwe Bedani. Na wawa wo wo lulelo lwa Gileyadi u mwana wa Macili, u mwizukulu wa Manase.

¹⁸ Nayo Hamoleketi u lumbulye wa Gileyadi, yali yena wana wadatu, Ishodi, Abiyezeli, na Mahila.

¹⁹ (Shemida nayo yali yena wana wane, Ahiyani, Shekemu, Likihi, na Aniyamu.)

Wo lulelo lwa Efulayimu

²⁰ Awano wo wana wa Efulayimu ku wulawa mu zindelo zawo: Efulayimu yakamulela Shutela, nayo Shutela yakamulela Beledi, nayo Beledi yakamulela Tahati, nayo Tahati, yakamulela Eleyada, nayo Eleyada yakamulela Tahati.

²¹ Nayo Tahati yakamulela Zabadi, nayo Zabadi yakamulela Shutela. Efulayimu, yali yena kanyhi wana wanji wejete, nha cinji Ezeli na Eleyadi. Ninga i wana wawa wakawulagwa lono wahizaga zing'ombe ze wanhu wono wekalaga ku Gati.

²² Nayo u sogo yawo Efulayimu, yakawalilila vilo vinji muno, sunga ne wanduguze wakaza kumutuza.

²³ Efulayimu yakamupela kanyhi mugolece wakwe 'nda, yakamulelela mwana monga. Wakamupela litagwa lya Beliya, wakutuniliza wakutya, “Hambi magazo nha gaciziza mono mhuga yetu.”

²⁴ Efulayimu yali yena mwana yumonga wa cicekulu, litagwa lyakwe Shela. Nayo yuyu Shela yo yazenga makaya ga Bete-holoni ya hasi na ya kucanyha, hamonga na Uzeni Shela.

²⁵ Efulayimu kanyhi, yali yena mwana yumonga, litagwa lyakwe Lefa, ne wana wa Lefa wali awa: Lefa, yakamulela Leshefu, nayo Leshefu yakamulela Tela, nayo Tela yakamulela Tahani, nayo Tahani yakamulela Ladani,

²⁶ nayo Ladani yakamulela Amihudi, nayo Amihudi yakamulela Elishama,

²⁷ nayo Elishama yakamulela Nuni, nayo Nuni yakamulela Yoshuwa.

²⁸ Ne yisi yono wayisola wakekala mumo, yali yisi yono yali yili hamonga na Beteli, ne vikaya vyono vyali vipilime, sunga ko ku lubavu lwa kucilima ku Nala, sunga ko kulubavu lwa kumwezi ku Gezeli hamonga ne vikaya vyono vyali vipilime. Ne makaya ga Shekemu na Aya, ne vikaya vyono vyali vipilime.

²⁹ Nawo i wana wa Manase, wakebata no kugatema makaya ga Bete-shani, Tanaki, Megido, na Doli, hamonga ne vikaya vyono vyali vipilime. Ne hanhu baha hose, ho hanhu hono yekalaga Yusufu u mwana wa Yakobo.

Wo lulelo lwa Asheli

³⁰ Awa nawo wo wana wa Asheli: Mwene Asheli yali yena wana wane, Imuna, Ishiva, Ishivi, na Beliya, hamonga no mwana monga wa cicekulu, litagwa lyakwe Sela.

³¹ Nayo Beliya, yali yena wana wejete, Hebeli na Milikiyeli. (Yuyo Milikiyeli yo yazenga likaya lya Bilizayiti.)

³² Nayo Hebeli, yali yena wana wadatu, Yafuleti, Shomeli, na Hatamu, na mwana monga wa cicekulu, litagwa lyakwe Shuwa.

³³ Yafuleti, yali yena wana wadatu, Pasaki, Bimuha, na Ashivati.

³⁴ Nayo Shomeli, u mwanakwawe yali yena wana wadatu, Lohiga, Yehuba, na Alamu.

³⁵ Nayo Hotamu, u mwanakwawe kanyhi, yali yena wana wane, Zofa, Imuna, Sheleshi, na Amali.

³⁶ I wana wa Sofa wali awa, Suwa, Halinefe, Shuwali, Beli, Imula.

³⁷ Bezeli, Hodu, Shama, Shilisha, Itilani, na Bela.

³⁸ Nawo i wana wa Yefeli, wali awa, Yefune, Pisipa, na Ala.

³⁹ Ne wana wa Ula nawo wali awa, Ala, Haniyeli, na Liziya.

⁴⁰ Ne wana wawo wose, wali wana wa Asheli. Wali wo walongola we zimhuga zawo, kanyhi wali wo wanhu wono wali citung'ati mu wulugu, wawaha mu zindeco ze wasogo zawo kanyhi wali vilungo. I wo lulelo lwa Asheli, wali waficile wanhu elufu makumi mejete na mutandatu, wono wali wakwiliye mu mulimo wo wusilikale wo wulugu.