1 Zinghomo 22 - Luganuzi Luswanu Kuli Wanhu Wose 2002

¹ Lulo Dawudi yakatya, “Ahano ho hanojeye Nyumba yo Mulungu yizengwe. Hamonga ne cikumbicilo cono wanhu wa Isilayeli wowa kulavizya vilavywa vinyanywe.”

Wuwikanize wo kuyizenga Nyumba yo Mulungu

² Mutemi Dawudi yakalajiliza i wajenzi wose wono wekaye mu yisi ya Isilayeli, wehangulize hamonga. Nayo yakawapela munhu na mulimo wakwe. Wanji mulimo wo kusesa mabwe, go kuzenjela Nyumba yo Mulungu.

³ Dawudi yakalavya viwutwa vinji vye cuma, ho watyane misumali hamonga ne viwopelo so milango ye zimbawo. Hamonga ne shaba nyinji muno, yono yisina cipimo.

⁴ Yakawawikaniza wanhu wa Tulo na Sidoni, wamuletele mibici minji ye mihagata.

⁵ Dawudi yakehwesa yakatya, “Nyumba yo Mulungu yono mwanangu Solomona koyizenga, yowa yinojeye yiwe swanu muno, kanyhi yiwe ye lilumbo yiwaha mono yinze yose. Ninga lu mwanangu Solomona, nha yakali mudodo, kanyhi yakali namanya nyinji. Holeka yinojeye nimuwikanizize vitumamilwa vyose.” Holeka Dawudi yakawikaniza vinhu vinji muno, lono yali yakali si nafwa.

⁶ Dawudi yakamutumila Solomona munhu, yakawa kumulajiliza nha vyono yanojeye yamuzenjele Muwaha Mulungu, u Mulungu we Waisilayeli, Nyumba yakwe.

⁷ Dawudi yakamutya, mwanagwe, “Gwe mwanangu, ane nali nina wuhile wo kumuzenjela Nyumba, Muwaha Mulungu, u Mulungu wangu.

⁸ Ninga Muwaha Mulungu yakanonjela yakatya nha vyono, ane mbulaje wanhu wenji, kanyhi ndewile milewo minji. Holeka ku soko ye sakami nyinji yono nayimwaga, nayo si konghombola ane nimuzenjele Nyumba yakwe.

⁹ Ninga hamba nhavivyo, yanyihuwiza yakatya, ‘Agwe Dawudi kotuga mwana mono kolotema ko mulamu. Hambi nha nomunoza yawe no mulamu kuli walugu wakwe wose. Ne litagwa lyakwe kolocemwa Solomona. Vyono mu cipango co wutemi wakwe, ane nolowapela Waisilayeli mulamu hamonga no wucitilwe.

¹⁰ Nayo yo kolonzejela Nyumba yangu. Nayo kolowa mwanangu, nane nolowa nili sogwe. Na wo lulelo lwakwe, wolowa watemi we Waisilayeli cibitilila.’ ”

¹¹ Hanyuma kanyhi yakajendelela kulonga yakutya, “Holeka 'gwe mwanangu, u Muwaha Mulungu, u Mulungu wako, yawezane nagwe, kanyhi yawufisilize no wihuwizo wakwe, yakupele wusume wo kumuzenjela Nyumba yakwe.

¹² Kanyhi Muwaha Mulungu, u Mulungu wako, yakupele wizuce ne mahala, ho wuwatemele Waisilayeli mu wibate Lilajilizo lyakwe.

¹³ Na hono wibate wulajilize wose wono Muwaha Mulungu yawapelela Waisilayeli muli Musa, nagwe komoteswa. Holeka weze ne vilungo ne nhumbula ye citung'ati, wulece kogofywa na nghani yinji.

¹⁴ Nane ko wuhidimbazi wangu, nakondya kuyiwicila ciwutwa i Nyumba yo Mulungu, ciwutwa ca zahabu, tani elufu yidatu na magana mane, hamonga na fweza, tani elufu makumi madatu na yine cititila. Zitumamilwe mu wuzenji we Nyumba yo Mulungu. Hamonga na zizo, ho cili ciwutwa ciwaha ca shaba na cuma. Kanyhi mbikanize ne mabici hamonga ne mabwe, vyose vikondizye, ninga hamba nhavivyo yinojeye nagwe wonjeleze vinji.

¹⁵ Nha wina wetumami wenji muno. Ho wali wanhu wono wosuma kwituma mulimo wo kusesa mabwe, ho wali wazenji, hamonga ne waselemala. Hamonga ne wanghula we milimo yose,

¹⁶ mu milimo ye zahabu, na ye fweza, na ye shaba, hamonga na ye cuma. Holeka alu, wuwanzaje mulimo wo wuzenji, nayo Muwaha Mulungu yawezane hamonga nagwe.”

¹⁷ Dawudi yakawalajiliza i walongola wose we Waisilayeli, wamutazilize Solomona.

¹⁸ Yakawatya, “U Muwaha Mulungu u Mulungu wenyu, yali yali hamonga nanye no kumupelenyi mulamu mu mbavu zose. Yakamhela vilungo vyo kuwasumila wanhu wose wono wekalaga mono yisi yiyi, sunga nalu, weza wo wetumami wenyu, wakumwitumamila Muwaha Mulungu.

¹⁹ Holeka alu, mumwitumamile Muwaha Mulungu, u Mulungu wenyu, kwe nhumbula yenyu yose na ko mutima wenyu wose. Mwanze mulimo wo wuzenji we Nyumba yo Mulungu, ho musume kulinjiza mugati Lisanduku lye Cilagane lyo Muwaha Mulungu, hamonga ne viya vinji vyose vyono vyelile, vyono vikwitumamilwa mu wuhembi wakwe.”