1 Zinghomo 26 - Luganuzi Luswanu Kuli Wanhu Wose 2002

I walindilizi we Nyumba yo Mulungu

¹ Aga nago go magawo ge milimo yono wapegwa Walawi wono wetumaga mulimo wo wulindilizi we Nyumba yo Mulungu. Wa mu mhuga ya Kola, kwali na Meshelemiya u mwana wa Kole, we mhuga ya Asafu.

² Yuyo Meshelemiya, yali yena wana mupunghati, na mu ndelwa yawo, wali wetyatyizye nhavi: Zekaliya, Yediyayeli, Zebadiya, Yatiniyeli,

³ Elamu, Yehohanani, na Eliyehonayi.

⁴ Hakawa ho yuli nayo Obedi Edomu, mono nayo, Mulungu yamumotya, yakamupela wana munana. Nawo mu wilecele we ndelwa yawo, wali nhavi: Shemaya yali yo mulongozi kulelwa, yakamulecela Yehozabadi, hanyuma Yoya, Sakali, Netaneli,

⁵ Amiyeli, Isakali, no mwanakwawawo Peyuletayi.

⁶ Nayo Shemaya, u mwana mulongozi kulelwa wa Obedi Edomu, yali yena wana mutandatu, Oteyi, Lafayeli, Obedi, Elizabadi, Elihu, na Semakiya.

⁷ Nawo wali wanhu vitung'ati mu mhuga yawo, ku soko ye vilungo vyawo, na ko muno, wawa wana wejete we ndumilizo, wali wena cipegwa ciwaha.

⁸ Wawa wose wali wo wana wa Obedi Edomu, nawo wakawa wena wana, hamonga ne wandugu zawo. Nawo mwi'walo lyawo, wali waficile wanhu makumi mutandatu na wejete, wono wakwiliye mu mulimo wuwu.

⁹ Mu mhuga ya Meshelemiya, mwali mowali wanhu yikumi na munana, wono wali wakwilile mu mulimo wuwu.

¹⁰ Namo mu mhuga ya Melali, kwali ko yuli Hosa. Yuyu Hosa, yali yena wana wane, Shimuli, (yuyu Shimuli, u sogwe yakamuwika yawe yo mulongola, hamba yawe yali yo si mwana mulongozi kulelwa.)

¹¹ Hilikiya, Tobaliya, na Zekaliya. Nawo wakawa waficile wanhu yikumi na wadatu, wose hamonga mwi'walo lyawo, wa mu mhuga ya Hosa, wono wali wo walindilizi we Nyumba yo Mulungu.

¹² Nawo wawa i walindilizi we Nyumba yo Mulungu, wakegawa mu vipuga vipuga mu nghango ye zimhuga zawo. Nawo ho wakawa kuwikwa mu mulimo wo wulindilizi we Nyumba yo Mulungu, nha vyono wetumaga i Walawi.

¹³ Nazo mhuga zose zikatowelwa kula, ho yimanyice mhuga no mulango wa hayi wono wowulindiliza.

¹⁴ Ne zi kula zizo zali zeza kutowa, hobaho Shelemiya yakapegwa mulango wa kucilima. Nayo Zekaliya u mwanagwe, u munhu mono nhondo zose yena nonga yakwe ya mahala, mwene yakapegwa yalindilize mulango wa kusumuka.

¹⁵ Nayo Obedi Edomu yakapegwa yalindilize mulango wa kutakama. Nawo wanagwe, wakapegwa walindilize nyumba ye viwutwa.

¹⁶ Shupimu hamonga na Hosa, wakapegwa walindilize mulango wa ku mwezi, hamonga no mulango wa Shaleketi, wa mu balabala yono yibitile ku cinanuko. No wulindilizi wuwo wono wali wagawiywe, welecelaga munhu na cipango cakwe.

¹⁷ Ku lubavu lwa kucilima, wekalaga walindilizi wali mutandatu nhondo zose. Ku lubavu lwa kusumuka, wane, na ku lubavu lwa kutakama, nako wane. Kanyhi na mu zinyumba ze viwutwa, wakawikwa nako wanhu wane wane vilo vyose, wejete, wejete, mu zinyumba zose.

¹⁸ Na kono ko yili Palebali, ku lubavu lwa kumwezi, nako kwali kowali walindilizi wane, walindilizaga ku balabala, ne wejete nawo, kono ko yili Palebali.

¹⁹ Na wuwu wali wo wugawe we milimo yo wulindilizi, kuli we mhuga ya Kola, na kuli we mhuga ya Melali.

I milimo yinji kanyhi ya mu Nyumba yo Mulungu

²⁰ Na wanji kanyhi wa muli Walawi, wakapegwa mulimo wo wulanjilizi we zisawo za mu Nyumba yo Mulungu na ya mu zinyumba ze viwutwa, vye vipegwa vilavye kuli Mulungu.

²¹ Nayo Ladani muyagwe ne wana wa Gelishoni, yali yo mulezi we zimhuga zinji, hamonga ne mhuga ya Yahiyeli mwanagwe.

²² Zetamu na Yoweli, i wana wa Ladani, wali wo walanjilizi we sawo ya mu Nyumba yo Mulungu, hamonga ne zinyumba ze viwutwa.

²³ Ne milimo yinji kanyhi wakapegwa i wana wa Amulamu, na Izihali, na Hebuloni, na Uziyeli.

²⁴ Nayo Shebuweli we mhuga ya Gelishoni, u mwana wa Musa, yuyo nayo, yali yo mwitumami muwaha, mono yo yali yena wulajilize muli sawo yose ya mu Nyumba yo Mulungu.

²⁵ Na muli Eleyezali u nduguye wa Gelishoni, mwene Shebuweli wali wali ndugu na Shelomiti. Mwene Eleyezali yali yo sogwe wa Lehabiya, nayo Lehabiya, yakamulela Yeshiya, nayo Yeshiya yakamulela Yolamu, nayo Yolamu yakamulela Zikili, nayo Zikili yakamulela Shelomiti.

²⁶ Nayo Shelomiti hamonga na wa mu mhuga yakwe, wali wo walanjilizi we vipegwa vyose vyono yavyeza mutemi Dawudi, ne wawaha wose we zimhuga, ne walongola wose we zimhuga, mu vipuga vyawo, hamonga ne wetumami wawaha we wasilikale.

²⁷ Wakavisola ne vinhu vinji vyono waviteka ku wulugu, navyo wakavyeza, ho vitumamilwe mu Nyumba yo Mulungu.

²⁸ Nayo Shelomiti, hamonga na we mhuga yakwe, wali wo walanjilizi we vinhu vyose vyono vikezwa, ho vitumamilwe mu Nyumba yo Mulungu, hamonga ne vipegwa vyono vyaletwa no muwizi Samwili, no mutemi Sawuli, ko muwoko wa Abineli u mwana wa Neli, hamonga na Yowabu u mwana wa Zeluya.

I milimo yinji ye Walawi

²⁹ Na mu wana wa Izihali, Kenaniya hamonga ne wanagwe, wo wapegwa mulimo wo kuwika vikumbucizo vye zinghani, hamonga no wuling'anizi muli Waisilayeli.

³⁰ Na mu wana wa Hebuloni, Hashabiya hamonga ne wanduguze, waficile wanhu elufu yikumi na mupunghati, wose wono wali wasigaye, wakapegwa mulimo wo wululicizi we milimo yose yo Muwaha Mulungu, na ku so witumami wo mutemi, mu Isilayeli yo lubavu lwa kumwezi ku nhumbi ye likolongo lya Yoludani.

³¹ Nayo Yeliya, yali yo mulongola we wana wa Hebuloni. Na mu mwaka we makumi mane, lono Dawudi yali yakali yatemile, i wana wose wa mu mhuga ya Hebuloni, wakalondolwa, na yikejela vyono kowali wanji wasilikale we mhuga yiyo, wono wasigala wali wekaye ku Yazeli, mu yisi ya Gileyadi.

³² Dawudi yakawahagula wanhu elufu nyejete na magana mupunghati, wono wali wasigaye, i wawaha we zimhuga ze wanduguze za Yeliya, yakawawika wawe walulicizi we milimo yose yo Mulungu, na ku so witumami wo mutemi, mu Isilayeli yo lubavu lwa kucilima ku nhumbi ye likolongo lya Yoludani, mu yisi ya Lubeni, na Gadi, hamonga na ya Manase ya kucilima.