1 Zinghomo 5 - Luganuzi Luswanu Kuli Wanhu Wose 2002

Wo lulelo lwa Lubeni

¹ Lubeni u mwana wa Yakobo, u mulongozi kulewa, yagona no mujitulwa wo sogwe. Na ku soko yiyo, siyapegwa lilumbo lyono lyali limunojeye u mwana mulongozi kulelwa. Ne lilumbo lilyo yakapegwa Yusufu.

² (Ninga hamba nhavivyo, mumo mu mulango wa Yuda mo mwalawa mutemi).

³ Nayo Lubeni mwana, u mulongozi kulelwa kuli Yakobo, yali yena wana wane, Hanoki, Palu, Hezeloni, na Kalimi.

⁴ Nawo awano wali wo wana wa Yoweli, ku wulawa mu lulelo na lulelo, nha cinji Shemaya, Gogu, Shimeyi,

⁵ Mika, Leyaya, Baali, na Bela.

⁶ Nayo Tigilati Pilesa u mutemi wa Ashuli, yakamuteka Bela, mono yali yo mulongola we Walubeni, yakamuhamya.

⁷ Ne liwalo lye walongola wawo mu zimhuga zawo, wa mu zimhuga za Lubeni, wali wo awa: Yeyiyeli, Zekaliya,

⁸ na Bela, wa mu mhuga ya Yoweli. Ne mhuga yiyi, wekalaga ku Aloweli, na mu yisi yo wulawilila baho sunga ko ku lubavu lwa kusumuka ku Nebo, na Baali-meyoni.

⁹ Nawo wali wena matewa mawaha ge mitugo mu yisi ya Gileyadi. Na ku soko yiyo, wakayisola yisi yose ya Gileyadi, sunga ko ku lubavu lwa kucilima ku nyika yono yali yitambalaye sunga ko kwi'kolongo lya Efulata.

¹⁰ Na mu vilo vyo mutemi Sawuli, wawa wo mulango wa Lubeni wakawahoma Wahajili, wakawawulaga Wahajili wose mu wulugu, wakayisola yisi yawo ku lubavu lwa kucilima ya Gileyadi wakekala mumo.

Wo lulelo lwa Gadi

¹¹ Nawo wo mulango wa Gadi wakekala ku lubavu lwa kusumuka ya we mhuga ya Lubeni, mu yisi ya Baashayi, ku lubavu lwa kucilima sunga ko ku Saleka.

¹² Yoweli yali yo mulongola mulongozi wa mu mhuga yawo, na we kejete yali Shafamu. Nayo Yanayi na Shafati, wali wo walongola walongozi we zimhuga zinji ku Bashani.

¹³ I wanji nawo wono wali we mhuga yawo, wali wali mupunghati, nha cinji, Mikayeli, na Meshulamu, na Sheba, na Yolayi, na Yakani, na Ziya, na ya Ebeli.

¹⁴ Wawa wose wali wo wo lulelo lwa Abihayili, u mwana wa Huli. Ne walezi wawo ku wulawilila ku nyuma wali awa: Abihayili, u mwana wa Huli, u mwana wa Yaloya, u mwana wa Gileyadi, u mwana wa Mikayeli, u mwana wa Yeshishayi, Yahido, u mwana wa Buzi.

¹⁵ Nayo Ahi u mwana wa Abudiyeli, kanyhi mwizukulu wa Guni, yuyo yali yo mulongola we zimhuga zizo.

¹⁶ Nawo wekalaga mu yisi ya Bashani, na ya Gileyadi, mu vikaya vyayo, sunga na mu wudimilo wose wa mu mawimbi gose ge yisi ya Shaloni.

¹⁷ (Ne liwalo lilino lyawalwa mu vilo vya Yotamu u mutemi wa Yuda na Yelobowamu we kejete, u mutemi wa Isilayeli.)

I mapuga ge wasilikale ga we milango ya wono wekalaga ku lubavu lwa kucilima

¹⁸ Mu mulango wa Lubeni na wa Gadi, hamonga na we nusu ya wo mulango wa Manase, wono wali wekaye ku lubavu lwa kucilima, mwali mowali wasilikale wo wulugu waficile elufu makumi mane na yine, na magana mupunghati na makumi mutandatu, wono wali wejizwa hawaha mu witumamila ngula, ne mimaje, hamonga no wupinde.

¹⁹ Wakabita kuwahoma we zimbeyu ze Wahajili wono wekalaga ku Yetuli, na ku Nafishi, na ku Nodabu.

²⁰ Akuno wali wamwitumbiye Mulungu, wakamulomba yawapele wutazi. Nayo Mulungu yakawahulika wulombe wawo, yakawapela wusume wuwaha kuli Wahajili, hamonga ne wekalani wayawo wono vyali vilunzize nawo.

²¹ Wakawasuma walugu wawo, wakateka ngamiya zificile elufu makumi mahano, ngholo elufu magana mejete na makumi mahano, ndogowe zificile elufu nyejete, wakawateka wanhu mu wulugu waficile wanhu elufu yigana limonga.

²² Wakawawulaga walugu wenji, hambi wulugu wuwo, nha wali wuli mu wuhile wo Mulungu. Wakajendelela kwikala mu yisi yiyo, sunga mwi'zuwa lyawo lyo wuhamywe wa mu yisi yawo.

I wanhu wa Manase ya kucilima

²³ I wanhu wa Manase ya kucilima, wakekala mu yisi ya Bashani, sunga na mu zisi zo lubavu lwa kusumuka za Baali, na Helimoni na Senili, sunga ko kwi'tunda lya Helimoni. Ne liwalo lyawo likacila konjelezeka muno.

²⁴ Ne walongola we zimhuga zawo wali awano: Efa, Ishi, Eliyeli, Yelemiya, Hadoviya, na Yahidiyeli. Na wawa wose wali wasilikale vitung'ati wo wulugu, kanyhi wali wo walongola wono wali wamanyice muno muno mu zimhuga zawo.

Zimhuga za ku lubavu lwa kucilima, wakuhamywa

²⁵ Ninga wanhu wakawa si wehuwilwa kuli Mulungu we walezi wawo, wakamubedegala no kuhemba milungu ye wanhu wono wekalaga muno, wono Mulungu yali yakondya kuwawinga mu yisi.

²⁶ Holeka nayo Mulungu yakamuleka Pulu u mutemi wa Ashuli, mono hanji yacemwaga Tigilati Pilesa yayisole yisi yawo. Yakawahamya wo mulango wa Lubeni, na wa Gadi, hamonga na we nusu ya wo mulango wa Wamanase wono wekalaga ku lubavu lwa kucilima, yakawategula wekale ku Hala, na Haboli, na Hala, sunga ko kwi'kolongo lya Gozani. Nawo wakekala kuko sunga nalu.